1 Ji ɔ̃ ɓa dɔkɔkɔ ɓa mɔɔ waanɛ i toli sɔ̃nrɛ ɗɔgbete. Vishaanɛ gbete shɔ shaa sɔ̃n ɓa, Yesɔ ɓaa u jaɗɔyi nya a geliyinɛ, 2 <<Raa pɛliutɔ a shɔmiyini aru i ɔ̃tɛ gboti a nkɔni lee taati vishaanɛ ɓa. 3 Nkɛ yainɛ i yɛ nankɔ i yɛ nwesi a nyaɓa aru gãsiyi nyaɓa kpɛlɛ.>>

4 Yesɔ jaɗɔyi i hɨunɛ, <<U yɛ kpaa vishaanɛ gbete yɛ tesi shɔ kɛpi a ɗɔ waatini u shaarirɛ piya?>>

5 Yesɔ hɨunɛ, << ɔ borodi a naa nɛkɨnnya?>> Yesɔ jaɗɔyi risiu nyanɛ.

<<maanzii.>>

6 Yesɔ geli mɔɔyi nɛi ɔ̃nɛ a tipi. Kɛɗɔn tuu borodi maanziiu, dɔ̃ri Ɗalapa, a dalirɛ, a ãu jaɗɔyi nɛi vɔsi mɔɔyinɛ, i vɔsi mɔɔrɛ naa gbete shayɛ. 7 I jaa jazɨn si sɔ̃n a ɗɔn fɛ̃ɛ̃; Yesɔ dɔ̃ri Ɗa a ãu jaɗɔyi i vɔsi mɔɔyi rɛ. 8 Kopiya shaarɛ tesiyirɛ. A kɨntiuni Yesɔ jaɗɔyi i toli u dalinɛ gbete yayɛ ɓuti maanzii. 9 Vɔshɔ gbeteyi si a ɗɔu mɛnɛ laa laa ziti atu kopi ɓa nɛ̃ɛ̃ti (4,000). Yesɔ ã shɔ naarɛ nɛi yɛnɛ, 10 tɛ̃ɛ̃ti Yesɔ to yɛti latosi mii rɛ au jadɔyini yɛnɛ tipi Damanuta.

11 Farasiyayi gãsiyi i arɛ a gaa Yesɔ nya masinɛ nɛ, i shanɛ, nɛ Yesɔ u tasii vibii zaanɛ pɛ gbete yɛ tasi nɔgbete u kaka shɛ a Ɗalapa ɗɔbii. 12 Ama Yesɔ gɔ̃ ɔ̃kinɛ a zaa a sisɨn shanɛ, <<aru ivi jakɨntimiyi kãɓɛjɔ ɗɔ vibii-zaanɛ viya? N gelɔɔtɛ, shɔ yɛ tasɔɔ vibii-zaanɛ ɓa.>> 13 Kɛɗɔn Yesɔ yairɛ, a sɔɔ latosi rɛ, a gaa ɓooti da tɛnɛrɛ.

14 Yesɔ jaɗɔyi i suki borodi n-tinɛtɔ gbete yɛ tesiiyɛ, siji borodi gbete a yɛti latosi ai naa sheeli. 15 Yesɔ gɔ̃yi yuusho a shanɛ,<<Ɔ kɔyuu tɔ, ɔ kɨnnɔɔ tɔ̃vɨn aru vikɔ̃linɛ gbete Farasiyayi a Hirudu i mati shɔyɛ ni.>>

16 Kɛɗɔn Yesɔ jaɗɔyi shali ai nɔɔ nɛ,<< Sha vim aru gbete u borodi ɓangkɔ ya?>>

17 Yesɔ zɛ vigbeteyi sha ɓɛtɛ, a hɨyinɛ, <<aru ivi ɔ nwanya nɛi borodi ɓa viya? Anɛ dɔdɔrim ɔ ji zɛɓa nɛ n yɛn pɛli vibii-zaanɛ dɔɔtɔ n n-tɔɔ vishaanɛrɛ ɓaya? Ɔ sisɨn kàsi ya? 18 Ɔ nɔɔ aɗɔn ama ɔ zɛ ɗɔ ɓa, ɔ sho aɗɔn ama nta ruu ɓaya? Ɔ ji kpaa sisɨn ayuu vim yini piti kpai ɓaya? 19 Aɗagbete n dali borodi maani n shaari shɔzɛ laa ziti a tu kopi ɓa maani (5,000) ɔ siu dalinɛ ɓuti nɛkɨn yirɛviya?>> 20 Aɗagbete n dali borodi maanzii aru shɔzɛ laa laa ziti atu kopi ɓa nɛ̃ɛ̃ti, ɔ siu dalinɛ ɓuti nɛkɨn yirɛviya? I shanɛ.

