1 Akɨnti lee susunɛ a ɗadarɛ Mariyamu suu magdala a Mariyamu Yakubu ɓini wɔsɔ̃n Salomi i yurɛ i woo nɔɔ sũrũ-sũrũ aru nɛi pmri Yesɔ abi: 2 A gadi zɨɨnkɔ alee susunɛ aɗagbete ɗa shɛyɛ i yɛ saau rɛ. 3 A nyaba yɛnɛ saau i hɨ zɔnɛ,<<piyɛ giriu tari pi a nyɛ saau ni piya?>>

4 Naa i ɗee nɔɔtɛ i zɛrɛ shɔ giri tariutɛ kagbete, si tari pẽniɓa. 5 Naa i to yusààutɛ i zɛ jakasa wɔɔ ɔ̃tɛ kagbete a fãrã puru a yusàà, kɛɗɔn i zaa kpak-kpak.

6 Ama, ɗajashonɛlapa geliyi nɛ, << Ɔkɔɔ zaanɛ n zɛtɛtɔ ɔ kã Yesɔ shɔ nazara gbete shɔ ɓau naa a laa yɛ, u ɓa ɗɔni ɓa, yulapatɛǃ nɔgbete shayɛ, ɔ kɨnnɔɔ nɛ ɗɔgbete shɔ yɔu ɗɔn yɛm. 7 Dɔdɔrim ɔ yɛnɛ ɔ geli Yesɔ jaɗɔyi a Bituru ni nɛ yulapatɛ, ɔ yɛ kpau awɔ ɗekɨn yɛnɛ tipi Urushalima, ɔ zɛu aɗɔwakɔ nɔgbete shayɛ.>>

8 Kɛɗɔn suuwiyi shɛ a yuààu a yunɛ, i bi ɗɔɔ zaanɛ i sisɨn ji roo ɓa. I ji geli shɔwɔɔ ɓa aru gbete seti sãyitɔ.

9 Akɨnti gbete Yesɔ yulapa a sàà shɔgbete gaa Yesɔ zɛnɛ pɛ Mariyamu suu magdala, suu gbete Yesɔ shɛshiu rãman maanzii a bi yɛ. 10 Mariyamu suu magdala yɛ Yesɔ jaɗɔyi ɗɔbii a kpai a ɗɔɔ lɛrinɛ a sɨnɛni. 11 Ama naa Mariyamu suu magdala geli Yesɔ jaɗɔyi tɛ nɛn zɛ Yesɔ tɛ ang nɔɔ ni, iji ã sisɨn ɓa au nyani ɓa.

12 A kɨnti ni Yesɔ shɛ au jadɔyi ziti bi a nyaba tot-tot, aɗagbete i si nyaba tipi Urushalima yɛnɛ. 13 Kɛɗɔn i sɔrɛ a geli zɔ̃ gãsi rɛ, ama i ji ã sisɨn ɓa ai nyani ɓa kɔjo.

14 Toti Yesɔ shɛ au jadɔyi kopi tu gbete bi aɗɔgbete i si ɗɔɔ vishaanɛ, kɛɗɔn Yesɔ lasirɛ aru gbete i sisɨn ãnɛ ɓa a yulakinɛ gbete i tasiyɛ, aru i bɛ̃ɛ̃ tɔ̃vɨn ãnɛtɔ a shɔ gbete zɛ Yesɔ yutɛ suruni a sàà i nya.

15 Kɛɗɔn Yesɔ geliyi nɛ,<< ɔ yɛnɛ a koo piti kpai ɔ nwari shɔ n nya ruubii, 16 Shɔgbete kɛ ã sisɨn nɛ ang bi nɛ shɔu pɛlin batizima shɔyɛ rautɔ, ama shɔgbete kɛ bɛ̃ɛ̃ nɛ yɛ raa naa ɓa. 17 Shɔgbeteyi kɛ ã tɔ̃vɨn nɛ ang nii iyɛ pɛli vibii zaanɛ tɔ, iyɛ zɛnɔɔ rãmã shɛshinɛ tɔ ang nii ni, iyɛ zɛnɔɔ nyakoo wɔɔ nwanɛtɔ. 18 I yɛ tuu sɔɔ a naa ko i ɓoo vizɔ yɛ pɛli viwɔ ɓa, i yɛ zɛnɔɔ naapɔ̃nɛtɔ a shɔvɔrɔyi bini i yɛ gatitɔ tɛ̃ɛ̃ti.>>

19 Akɨnti gbete Ubeyelapa yisi nyanwanɛ tɛ ayiniyɛ, kɛɗɔn Ɗalapa tuurɛ yɛnɛ kolapa a ɔ̃ a au nakɨn. 20 Kɛɗɔn Yesɔ jadɔyi i yɛ ko piɗɔpiya a koo i ɗɔgbete i nwari shɔ Ɗalapa nya ruubii yɛ, Ubeyelapa u si ayini, i ɗɔgbete i pɛli vibii zaanɛ gbete Yesɔ ãi kaka nɛi pɛliyɛ.