1 Akɨnti vim, n zɛ Ɗajasonɛlapa wɔ kɛ nɔnɛ a kolapa, u kaka aɗɔn fɛ̃ɛm, u bassinɛ kɔli ɗɔsẽsẽ a kotipi kpai. 2 Ɓanya a gãgãni a shanɛː <<Suu nwesitɛǃ Babila pɛ̃niɓa nwesitɛǃ Dɔdɔrim ɔ̃kɛtɛ rãma a suru kɔ̃linɛyi ɗɔ-ɔ̃nɛ; a zɔng janɔyi kopishɔpiya au ɓa wɔsɔ-wɔsɔ ɓa i ɗɔ-ɔ̃nɛ. 3 Aru shɔtipiyi kpai i masiu bitɛjo a kpantang au pɛliyɛni. Kpati kotipimiyi i pɛli kpantang tɛ awuni, Jalumoo kotipiyi i vinaa batɛ a nyaba gbɔgbɔ ntanɛ au bi.>>

4 Kɛɗɔn n nta yeenya wɔsɔ̃n a kolapa shanɛ,

<< Ɔ shɛnɛ, ɔ n shɔbiiyi! Ɔ shɛnɛ au ɗɔbiini!

Aruviya ɔkɔɔ ɔ̃nɛ au tete ruuvini gbete pɛliyɛni;

ɔ̃tɛ kaka jazɨng akɔrɔ ɔkɔɔ ɔ̃nɛ au ɓuzɨn raaɓoonɛni!

5 Aruviya u ruuvini batɛ bang yɛnɛ kolapa,

Ɗalapa kpasisɨntɛ au vilanɛ au pɛliyɛni.

6 Ɔ pɛliu vijo zali nagbete pɛlɔɔyɛ;

Vigbete pɛlɔɔ yɛ kpai ɔ kɔsiunɔ ɓa ziti.

viɓoonɛ au pɛlɔɔ yɛ,

ɔ yisiu waa ziti u kaka u ɔ̃ zali au ɓɛɛ au pɛlɔɔyɛni.

7 Ɔ tasiu raatɔ fɛ̃ɛm ɔ pɔ̃u sisɨn hɨmri ntanɛ,

nagbete basiu yuuyɛ aru gbete ãu yuu tɔ̃vɨn ntanɛ a jazɛbii.

Aru basiu yuu shali au sisɨn nɛ:

<N pɛ sukpaa ang lakpatiǃ

N ɓa suvɔ ɓa,

n yɛn nta sisɨn hɨmri jo ɓaǃ >

8 Arumkɔ, lee wɔ ɗɔn yukɔnɛ yɛ pɛliutɔ:

ukɔ ɔ̃rɛ vɔrɔ, ɔ̃nɛ sisɨn hɨmri, a vanwo.

shɔyɛ tou a yaa,

aruviya Ɗalapa Uɓeyelapa gbete yeeruu au yuu, vitɛu kaka ɓa.>>

9 Kpati kotipi gbete i pɛli kpantang a gbɔgbɔ jazɛbii a wuniyɛ, i yɛ sɨntɔ i nteemiri au yuu, aɗagbete i kɛ zɛ zɨnri yaa gbete shauyɛnɛ. 10 I yɛ shi ɗɔkpɛlɛ, aruviya i ntaseti ikɔyi ɓooraanɛ awuni a nyazɔɔ, i shanɛ, <<Yukɔnɛ a ɗɔnǃ Yukɔnɛ pɛ̃niɓa aɗɔn! Mɔkaa ɔ̃rɛ koomo pɛniba Babilaǃ Atette dɔɔɗa gbete shɔ tasaaraatɛǃ>>

