1 A gadi zɨɨnkɔ yupɛ̃ni shɔlansi, a shɔpẽni dɔlayi wɔsɔ̃n shɔmala nyaãsinɛ a kpati shɔvi shoneyi piti kpai i ma rɛ, i sã Yesɔ a n-tiu Bilatu dekɨn.

2 Bilatu hɨ Yesɔ nɛ,<<Mɔkaa ɔ̃rɛ kpati yahudawa ya? Yesɔ risiu nya nɛ.

<<Mɔkaa shajo.>>

3 Yupɛ̃niyi i yeri Yesɔ nya ayuu tot-tot. 4 Toti Bilatu hɨ Yesɔ nɛ,<< A yɛ kasi nya ɓaya? Ayuu ruugbete shɔmiyi i shali āā yuum ni baya?>>

5 Ama Yesɔ ji risi nya ɓa, vibii zaa sã Bilatu kɛtɔ.

6 Ai nakoo koopi saa shɔpiya a ɗaa yumusinɛ pasika Bilatu yasiyi shɔ jaahm naa gbete shɔgbete i kasiyɛ. 7 A ɗauni jawɔɔ ɗɔn shɔ bau nii nɛ Barnaba shɔ ɓai a jaahm a shɔ yuvɔɔ nyonɛyi a ɗɔzɔ, aɗagbete shɔ yusi nya yɛ. 8 Kɛɗɔn mɔɔyi ɓa nya a Bilatu bi u pɛli vigbete pɛliyɛ siyɛ ko saa shopiya aɗa yumusinɛ pasika.

9 Bilatu hɨyinɛ<<Ɔ kasinɛ n yasɔɔ Yesɔ kpati yahudawa naa ya?>> 10 Aru si Bilatu zɛtɛttɔ nɛ yupɛ̃ni shɔlansiyi n ti Yesɔ au ɗɔbii si ɓa a sisɨn gbete ɓa. 11 Ama yupɛ̃ni nyanwaanɛ jaa Ɗa i kpɛ̃ri mɔɔyi nɛi geli Bilatu nɛu yasiyi Barnaba naa.

12 Bilatu hɨ nɛ,<<Ɔ kasinɛ n pɛli pikovi a jaa gbete shɔ baunɛ kpati yahudawa ni viya? >> 13 Shɔwiyi i risi nya a kakani nɛ, <<Ɔ bau naa laa. >>

14 Bilatu kasi nya nɛ, <<Aru iviya? Pɛli vikɔ̃linɛu piviɗɔkɔ viya?>>

Ama i piti kpai i ɗee nya a kakani nɛ, << Ɔ bau naa laa. >>

15 Aru gbete Bilatu kasi nɛ mɔɔyi i nta sisɨn puru, a yasiyi Barnaba naa rɛ. kɛɗɔn Bilatu ã sojayi i naarɛ nɛi waa Yesɔ, nɛi sã Yesɔ i bau naa laa.

16 Kɛɗɔn sojayi sã Yesɔ yɛnɛ Bilatu jarunwanɛ a gãsi ɓɛzɔɔ sojayini kpai. 17 Kɛɗɔn sojayi tuu kpɛnti fãrã gbete naa kpati ɓɛɛ i hãsi Yesɔ abi ai tɔ̃ri salabu kɔkkɔ i hãsi Yesɔ a yuu. 18 Kɛɗɔn sojayi i waa dɔɔ i ɗiurɛ naa nɛ, << Ɗa u yasi kpati yahudawa suru ɗɔnǃ>> 19 sojayi waa Yesɔ ayuu a labàà, i tuluu susãri abi, i sɔ̃si au ɗekɨn nei bɛliutɔ. 20 Naa sojayi yisi Yesɔ nya ãrinɛtɛ, i zɔ̃ fãrã nwerirɛ a Yesɔ biini, i tosi Yesɔ kɛjo u fãrã bi. Kɛɗɔn i shɛshiu bili kɛkn nɛ shɔ bau naa laa.

21 Siman shɔ Bakurani, Alezanda a Rufu i ɓeye, u ɗɔɔ tɛɛnɛ shɛ a tipi Bakurani sojayi i pɔ̃u rɛ nɛu tusi Yesɔ laagbete shɔ ɓau naa aɗɔnyɛ. 22 Kɛɗɔn i n ti Yesɔ yɛnɛ ɗɔwɔɔ shɔ ɓanɛ gɔligɔta, (ɗɔgbete shɔ toli zɔ̃pu ɗɔnyɛ) 23 I ã Yesɔ mii laa inabi shɔ rãa a muri, ama ji boo ɓa. 24 Kɛdɔn sojayi ɓaa Yesɔ naa rɛ laa, i tuu fãrã bi i vasirɛ ai nɔɔ, ama i nta laapaa au yuuni, nei zɛ vi gbete kopiya yɛ kpaayɛ pɛ.

