1 Kɛɗɔn n nta yeenya a kakani au shɛ a wɛrɛ Ɗa, nwanyau geli Ɗajashonɛlapa manziiwi nɛ: <<Ɔ yɛnɛ ɔ tẽri shɔ pii manzii e Ɗalapa sisɨn lɛsinɛ a kotipi.>>

2 Ɗajashonɛlapa ɗekɨn yɛrɛ a tẽe vigbete au pii a kotipi, kɛɗɔn nɔrɔ vɔrɔ au kɔnɛ aɗɔn fɛ̃ɛm shɛrɛ a shɔgbeteyi nɔmba viɓiliu ai biini, a shɔ gbeteyi basiu jasuru yɛ.

3 Ɗajashonɛlapa au pɛsiyɛ tẽeu vigbete au piirɛ a wapo. mii wapou rirɛ a ɔ̃ naa shɔgbete vɔ tɛttɔ kpaa, visuru koshɔpiya au a yɛti mii wapouni kpai i vɔlirɛ.

4 Kɛɗɔn Ɗajashonɛlapa e taatiu tẽeu vigbete au piirɛ jo a ɓooti a ɗɔgbete mii ɓuɗɔnyɛ, see i rii kpaarɛ. 5 N nta Ɗajashonɛlapa au sã mii yɛ shanɛ, << A ruuyeenɛ tɔ̃vɨn, apɛ shɔ wɔsɔ-wɔsɔ, mɔkɔ apɛ a shɔgbete asi! 6 Aruviya shɔmiyi nyɔki shɔtɔ̃vɨngtɛ a Ɗajashonɛlapayini, dɔdɔrim a ãi kpaatɛ nɛi ɓootɔ, raaɓoonɛm pɛ vigbete tɔ̃rɛ shɔu ãyɛkɔǃ>> 7 Kɛɗɔn n nta yeenya shɛ a laazã shanɛ, <<Uɓeyelapa Ɗalapa shɔgbete viteu kaka ɓayɛ! Nankɔ a ruuyeenɛ pɛ nizɛ, pɛ tɔ̃vɨnǃ>>

8 Kɛɗɔn Ɗajashonɛlapa e nɛɛti tẽẽ vigbete au pii a ɗaa, a shɔ yaarɛ nɛu too shɔ au nwanɛni. 9 Ɗɔ nwanɛ too shɔwirɛ, ai gaa ruu shalinɛ au n ti Ɗalapa bassinɛ ɓayɛ, shɔgbeteu kaka yukɔnɛm ɗɔn. Ama i ji kɔsi sisɨn ɓa i yaayi ruuvini pɛlinɛ i bɛliu banɛrɛ ɓa.

10 Kɛɗɔn Ɗajashonɛlapa e maani tẽeu vigbete au piirɛ a viɓiliu lakpati, ɗɔkɨnri raa viɓiliu ɗɔgbete roo kpati kpai, shɔ shaa ntarirɛ shẽtẽ-shẽtẽ aru raa gbeteyi ɓooyɛ 11 I lɛsi Ɗalapa gbete au kolapa nii fɛ̃ɛm aru raaɓoonɛ ai nɔɔrɔɔni, ama i ji yaai nyaba vikɔ̃likinɛ gbete i pɛliyɛ ɓa.

12 Ɗajashonɛlapa e mangbete tẽeu vigbete au piirɛ a ɓooti pɛ̃niba Yuferetis, kɛɗɔn ɓootiu ɔ̃rirɛ, aruviya shɔu yaasi kpati au yɛ shɛ a gɨnri nyaba. 13 Kɛɗɔn n zɛ suru taati ai ɓa wɔsɔ-wɔsɔ ɓa gbeteyi shɛ vɔɔyi, gbete shɛ sɔɔ yaa shɛshinɛ nya, wɔ shɛ a viɓili nya, wɔsɔ̃n a janyagadi nyayeelinɛ nya. 14 I pɛ suru kɔ̃linɛ gbeteyi pɛli vibiizaanɛyɛ, i shɛrɛ yɛnɛ kpati kotipi taatimiyi ɗɔbii, i toliyi nya ɗɔgbete aru sɨntaanɛ a lee pɛ̃nibam a Ɗalapa shɔ gbete vi tɛu kaka ɓayɛ.

15 Kirisi shanɛ, ɔ kpaasisɨntɔ, <<N yɛn a naa ɓoo! Ɗalapa u tasi shɔgbeteu ɔ̃ a nɔkãkãri susãri abiini, shɔgbeteyi kɔyi fãrã, aruviya yɛ raarɛ a biwaati u nta yusẽ a shɔ ɗekɨn.>>

16 Kɛɗɔn suru kɔ̃linɛwi i toli kpatiyi ɗɔgbete, aɗɔ wɔ shɔ ɓa a nya Hiburu nɛ Amagido.

17 Kɛɗɔn Ɗajashonɛlapa e manzii tẽeu vigbete au piirɛ a konyasi. Kɛɗɔn yeenya wɔ shɛ a lakpati ɓusɨng wɛrɛ Ɗa a kakani shanɛ, <<Shɔ yisinyatɛǃ >> 18 Kɛɗɔn shɔ zɛ ɗɔ kɔlinɛ, a vikalinɛ, a jalɛ ɓɛnɛ, wɔsɔ̃n tipi zɨtinɛ pɛ̃niba shɔzɛ ɓɛɛ shɛshinɛyɛ a shɔ ji pɛli ɓa shãni ɓa; shompɛ tipi ɓɛnɛ pɛ̃niba au tɛɛ wɔyitɔ kpai. 19 Komoo pɛ̃nibam vɔsirɛ taati, komoo pɛ̃nibau a shɔ kotipiyini kpai i zilirɛ. Ɗalapa kpaa sisɨnrɛ ayuu Babila pɛ̃niba, a pɔ̃urɛ u ɓoo jawaa mii inabi e u sisɨn lɛsinɛ au tɛɛ kakayɛ. 20 Tipiu mii kɨntiyɛ nii rɛ kpai, kɔpɔyi kpai shɔ ji zɛyi tɔɓa. 21 Tala pɛ̃niba, kpetinɛ a ɗɔnni mɛnɛ lazɔrɔ tɛ̃yɛ gbete, i zɨlirɛ a konyasi a shɔ yuu, au pɔ̃rɛ shɔ dã Ɗalapa aru raa gbete tala tasi shɔyɛ, yukɔnɛu si pɛ̃niɓa tɛɛ kaka tɔ.