1 Gãsi Farasiyayi a shɔmala nya-ãsinɛ Musa i a, a Urushalima i toli nya a Yesɔ ɗɔbii. 2 I kɨnnɔɔ i zɛrɛ Yesɔ jaɗɔyi gãsi i shaa vishanɛ a naa gbete <<ɓa wɔsɔ-wɔsɔ ɓa,>> ukɔ ɔ̃rɛ iji sɔɔ naa ɓa nagbete Farasiya i matiyi shɔ yɛ, ji nɔgbete i nyakoo matiyi yɛ. 3 ( Farasiyayi a shɔ Yahudawayini piti kpai i shaa vishaanɛ ɓa setɛyi sɔɔ naa tɛttɔ, i gɨn jo i nakoo gbete i shɔpɛ̃ni i matiyiyɛ. 4 Piti a vigbete i a awuni a lumɔɔni i shaa ɓa setɛ i sɔɔtɛ. I vikoo wɔɔyi sɔ̃n aɗɔn gbete i gɨnyɛ tottot, naa jawaa sɔlinɛ, a ɓariyi, wɔsɔ̃n kpariyi sɔlinɛ a sirini.

5 Kɛɗɔn Farasiyayi a shɔmala nya-ãsinɛ Musa i hɨ Yesɔ nɛ,<<Aru ivi a jadɔyi i gɨn vi nakoo gbete shɔpẽniyi mati shɔyɛ ɓa, ama i shaa vi a naa gbete<ɓa wɔsɔ-wɔsɔ ɓa>viya?>>

6 Yesɔ risinyanɛ,<<vigbete Ɗa jashonɛ Ishaya sha si awɔ yuu pɛ nizɛ, ɔpɛ shɔ-shɔ ɗakinɛyi kɔ; nagbete laabeenɛ shayɛ:

<< <Shɔmiyi i basing ɓɛjo a nyalapa kɔ sheeli,

ama i sisɨn kpɛlɛ ang ɗɔbiini.

7 I gɨn n ɓɛɛjo waati weze;

I mati shɔ ɓɛɛjo nya-ãsinɛ shɔzɛ vi pɛlinɛ ɓa Ɗalapa ɓɛɛ ɓa!>

8 Ɔ yaa Ɗalapa nya-ãsitɛ ɔ gɨn ɓɛɛjo ɔ nakoo, vigbete shɔzɛ mati shɔyɛ.>>

9 Yesɔ yɛ ɗekɨn ai gelinɛni nɛ:<<ɔ zɛnɔɔ Ɗalapa nya-ãsinɛ yaanɛtɛ kagbete ɔ nɛi gɨn ɔ nakoo! 10 Musa shanɛ,<Ɔ bassi meyeutɔ a miniuni,>toti, <shɔgbete kɛ sha ruu kɔ̃linɛ nɛ a ɓeye yuu ko mini yuu ɔ̃tɛ lakɔrɔ shɔu nyou vɔrɔtɔ.> 11 Ama ɔ mati shɔ vinɛ nɛpɛ tɔ̃vɨn shɔu yaa ɓeye a minini aɗagbete iɗɔ raatasinɛ, nɛ tɔ̃vɨn shɔu ãvipɛ Ɗalapa:<vigbete ɔ si kpaa ang ɗɔbii piti kpai n teetɛ n ãkɛ Ɗalapa,> 12 nankɔ ɔ zãri shɔtɛ nɛ shɔkɔ pɔ̃si ɓeye a ɓini naa nɛ a vini. 13 A nyabankɔ vigbete ɔ mati shɔ nyo Ɗalapa nya ruubiitɛ. viwɔyi sɔ̃nji aɗɔn waanɛ gbete ɔ pɛli nankɔ.>>

14 Toti Yesɔ ɓaa mɔɔ nyarɛ a geliyinɛ, kopiya u weshopɛ ang nya, ɔ zɛ tɔ̃vɨn. 15 Ɓa vigbete shɔ shaarɛ a nya ukɔ pɔ̃rɛ shɔ ɔ̃ <<ɓa wɔsɔ-wɔsɔ ɓa,>> a Ɗalapa ɗekɨn rɛ niɓa, pɛ vigbete shɛ a shɔ sisɨn ɓusɨn ɔkɔ pɔ̃rɛ shɔu ɔ̃ ɓa wɔsɔ-wɔsɔ ɓa a Ɗalapa ɗekɨn.