25 Soja i ɓaa Yesɔ a laa si dɔɔɗa ntatɛ mangnɛ̃ɛ̃ shɔ gadii. 26 Ruu kɔ̃linɛ gbete shɔ bee ayuu nɛ pɛliyɛː KPATI YAHUDAWAYI. 27 Sojayi i ɓaa Yesɔ naa laa a ɓɔɔyini ziti gbete a Yesɔ nakɨn wɔɔ au nagãng. 28 (Shomkɔ yisinya vigbete shɔ ɓee a Ɗalapa nya ruubii ɔ̃ nizɛ nɛ, <<Shɔ gau tɛttɔ atette shɔ ruuvinini.>>) 29 Shɔgbete tɛri a nyabauyɛ, i ɗɔgbete ãri Yesɔ nya, i zɨnti yuu i shanɛ, << Ahaǃ shɔgbete a ɓaanɛ nɛn zɨnli jaa Ɗa a maa sɔ̃n a lee taati, 30 Nɔnɛ ayuu laauni a Raa a yuurɛǃ>> 31 Jinankɔ yupɛ̃ni nyanwaanɛ jaa Ɗa a shɔmala nya ãsinɛ i ãri Yesɔ sɔ̃njo i shanɛ, <<Raa shɔwɔyi tɛ, ama ji zɛu nɔɔ yuu raanɛ ɓaǃ 32 U zɛ Kirisi kpati Isireila pɛ, nɔnɛ yuu laauni dɔdɔrim, u kɛ zɛnɛ nɔtɛ u yɛ ã sisɨntɔ au biini!>>Ɓɔɔyi gbete shɔ ɓau naa laa a wuniyɛ i ɗãu sɔ̃njo.

33 Atette niti ɗɔkɨnri kuki tipiu piti kpai yɛnɛ ɗarɛ. 34 Aɗagbete si dɔɔɗa ntatɛ mangnɛ̃ɛ̃ Yesɔ ɗee nya a kakani a shanɛ, <<Eloi, Eloi, lama sabatani? >> Ukɔ ɔ̃rɛ nɛ,<<N Ɗalapa, n Ɗalapa a risin knti pi ruu iviya?>> 35 Shɔgbete i shi a ɗɔu i nta nam i shanɛ, <<Ɔ weshopɛ kɛ ɓaa Iliya nya nɛ.>> 36 Shɔzɛ gbete ai tetteni yurɛ tuu soso a lu mii gbari, ma sosou a labaa, a ã Yesɔ nɛu ɓoonɛ, a shanɛ, <<Ɔ yaupɛ u zɛpɛ ko Iliya yɛ nɔsiu kati ayuu laauni ya?>> 37 Kɛɗɔn Yesɔ sɨn-nyavɔ a kakani a vɔrɛ. 38 Fãrã nyajaa wɛrɛ Ɗa ntáá ɗɔɔ ziti gaa apaa ahãsi adi. 39 Yupɛ̃ni soja au si ɗɔuniyɛ zɛ nɔgbete Yesɔ vɔɔyɛ, a shanɛ, <<Nizɛ kɔ jam upɛ Ɗa jaa kɔ!>> 40 Suu gãsiyi i shii aɗɔ kpɛlɛ i ɗɔɔ zɛnɛ, atette si Mariyamu suu magdala a Mariyamu Yakubu wujaa ɓini a Yusufu ɓɛzɔ̃ wujaa wɔsɔ̃n Salomi. 41 Ikɔyi suu gbete i gɨn Yesɔ adɔɔ, a ɗagbete Yesɔ u si Galili yɛ, i sã Yesɔ tɔ naka-ziti. suu gãsi waanɛ gbete i gɨu adɔɔ yɛnɛ Urushalima.

42 Vim piti kpai pɛli adii gbete shɔ mabii shɔ to lee susunɛ, si ɗaɗɗarɛ pɛlitɛ māāni. 43 Yusufu shɔ Arimatiya upɛ shɔ tɔ̃vɨn atette shɔpẽni gbete shɔ ntau nyatɔ a tipiuni yɛ, ji nta seti ɓa, yɛ Bilatu ɗɔbii nɛu yasin nyaba nɛn tuu Yesɔ vɔrɔ pɛ, Yusufu u si ɗɔɔ ganɛ nɛn zɛ leegbete Ɗa roo kpati yɛ. 44 Viu ã Bilatu vibii zaanɛ, ji ã sisɨn ɓa nɛ Yesɔ vɔtɛ ɓa, a ɓaa yupɛ̃ni soja nya a hɨunɛ, Yesɔ vɔɔ siji tɛ̃ɛ̃-tɛ̃ɛ̃ ya? 45 Naa Bilatu ntatɛ a yupɛ̃ni soja nya nɛ Yesɔ vɔtɛ, kɛɗɔn Bilatu geli Yusufu nɛ yɛnɛ atu vɔrɔ rɛ. 46 Yusufu woo làá vɔrɔ gbãnɛ gbete shɔ ɓaunɛ lili, kɛɗɔn Yusufu nɔsi Yesɔ birɛ ayuu laani a kukirɛ a làáuni, a gbã a sàà gbete shɔ gbã agogo tari yɛ, a giri tari a kunya sàà u awuni. 47 Mariyamu suu magdala a Mariyamu Yusufu ɓini isi ɗɔuni nɛi zɛ ɗɔgbete shɔ gbã Yesɔ pɛ.