1 Toti Yesɔ gaa vimatinɛ a nya wapo Galili. Moo gbeteyi toli au ɗɔbii i si bang, kɛɗɔn yurɛ a to yɛti latosi a wapo a ɔ̃rɛ ɗɔn, mooyi shili kɛ nya wapo. 2 Yesɔ mati sho vi waanɛ pɛlivishonɛ a ruɓusinɛ, a geliyi nɛ.

3 <<Ɔ weshopɛ! Lewɔɔ ɗɔn shɔwɔɔ tuu zɔvi a yɛ ɗɔ zɔnɛ au jaa. 4 U si ɗɔ zɔvi zɔnɛ a jaa, zɔvi gãsiyi shishi a nyaba janoyi nyekirɛ i sharɛ. 5 Gãsiyi shishi a tipi ɗɔ tari, aɗɔgbete tipi si ɓa bang ɓa. Zɔviu taa gbãgbã, aru tipiu siɓa gbikiri-gbikiri ɓa. 6 Kɛɗɔn, naa ɗaa tootɛ, a too vishaurɛ, vishau watirɛ aru u gɨnri siɓa bang ɓa. 7 Gãsiyi zɔvi shishi atette kɔkkɔ, naa batɛ kɔkkɔ maurɛ i jo shɛshi nɔɔ ɓa. 8 Ama zɔvi gãsiyi shishi a tipi tɔ̃vɨn, vishau tarɛ, a barɛ, shɛshi nɔɔ rɛ, zɔvi shɛrɛ gãsiyi wɔsi bmati atu kopi (30), wɔsi laa taati (60), wɔsi laa maani (100).>> 9 Yesɔ yisinya ruu shanɛ nɛ, <<Ɔ weshopɛ, Shɔu sho ntanɛ aɗɔn, u ntarɛ.>>

10 Aɗagbete Yesɔ u si a yɔbm, u jadɔyi a shɔwɔyini i yɛu ɗɔbii i hɨu nɛ, tasiu dɔɔ ruu gbete a sha a ruɓusinɛm pɛ. 11 Yesɔ kasiyinyanɛ,<<Shɔ tasɔɔdɔɔ ruɓusinɛ tɛttɔ aru Ɗalapa lakpati ɔ̃nɛni ama n mati shɔgbeteyi ji ã sisɨn ɓa a Ɗalapa lakpati ɔ̃nɛni ɓa vi ɓɛɛjo a ruɓusinɛkɔ sheeli,>> 12 aru gbete,

<<I taa nɔɔ, i taa nɔɔ

ama i zɛ viɓa,

i wesho, i wesho

ama i nta ruuɓa;

aru ikɛ ntanɛ ikɛ zɛnɛ iyɛ sɔɔrɛ i gɨn Ɗalapa tɔ,

Ɗalapa yɛ yasiyi ruuvinirɛ!>>

13 Kɛɗɔn Yesɔ hɨyinɛ, <<Ɔ ji zɛ dɔɔ ruɓusinɛm ɓaya? Ɔ yɛ zɛ ruɓusinɛ gãsi kɛpikoviya? 14 Zɔvi gbete shɔviɓaanɛ ɓaayɛ uko ɔ̃rɛ Ɗanyaruubii. 15 Shɔwɔyi naa zɔvi gbete shishi a nyaba, ikɔyi ɔ̃rɛ shɔgbete ikɛ nta Ɗaruubiinɛ tɛ̃ɛ̃ti i tɛ gbãgbã, japɛ̃pɛ̃ɛ̃ arɛ tuu vigbete shɔ ɓaa ai sisɨn kati. 16 Shɔwɔyi naa zɔvi gbete shishi aɗɔ tari yɛ, naa i nta Ɗaruubiitɛ tɛ̃ɛ̃ti i tɛ a sisɨng puru. 17 Ama ruu gɨnri si ɓa gbikiri-gbikiri ai sisɨn ni ɓa, jo ɔ̃ ɓa sɛ̃nɛnɛni ɓa. Aɗagbete yukɔnɛ ko raatasinɛ kaanɛ ayuu ruukɔ, i yaa Ɗanyaruubii bɛtɛk. 18 Shɔwɔyi naa zɔvi gbete shishi atette kɔkkɔyɛ, ikɔyi ɔ̃rɛ shɔgbete ikɛ nta Ɗanyaruubiinɛ; 19 Aru vi kasinɛ a koo ai sɨsɨng bang, vinaa kãnɛ a vi gãsi kãnɛ, raa ruu Ɗalapa rɛ ai sɨsɨng ni, i ji yee jaa ɓa. 20 Shɔwɔyi naa zɔvi gbete shishi a tipi tɔ̃vɨn, ikɛ nta Ɗanyaruubiinɛ, i tɛrɛː zɔvi shɛrɛ u yee jaa bmati atu kopi (30), wɔɔ laa taati (60), wɔsɔ̃n laa maani (100) ayuu vi gbete i zɔyɛ.>>

