Tasinɛ 17

Su Kpatang Pɛ̃niɓa a Viɓili Wɔ

1 Kɛɗɔn gbete atette Ɗajashonɛlapa manzii ai pii manzii ɗɔn ang ɗɔbii a shanɛ, <<Anɛ n tasaa nɔgbete shɔyɛ tasi su kpatang pɛ̃niɓam raa pɛ, ukɔ sã tipi pɛ̃niba eyi a nyabooti waanɛ miyirɛ, 2 kpati kotipimiyi, i rootɛ awuni, shɔ kotipimi i wirirɛ aru i ɓoou mii inabi ruuvini kpatang ayi pɛli a wuniyɛ.>>

3 kɛɗɔn Ɗa suru tunrɛ, a Ɗajashonɛlapa tunrɛ yɛnɛ ɗɔ gɔggɔɔ. Aɗɔwakɔ n zɛ su wɔ ɔ̃tɛ ayuu viɓili nweri wɔ, viɓiliu shɔ bee nii gbete dã Ɗalapa au biini piti; viɓiliu yuuyi manzii u lageeyi kopi. 4 Suu hã fãrã naa miizarɛ a nweri, bariki bi a tarimɛɛ, a tari au saa yuu bang yɛ wɔsɔ̃n tari puru. Au naa sã jawaa tarimɛɛ au yiitɛttɔ lot au vizara kpãntang pɛlinɛni. 5 Au nɔkɨn nii beenɛ wɔyi siɗɔn au dɔɔyi si ɓusinɛ <<Babila pɛ̃niɓa, kpantang-yi ɓini kpai, shɔgbete lɛsi kotipiyɛ.>>

6 N zɛ suurɛ yuuwitiutɛ aru ɓoo shɔ wɔsɔ-wɔsɔyi kpaa a shɔgbeteyi shɔ nyokirɛ aru nɛyi gɨn Yesɔ nya.

Naa n zɛutɛ, n bizaa fɛ̃ɛm. 7 Ɗajashonɛlapa hɨnnɛ, <<Bizaa aruviya? N yɛn tasaadɔɔ rubusinɛ a sum yuu a viɓili gbete au tuuyɛtɔ. Viɓili au yuu manzii a lagee kopi. 8 Viɓilim si ɔ̃tɛttɔ a suruni ama dɔdɔrim u toɓa . Yɛ shɛ a too gbikiri-gbikiri anɛ ɗɔgbete shɔyɛ lɛsiuyɛ, shɔgbeteyi ɔ̃nɛ a kotipim a shɔ ji beeyi nii ɓa a labeenɛ a suruni ɓa aɗagbete shɔ shɛshi kotipiyɛ ni ɓa, i yɛ nta vibiizaanɛtɔ, ikɛ kɨnnɔɔ nɛ a viɓiliuni. Viɓiliu si a suru ni, dɔdɔrim u tɔɓa a suru ni ɓa, ama yɛ sɔɔ sɔ̃ntɔ.

9 <<Vim kasirɛ nɛ shɔu ɔ̃ a sẽrẽ a vizɛnɛni. yuu manziimiyi ikɔyi ɔ̃rɛ doddo manzii, gbete suu ɔ̃ au yuuni yɛ, ikɔyi sɔ̃n kpati manziimiyi. 10 Maani ai tetteni i nwesitɛ ama gbete wɔ u doo ɗɔn, gbete wɔ ji apɛ ɓa; naa kaanɛ ɔ̃tɛ kaka jazɨng akɔrɔ u roo kpatitɔ sekaa. 11 Viɓili au si a suru ni ama dɔdɔrim u toɓa suruni ɓa, ukɔu pɛ kpati e maantaa, shɛ pɛ atette shɔ manziimiyikɔ, u ɗɔgbete yɛ ɗɔu shɔyɛ lɛsiuyɛ.

12 <<Lagee kopi gbete a zɛyɛ ukɔ ɔ̃rɛ kpati kopi ai ji gayi kpati roonɛ pɛ ɓa, ama shɔyɛ ãyi naatɔ i ɔ̃ kpati a viɓiliuni e dɔɔɗa gbete. 13 Kpati kopimiyi vi au ai sisɨn gbete, i kaka ai kpati roonɛ i ãpɛ a viɓiliu nakɔ. 14 I yɛ waabatɔ a jamɛ̃rɛ̃uni; ama ɗa yɛ shaari jamɛ̃rɛ̃ɛ̃utɔ a nyazɔɔ a shɔgbete ɓayinya a lɔyiyɛ au jadɔɔ sisɨn ãnɛyini ai yuuni, aru u pɛ Uɓeyelapa i ɓeye a kpatiyi i Kpati.>>

15 Kɛɗɔn Ɗajashonɛlapa gelin sɔ̃nɛ, <<Miiyi gbete a zɛyɛ, a su kpantang ɔ̃ au yuuniyɛ, ukɔ ɔ̃rɛ tipiyi, shɔzɛyi, shɛ̃ɛ̃shɔzɛyi, wɔsɔ̃n nyakooyi. 16 Lagee kopi gbete a zɛyɛ a viɓilini i yɛ ɓɛ̃ɛ̃ su kpantautɔ; i yɛ raa vigbete u a wuniyɛtɔ kpai i yaau ntowaati; i yɛ shaau yɔpɔtɔ i tourɛ a yaa. 17 Aru Ɗalapa pɔ̃ tɛttɔ ai sisɨn nɛi pɛli vigbete ma au sisɨn, a nyaba vishonɛ a nyazɔ i ɔ̃ a sisɨn gbete i ã viɓilim i kaka gbete yɛ roo pkati anɛ ɗagbete shɔ kpaa ruu Ɗalapa zɛnɛ.

18 <<Su gbete a zɛm ukɔ ɔ̃rɛ koomo pɛ̃niɓa au roo kpati a kpati kotipimiyi yuuyɛ.>>