1 Kɛɗɔn n zɛ viɓili kɛ shɛnɛ a wapo. U lagee kopi, u yuu manzii; ko-pi lagee shɔpiya wayu kpati aɗɔn kopi, ko-pi yuu shɔpiya nii a ɗɔnni au n ti Ɗalapa bassinɛ ɓayɛ. 2 Viɓiliu shɛ zɔ a gbẽẽ, u dɔɔ pɛ̃niba shɛ̃nti aɗɔn u nya naa zinggang nya. Sɔɔ pɛ̃niba ã viɓiliu u kakarɛ, au lakpatini, wɔ̃sɔn u kaka kiririni. 3 Atette viɓiliu yuu gbete, naa shɔ waatɔ au yɛ n-tiu vɔnɛyɛ, ama ɗɔu gatitɛ. Viɓili ã shɔzɛ kpai vibiizanɛ i gɨukɛ a knti. 4 Kopiya bassi sɔɔ pɛ̃nibautɔ aru ã viɓiliu u kakatɛ, i bassi viɓili sɔ̃njɔ, i shanɛ nɛ,<<Pi shɛ zɔ a viɓilini piya? Pi zɛnɔ bawaanɛ awuni piya?>>

5 Viɓiliu shɔ yaaurɛ nɛu nwanya yuu bassinɛ au n ti Ɗalapa bassinɛ ɓa, shɔ yaaurɛ u tasi u kaka yɛnɛ shɛlɛ laaziti atu ziti. 6 Kɛɗɔn gaa Ɗalapa nii lɛsinɛrɛ, a ɗɔgbete ɔ̃ a ɗɔnniyɛ, a shɔ gbeteyi ɔ̃ a kolapayɛni kpai. 7 Shɔ yaaurɛ u waaba a Ɗalapa shɔbiini ɗausharirɛ ai yuu, shɔ ãu kakarɛ u sã ko-pi laduru shɔpiya, tipi, nyakoyini a shɛ̃ɛ̃shɔzɛyini. 8 Shɔzɛ gbeteyi ɔ̃ a kotipi kpai i bassi viɓiliutɔ, see shɔ gbete kotipi ɓɛɛ shɛnɛ shɔ bee nii tɛttɔ a labeeni suruni i pɛ Ɗa jamɛrɛ̃ ɓɛɛ au shɔ nyoyɛ.

9 <<Ɔ wesho pɛ, shɔu sho ntanɛ aɗɔn u ntarɛ, 10 Shɔ gbete Ɗalapa kɛ lɔnɛ nɛu to jahm, yɛ to jahmtɔ; shɔ gbete Ɗalapa kɛ lɔnɛ nɛ shɔu nyou a nyaba zali, yɛ vɔ jo a nyaba zali, vim kã Ɗalapa shɔbiiyi ɔ̃ shɔ sisɨnmɛnɛ a shɔ sisɨn ãnɛ.>>

11 Kɛɗɔn n zɛ viɓili wɔrɛ, au shɛ a tipi, u lageeyi ziti naa jamɛrɛ̃ lageeyi, u nyanwanɛ naa sɔɔ pɛ̃niba nya. 12 Shovi-shonɛ a kaka pɛ̃niba gbete viɓili ɗekɨn sho a wuniyɛ a viɓiliu ɗekɨn. A pɔ̃rɛ kotipi a vi gbeteyi ɔ̃ a ɗɔnni kpai i bassi viɓili ɗekɨn, kɛ shɔ gbete u nɔrɔ gati tɛttɔyɛ. 13 Viɓili au pɛsim pɛli vibiizaanɛyi pɛ̃niba; pɔ̃rɛ yaa nɔ a kolapa a ntee a tipi shɔ zɛ piti. 14 Aru vibiizaanɛ gbete shɔ yaaurɛ nɛu pɛli a viɓili ɗekɨn u ɗɔbii, kpaa kakarɛ a ɗaki shɔ gbeteyi ɔ̃nɛ a kotipi kpai. Viɓiliu geliyi nɛ i maa jasuru aru i bassi viɓili au shɔ ntariu nɔrɔ a zali ama u doo ɗɔɔ ɔ̃nɛ a suruni. 15 Shɔ yaa viɓili pɛsinɛurɛ kpaa kaka gbete ã jasuru viɓili ɗekɨn ɔ̃kinɛ sururɛ, nɔgbete jasuru u nwanya, u nyoki shɔgbeteyi bɛ̃ɛ̃ u bassinɛ kpai. 16 Viɓiliu pɔ̃si kopiya vibeenɛ a nakɨn ko i nɔkɨn, wujaa a pɛ̃nibani, shɔvinaa a shɔraani, foo a jalaajaani 17 pɛli nankɔ aru shɔwɔ u zɛnɔ viwɔ woonɛ ɓa ko mɛlinɛ ɓa see shɔu nɔmba aɗɔn, kɛ viɓiliu nii, ko nɔmba gbete shi ayuu viɓili niiyɛ.

18 Vim kã sẽrẽ. Shɔgbeteu ruu kpẽnɛ aɗɔn yɛ shɛshi dɔɔ ruu nɔmba viɓilintɔ, aru nɔmbau shi pɛ ayuu shɔwɔ nii, u nɔmba ukɔ ɔ̃rɛ 666.