21 Yesɔ yɛ ɗekɨn, a shanɛ,<<Shɔgbete yɛ dɔɔ pitila u sɨng a gooti laɔ̃nɛ ko a gooti laroonɛ yɛ piya? Ama shɔ dɔɔ pitila shɔ pɔ̃ ɓa au ɗɔ ɔ̃nɛ ɓayɛ?. 22 Vigbete shɔ kɛ ɓusinɛ shɔ yɛ shɛshi ɓilitɔ, vigbete shɔkɛ rɛunyanɛ shɔyɛ ɓɛlitɔ. 23 Shɔ gbeteu sho ntanɛ kɛ ɔ̃nɛ ɗɔn a ntarɛ.>> 24 Yesɔ geliyi wɔsɔ̃nnɛ <<Ɔ pɔ̃ sisɨn a vigbete ɔ ntayɛniǃ wàá gbete ɔkɛ masi shɔ vinɛ awuni, shɔ masɔɔ jo aukɔ ko u tɛɛtɔ. 25 Shɔgbeteu vinaa ɗɔnyɛ shɔ ã vi jo ukɔ ɓang, shɔgbeteu ɓɛɛ ɓa ɗɔm ɓa, jaavi gbeteu a wuniyɛ shɔ tɛkati au naani.>>

26 Yesɔ yɛ ɗekɨn a ruu shanɛni nɛ,<<Ɗa lakpati ɔ̃nɛ naa shom; Jawɔ zɔ zɔvi au jaa. 27 Roo nɔro a zɨmba a yurɛ, zɔviu tarɛ a barɛ. Shɔm piti kpai ji zɛ nɔgbete i bayɛ ɓa. 28 Pɛ tipi pɔ̃rɛ visha barɛ shɛshi jaa rɛ, gaa banɛ au shɔ, kɛɗɔn kɛu yuu, a kɨntiuni piti kpai shɛshi kɛ nɔɔ. 29 Naa vishau kɛ zɔ̃nɛ, shɔ jau tu gesi u yee awuni aru ɗaa vi yeenɛ pɛlitɛ.>>

30 Toti Yesɔ hɨnɛ<<U yɛ shakɛnɛ ivi aru Ɗa lakpati ɔ̃nɛni viya? U yɛ shakɛ ruɓusinɛ gbete piya u taudɔɔrɛ viya? 31 Ruɓusinɛu ɔ̃ naa shom, Shɔwɔ tuu zɔvi gbete shɔ ɓaanɛ masita, ukɔ ɔ̃rɛ pẽtẽrẽ atette zɔvi a koo piti kpai, jau ɓarɛ au jaa. 32 Kɛɗɔn barɛ a tɛɛ laa gãsiyirɛ, pɛli nalaa pɛ̃niba- pɛ̃niba nɔgbete janɔyi kɔri jaa au sutuni.>>

33 Yesɔ nwari shɔ u nyaruubii, pɛlivishoni a ruɓusinɛ totto; nɔgbete i yɛ zɛyɛ. 34 A geliyi vi piti kpai a yɛti ruɓusinɛ. Ama a ɗagbete u si au jadɔyini tasiyidɔɔ ruum gbete gbete.

35 A diuni a ɗaɗarɛ Yesɔ geliu jadɔyi nɛ,<<U tɛɛ nya ɓooti danɛ.>> 36 Kɛɗɔn i yaa mooyirɛ a knti; Yesɔ jadɔyi to yɛti latosi gbete Yesɔ ɔ̃ ɗɔnyɛrɛ, latosi seyirɛ a nyazɔ. Gãsi latosi i si jo ɗɔuni. 37 Tɛ̃ɛ̃ti naa i gaa yɛnɛtɛ sɔrɔ miibuu dusirɛ, si jaagoo miiu kɛ to yɛti latosiu nɛ, si kɛ yinɛ a miini. 38 Yesɔ u si ɗɔ nororoonɛ a kɨnti latosi, pɔ̃ yuu a laayupɔ̃nɛ. U jadɔyi i nisiurɛ i hɨunɛ, Shɔmala, u ɓa lunɛtɛ a mii maani, yuu ji waaɓa a ukɔni ɓaya?

39 Yesɔ yulapa a ãsi sɔrɔ nyarɛ, <<Ɔ̃nɛ shok!>> A geli mii nɛ, <<Shi kiri-kiri! Miiu shirɛ.>>

40 Kɛɗɔn Yesɔ hɨu jadɔyinɛ,<<Ɔ ntaa seti iviya? Anɛ dɔdɔrim ɔ sisɨn ãnɛ ɓaya?>>

41 Seti pɛliyi waanɛ i gaa zɔ hɨlinɛ nɛ, Shɔm ɓɛɛ piya? Sɔrɔ a jaagoo mii waponi piti i ntau nyatɔ!