<<maanzii.>>

21 Yesɔ hɨu jaɗɔyi nɛ, <<anɛ dɔdɔrim ɔ ji zɛ ɓaya?>>

22 Yesɔ au jaɗɔyi i a Besaida, shɔwɔyi i n-tiu shɔnɔgbɔ̃ti i gaki Yesɔ neu ntau naa a bi. 23 Yesɔ sã shɔnɔgbɔ̃tiu naa a shɛshiu jakomɔɔ ɓili. Naa tuli susãritɛ a shɔnɔgbɔ̃tiu nɔni a ntau naa bi kɛɗɔn Yesɔ hɨunɛ, a zɛ viwɔɔ tɛya? 24 Shɔnɔgbɔ̃tiu ɗe nɔɔ lapa, a shanɛ, <<n zɛ shɔzɛ tɛ; i naa laa i ɗɔ rakinɛ.>>

25 Yesɔ pɔ̃ naa sɔ̃n a jau nɔɔ toti. Kɛɗɔn u nɔɔ ɓelirɛ, a gatirɛ, a zɛ ɗɔrɛ wasa-wasa. 26 Yesɔ ãu naarɛ nɛu yɛ wɛrɛ, ama ãsiu nyanɛ <<mokɔ sɔ jakoomɔɔnɛ toti.>>

27 Kɛɗɔn Yesɔ au jaɗɔyini i yaa Besaida a yɛkɛ jakomɔɔ māāni a kaseriya pilipi ni. A nyaba yɛnɛ Yesɔ hɨu jaɗɔyinɛ,<<ɔ gelin nɛ shɔ shalinɛ nkɔng piya?>>

28 U jaɗɔyi i risinyanɛ,<<shɔwɔyi shanɛ Yɔhana shɔ Batizima; shɔwɔnɛ Iliya; shɔwɔyi sɔ̃njinɛ shɔzɛ gbete atette Ɗa jashonɛyi.>>

29 Ama Yesɔ hɨyinɛ,<< Ɔ shanɛ n ɓɛkɛ piya?>>

Bituru kasi nyanɛ,<<mokaa kirisi.>>

30 Kɛɗɔn Yesɔ gɔ̃yi yushonɛ ɔkɔɔ geli shɔwɔyi n ruubiinɛ.

31 Kɛɗɔn Yesɔ gaa u jaɗɔyi vi matinɛ a shanɛ, ɔ̃tɛ lakɔrɔ jashɔzɛ yɛ ɓoraa wàànɛ shɔpẽni dɔlayi a yupɛ̃ni jaa Ɗa wɔsɔ̃n shɔmala nya ãsinɛyi Musa i yɛ bɛ̃u ruubiitɔ, shɔ yɛ nyou vɔrɔ, ama akɨnti lee taati yɛ yuu sɔ̃n suruni. 32 Yesɔ sha vim wasa-wasa au jaɗɔyi i ɗɔbii. Kɛɗɔn Bituru gɔ̃u kagbete a gau nya masinɛ. 33 Ama Yesɔ zaa nɔkɨn a zɛ u jaɗɔyi gãsi, a gɔ̃ Bituru yusho nɛ, <<Yɛ kawa, japɛ̃pɛ̃ɛ̃ǃ>> Yesɔ risi nyanɛ. <<A lɛri vi bɛjo naa shɔzɛ àá sisɨnni, ama ɓa naa Ɗalapa ɓa.>>

34 Kɛɗɔn Yesɔ ɓaa mɔɔyi au jaɗɔyi nya au ɗɔbii a shanɛ,<<Shɔgbete kasinɛn ɔ̃ n jaɗɔ ɔ̃riutɛ kaka jazɨng a kɔrɔ setɛ bɛ̃u yuutɛ u tu laa gbete shɔyɛ ɓau naa aɗɔnyɛ u gɨnrɛ. 35 Shɔgbete kɛ kasiu surunɛ, yɛ rariu natɔ; a suru kɛ rananɛ ang yuu a Ɗalapa nya ruubii a yɛ kpaa sɔ̃ntɔ. 36 Kɛ ivi tɔ̃vɨn aɗɔ shɔzɛni viya kɛ kpaa vinɛ piti kpai a koo, u suru u rariu naarɛ viya? Yɛ pɛli ɓa. 37 Shɔzɛ yɛ ãkɛ iviya aru u sur--uni viya? 38 Shɔgbete kɛ ntang yusẽnɛ a Ɗalapa nya ruubii dɔdɔrim a koo jakɨntim gbete ruu kɔ̃linɛ raaɗɔtɛm, Jashɔzɛ yɛ ntau yusẽ jo aɗagbete yɛ ɔ̃ au ɓeye ɗɔ bassinɛ a Ɗa jashoneyi ni a lapa.>>