11 Jalumoo kotipiyi i ɗɔgbete i sɨriuyɛ, i ɗɔ sisɨn hɨmri ntanɛ au yuu, aruviya shɔgbete wooyi vimɛlinɛ tɔkɨn ɓa; 12 shɔgbete au yɛ wooyi tarimɛɛ toɓa, siliva, tari gbeteu saa yuuni, a tari puru; i fãrã tolinɛ, fãrã miizarɛ, fãrã saayi, fãrã mii nweriyɛ, laa sũrũ-sũrũ tot-tot, zɔ̃ng vigbete shɔ tɔ̃ri a Bɔ lagee a ntari, a viu shɔ tɔ̃ri a laa gbeteu saa yuuni, vitarimɛɛ puru, lasaka, a tari tɔ̃vɨn; 13 Laa a shɔ ntee sɔ̃nki shɔ ɓaanɛ sinamo, naa gãsaayi, laa sũrũ-sũrũ zɨnri ɓunɛ, nɔɔ au saa yuuni shɔ ɓaanɛ mur, a nɔɔ sũrũ-sũrũ; mii inabi a nɔɔ, zɨn a nɔwisi, napu a mɛ̃rɛ̃, gbɛntɛnyi a laɓuti, fooyi a shɔzɛ suruyini. 14 Jalumooyi geli suu nɛ, <<Vitɔ̃vɨng gbete a pɔ̃ sisɨn aɗɔn kpai i nitɛ, a vinaa a vibii barikinɛni i nitɛ piti, a yɛ kpaayi tɔkɨn ɓa dangdangǃ>> 15 Jalumooyi ai rii shɔ vinaa tɛttɔ a nyaba lumoo pɛlinɛ a koomo pɛ̃nibau, i yɛ shi kpɛlɛ aru i ntaseti nɛ shɔyɛ tosiyirɛ a ɓusɨng raaɓoonɛ a suu ɓooyɛni, i sɨnrɛ i ntasisɨn hɨmri, 16 i shanɛ, <<Yukɔnɛ ɗɔn! yukɔnɛ aɗɔn aru koomo pɛ̃niɓaniǃ Shɔgbeteu si hã fãrã lili kɔrinɛ tɔ̃vɨnyɛ, fãrã miizarɛ, fãrã nweri, u bariki bi a fãrã tarimɛɛyi, tariyi au saa yuuni-yɛ, a tari puru. 17 A dɔɔɗa gbete u vinaayi kpai i nirɛǃ>>

Yupɛ̃ni latosi pɛ̃nibayi, a shɔgbeteyi isi ɓuzɨn latosiuni, a shɔ latosi zaanɛyini a gãsi shɔgbeteyi kpayi vishaanɛ a wapo kpai, i shi kpɛlɛ, 18 i sɨnrɛ, aɗagbete i zɛ zɨnri yaa au shaa koomouyɛː i shanɛ, <<Koomo wɔ ɓa naa koomo pɛ̃niɓan niɓaǃ>> 19 Kɛɗɔn i nteli zaburu ai yuu i ɗɔsɨnnɛ a sisɨn hɨmri ntanɛni, i ɗɔ shanɛ nɛ, <<Yukɔnɛ a ɗɔnǃ yukɔnɛ aɗɔn aru koomo pɛ̃niɓamniǃ Koomo gbete shɔ latosi pɛ̃nibayi kpayi vinaayi jo au tete vinaayikɔ! Ama dɔɔɗa gbete viwiyi nitɛ kpaiǃ >>

20 Ɔ nta yɛti purutɔ shɔgbete ɔ ɔ̃ a kolapa aru gbeteu lɛsiyɛni, shɔ wɔsɔ-wɔsɔyi ɔ nta yɛti purutɔ, jashonɛyi a janyagadiyini! Aruviya Ɗalapa lɛsi Babila tɛ ayuu vigbete pɛlɔɔyɛni!

21 Kɛɗɔn Ɗajashonɛlapa wɔ pɛ̃niɓa u kaka ɗɔn fɛ̃ɛm tuu tari pɛ̃niba au banɛ a tari vinanɛni zali a lokirɛ a wapo a shanɛ, <<Jinankɔ a kakani shom nɔgbete shɔyɛ loki koomo pɛ̃niɓa Babila yɛ, shɔyɛ zɛu tokɨn ɓa. 22 Shɔyɛ nta hmtaa waanɛ tokɨn aa yɛtini ɓa, shɔ soo tɔ̃nɛ, vigeenɛ, gãnti geenɛ, shɔ yɛ ntayi tɔɓaǃ Shɔyɛ kpaa jalumoo wɔ ko zɔ̃ng shɔpiya tɔkɨn aa yɛtini ɓa. Shɔyɛ nta vinanɛ kanɛ tokɨn a yɛtini ɓa. 23 Shɔyɛ zɛ ɗɔsẽsẽ pitila tokɨn aa biini ɓa; shɔyɛ nta shɔ gbete tɛ su soo a shɔ gbete tɛ vɔshɔ sɔɔ i yeenya tokɨn aa yɛtini ɓa. Si jo jalumooyikɔ i kakani ayuu kotipini, ji aa vilansi nyayeekɔ a ɗaki shɔ kotipirɛ kpaiǃ>>

24 Shɔ lɛsi Babila aru gbete shɔ kpaa janyagadiyi a shɔ wɔsɔ-wɔsɔyi kpaa a koomouni, nn aru shɔgbete shɔ nyokiyirɛ i kpaa a kotipi kpai.