16 Shɔgbete u sho ntanɛ aɗɔn u ntapɛ tɔ̃vɨn.

17 Akɨnti gbete Yesɔ yisi mɔɔyi vi matinɛtɛ, tokɛ yɛti wɛrɛ, u jaɗɔyi i hɨ ruu nɛu tasiyidɔɔ ruɓusunɛ gbete shayɛ pɛ. 18 Yesɔ risinyanɛ,<<Ɔ ang yusẽtɛ ɔkɔma ɔji zɛ vigbete n shayɛ ɓaa? Ɔji zɛɓa nɛ, ɓa vigbete shɔ tosi a yɛti, ɓa ukɔ pɔ̃rɛ shɔzɛ u ɔ̃ <Ɓa wɔsɔ-wɔsɔ ɓa.> 19 Aru vishaanɛ toɓa shɔzɛ sisɨn ɓa ama u yɛti ɓuzɨn, kɛɗɔn yɛ shɛ ɓili kɛkn.>>(Yesɔ sha vim, u tasinɛ vishaanɛ piti kpai pɛ, <<Vi wɔsɔ-wɔsɔ.>>

20 Yesɔ yɛ ɗekɨn a shanɛni nɛ:<<Vigbete shɛ a shɔ sisɨn ukɔ pɔ̃rɛ shɔu ɔ̃ ɓa wɔsɔ-wɔsɔ ɓa.>> 21 aru gbete pɛ shɔzɛ sisɨn kɔ, ruu kɔ̃linɛ shɛkirɛ, naa shɔja lɛsinɛ, vi ɓɔɔnɛ, shɔ nyonɛ, roonɛ a shɔ soni, 22 mang pɛlinɛ, lánɛ́, shɔ ɗakinɛ, sisɨn vi tɔ̃vɨn kasinɛ gbete ɓa nyaɓa tɔ̃vɨn ɓa, shɔ sannɛ a sisɨn, shɔ nii lɛsinɛ, a yuu lakinɛ wɔsɔ̃n vi rãn shonɛ. 23 Vi kɔ̃linɛm piti kpai shɛ a sisɨn ukɔ pɔ̃ shɔzɛ u ɔ̃rɛ <<ɓa wɔsɔ-wɔsɔ ɓa.>>

24 Kɛɗɔn Yesɔ yaa ɗɔurɛ yɛkɛ komɔɔ Taya a Sɔdom. to yɛti wɛrɛ ji kasiɓa nɛ shɔwɔ u zɛnrɛ ɓa; shom piti u ɓunɛu ji pɛliɓa. 25 Tɛ̃ɛ̃ti naa suwɔɔ nta Yesɔ ruubiitɛ, suu u jasoro pẽtẽrẽ suru kɔ̃linɛ sãutɔ arɛ a nwese a Yesɔ ɗekɨn. 26 Suu pɛ shɔzati a Yahudawa i tipi, shɔ yeu a tipi ponishiya a Siriya. Gaki Yesɔ nɛu shɛshi suru kɔ̃linɛ ang ɓɛjaa bi.

27 Yesɔ geli suunɛ, u shaari pɛ shɔ Isirelayi pɛtɔ a ɗekɨn gbete i naa jajjayi, ɓa vitɔ̃vɨng a tuu jajjayi vishaanɛ a ã shɔgbeteyi ɓa Yahudawa ɓa gbete i naa zaayɛ.

28 Suu kasinyanɛ, <<nankɔ, Uɓeyelapa, ama zaayi ma i shaa vishaanɛ gbete nteli a tipi a jajja piitɔ.>>

29 kɛɗɔn Yesɔ geli suu nɛ, <<aru gbete a kasinyaɓang kɔ, yɛ wɛrɛnɛ, suru kɔ̃linɛ yaa mɛjautɛ.>>

30 A Suu wɛrɛrɛ kpaarɛ jajjau rotɛ a laa roonɛ, suru kɔ̃linɛ shɛtɛ a ɓejau biini.

31 Kɛɗɔn Yesɔ yaa tipi Taya rɛ a sɔkɛ nyaɓa Sɔdom yɛnɛ ɓooti Galili. Akɛ ɗɔlaa kopi i koo. 32 A ɗɔukɔ shɔ n-tiu jawɔɔrɛ gbete nwanyaɓa, shogbãti nta ruu ɓa ntẽtini ɓa, shɔ gaki Yesɔ nɛu pɔ̃siu naa ayuu aru u gatitɔ.

33 Yesɔ gɔ̃ jaurɛ kagbete a shɛshiu a mɔɔyi ɗɔbiini, a tosi janaa a jau sho a tuli susãri aɗɔn kɛɗɔn Yesɔ susãri ɗiiwɔɔ jau ɗɛɛti. 34 Kɛɗɔn a ɗee nɔɔ a lapa, a gɔ̃ ɔ̃kinɛ a kakani, a shanɛ, <<Ippataǃ>>ukɔ ɔ̃rɛ, <<Belinɛǃ>> 35 Tɛ̃ɛ̃ti jau sho i ɓelirɛ nta vigbete shɔ shayɛ tɛpɛ-tɛpɛ, vigbete si shatiu ɗɛɛti kalirɛ, gaa nyanwanɛrɛ tɛpɛ-tɛpɛ.

36 Kɛɗɔn Yesɔ gɔ̃ shɔ yuushorɛ nɛ, ikɔ geli shɔwɔyinɛ ama u ɗɔɔ i zãrinɛ i yɛ ɗekɨn ɓɛɛjitɔ a shɔ gelinɛni. 37 shɔ nta vim nam kopiya vibii zaanɛ pɛliyi waanɛ i shanɛ,<<pɛli vitɛ kpai tɔ̃vɨn, pɔ̃ shɔ shogbãtitɛ i nta ruutɛ, a shɔ gbete i nyaɓa i nwanyatɛ.>>