1 <<A beeri Ɗajashonɛlapa shɔ kn sisɨn ãnɛyi ai Sardi nɛ,

<<N pɛ ruu au shɛ a shɔgbete u a Ɗalapa suruni manzii a sɛni manzii. N zɛ vigbete a pɛliyɛ tɛttɔ; shɔ zɛnaa a suruni karaɓa a vɔtɛttɔ! 2 Nisinɛ, a masi vigbete a doo a yiniyɛ i bitɔ nɗayi vɔ yisinɛyɛ. Aruviya n zɛrɛ vigbete a pɛliyɛ ɓa tɛpɛ-tɛpɛ ang Ɗalapa ɗekɨn ni ɓa. 3 Aru nankɔ a kpasisɨntɔ a vigbete shɔ mataayɛ a vigbete a ntayɛni; a gɨnrɛ a yaa ruuvini pɛlinɛtɔ. A ji nisi ɓa, n yɛn a naa ɓɔɔ aa ɗɔbii, a yɛ zɛ ɗagbete n yɛn a yɛ ɓa. 4 Ama shɔ fɛ̃ɛ̃ a Sarji awɔ tete i ji hɨmsiyi fãrã ɓa. Ɔ yɛ raa a nkɔni, a fãrã puruni a bi aruviya ɔ tesi tɛttɔ i pɛli nankɔni. 5 Shɔgbete ɗashariyitɛ i yɛ tosi fãrã puru jo namikɔ, n yɛn zɔ̃yi nii ɓa a labeenɛ suruni ɓa. A Mayɛ ɗekɨn au Ɗajashonɛlapa ni n yɛn tasitɔ wasa-wasa ntɔ i pɛ n ɓɛɛyi.

6 << Shɔu shoo ntanɛ ɗɔnyɛ, u nta vigbete Ɗa Suru geli kn shɔ sisɨn ãnɛyitɔ!

7 << A beeri Ɗajashonɛlapa e kn shɔ sisɨn ãnɛyi a Filadefiya ruum:

shɔm pɛ ruu tɔ̃vɨn au shɛ a shɔ Wɔsɔ-wɔsɔ nyayɛ. U a Dauda saa nyajaani a naa, kɛ ɓeli nyajaanɛ, shɔwɔ kuɓa, kɛ kunɛ shɔwɔ ɓeliɓa. 8 N zɛwɔ vi pɛlinɛ tɛttɔ, n zɛwɔ jaa kaka tɛttɔ; ɔ gɨn vimatinɛtɛ ɔ ã sisɨn tɛttɔ ang biini. N ɓeli nyajaatɛ awɔ ɗekɨn ni, a shɔwɔɔ yɛ kudɔɔɓayɛ. 9 Weshopɛ! Shɔ gãsi gbeteyi japɛ̃pɛ̃ɛ̃ knyɛ, shɔ nyayeenɛyi ai tɔnɛ i pɛ Yahudawayi i sɔ̃n ɓa ikɔ ɓa, n yɛn pɔ̃irɛ i ɓaki a yugboti awɔ dɔɔ. I kpai i yɛ zɛtɔ nɛn ɔrɔɔtɔ. 10 Aru gbete a mɛɛsisɨn a gɨn nya ãsinɛ, n kɔma n yɛn kɔa sɔ̃njo aɗa raaɓoonɛ au kaanɛ a koo yɛ u nta shɔ sisɨn a kotipi piti kpai. 11 N yɛn wari yuuɓa n atɔ. Ɔ kɔ vigbete ɔ wunitɔ aruviya shɔwɔ yɛ raawɔ viɗɔwanɛrɛ. 12 N yɛn pɔ̃ shɔgbete Ɗa kɛ shariyinɛyɛ i ɔ̃ laazã ang Ɗalapa wɛrɛ, i yɛ yaa ɗɔu tɔkɨn ɓa. N yɛn bee n Ɗalapa nii ai bi ang Ɗalapa nii komoo pẽnɛ̃bani, Urushalima sɔɔ, au yɛ nɔ a kolapa ang Ɗalapa ɗɔɔbii. N yɛn bee wɔsɔ̃n n nii sɔɔ ai biini.

13 Shɔu sho kɛ ɔ̃nɛ ɗɔn u wesho a vigbete Ɗa Suru geli kn shɔ sisɨn ãnɛyiyɛ!

14 << A beeri Ɗajashonɛlapa e kn shɔ sisɨn ãnɛyi Laudokiya nɛ:

<<Nkɔ ruu au shɛ a shɔu niinɛ Nankɔ nya yɛm, shɔ sisɨn ãnɛ a shɔ shinɛkɨnti tɔ̃vɨn, ukɔ ɔ̃rɛ gɨn-gɨn vigbete Ɗalapa shɛshi yɛ piti kpai. 15 N zɛa vishonɛ tɛttɔ, a ɓa zaza ko shẽshẽ ɓa. Ang kasinɛ a si ɔ̃kɛ gbete atete niǃ 16 Ama aru gbete a tete, a ɓa shẽshẽ ko zaza ɓa, n yɛn tulaatɔ ang nyani. 17 A shanɛ, <N shɔ vinaa, n toli vitɛttɔ; n vigbete n kasiyɛ aɗɔn kpai.> A ji zɛ ɓa nɛn vi ɓa naani ɓa, shɔraa weze, ntɔ waati a sɔ̃n shɔ nɔɔ gbãti. 18 N gelaa tɛttɔ a woo tarimɛɛ ang naa, tarimɛɛ zalak, nogbete a ɔ̃ shɔvinaa yɛ, a woo wɔsɔ̃n fãrã puru a yɛ tosirɛ a kuki a vini awuni. A woo wɔsɔ̃n gãn nɔɔ a ntee aa nɔɔ nɔgbete a yɛ zɛ ɗɔ awuni tɔ̃vɨn. 19 N lasi shɔgbete n ɔriyɛ n gɔ̃yi yuusho sɔ̃ntɔ, a pɛli tɔ̃vɨn a yaa ruuvini pɛlinɛtɔ. 20 Weshopɛ! Nkɔng shitɛ yɛm a nyajaa n ɗɔ waanɛ; shɔu kɛ ntanɛ kɛ ɓeli nyajaanɛ, n yɛn tou wɛrɛ n shavi a wuni, yɛ sha sɔ̃njo a nkɔni. 21 Shɔgbete ɗashariyitɛ n yɛn ãyi naa i ɔ̃ ang kabii ang lakpati, ji nagbete ɗasharing yɛ dɔdɔrim n ɗɔ ɔ̃nɛ a maye lakpati. 22 <<Shɔu shoo ɗɔn u nta vigbete Ɗa suru kɛ geli shɔ sisɨn ãnɛyinɛyɛ!>>