1 Naa Ɗa jamɛ̃rɛ̃ ɓeli virɛnɛ e manziiutɛ, viwɔ ji gulu ɓa kolapani ɓa mɛnɛ dɔɔɗa ɗiti gbete. 2 Kɛɗɔn n zɛ Ɗajashonɛlapayi manzii i shitɛ a Ɗalapa ɗekɨn, shɔ ãyi gãntitɛ manzii.

3 Ɗajashonɛlapa wɔ au a jaɓari tarimɛɛ e laa sũru-sũru a naanyɛ, arɛ a shi a laazã. Shɔ ãu laa sũrũ sũrũ waanɛ nɛu ɓasi a Ɗalapa shɔbiiyi Ɗakinɛni piti, u ã kɛ a laazã tarimɛɛ au shi a lakpati ɗekɨn. 4 Zɨnri laa sũrũ sũrũ a shɔ too a Ɗajashonɛlapa naa au shi a Ɗalapa ɗekɨn gẽ laparɛ a Ɗalapa shɔbiiyi Ɗagakinɛni. 5 Kɛɗɔn Ɗajashonɛlapa tuu jaɓari laa sũrũ-sũrũrɛ, a yisi a yaau a laazã, a lɔkirɛ a kotipi. See ɗɔzɨntirɛ a jalɛ lanɛ, ɗɔ ɓɛshẽku-shẽku, wɔsɔ̃n a tipi ɓɛnɛni.

6 Kɛɗɔn Ɗajashonɛlapayi manzii a gãntini i mabiitɛ nɛi geetɔ.

7 Ɗajashonɛlapa ɗekɨn geeu gãntirɛ. tala a yaa, rãa a kpaa tɛ̃ɛ̃ a kotipi. Kotipi kn gbete atette taati yaa sharɛ, laa kn gbete atette taati, a wisi zazani piti kpai.

8 Kɛɗɔn Ɗajashonɛlapa au pɛsiyɛ geeu gãntirɛ. Viwɔ tasi naa kɔpɔ pɛ̃niba yaa aɗɔ shaanɛ shɔ lokirɛ a wapo. Wapo kn gbete atette taati rii kpaa rɛ, 9 visuru kn gbete atette taati a yɛti wapo vɔrɛ, a latosi pɛ̃nibayi kn gbete atette taati lɛsirɛ.

10 Kɛɗɔn Ɗajashonɛlapa e taati geeu gãntirɛ. Sɛ pɛ̃niba u yaa ɗɔ shaanɛ naa lazɔrɔn, shi-shi a kolapa a ɓooti kn gbete atette taati a ɗɔgbete mii ɓuyɛ. 11 (Sɛu niinɛ, <<Gãgã.>>) Miiwu kn gbete atette taati rii gãgãrɛ, shɔzɛ waanɛ i vɔrɛ aru gbete i ɓoo miiyɛ, aruviya si miiwu rii gãgãtɛ.

12 Kɛɗɔn Ɗajashonɛlapa e nɛ̃ɛ̃ti geeu gãntirɛ. Vi waa ɗaa kɨn gbete atette taati rɛ, a shɛlɛ kɨn gbete atete taati, a sɛ kɨn gbete atete taatini, aruviya nɔgbete i kɨn gbete atette taatiyi kpaa ɗɔsẽsẽ tɔɓa; ɗɔsẽsẽ si ɓa a kn gbete atette taati a niti ni ɓa, si sɔ̃n jo nankɔ kn gbete atette taati a zɨbani.

13 Kɛɗɔn n kɨnnɔɔ rɛ, n nta loloki nya a gãgãni au ɗɔ dunɛ a yusɔrɔ shanɛ, <<Wee! wee! yɛ ɔ̃kɛpikovi a ɔkɔɔni shɔ kotipimiyi, aɗagbete gãsi Ɗajashonɛlapa taatimiyi ikɛ mabii gãnti gbete ɔ̃riyitɛ kaka jazɨng akɔrɔ i geetɔ yɛ viya!>>