1 Yesɔ geliu jadɔyinɛ, << N gelɔɔtɛ, ɔ shɔzɛ gãsi gbete i shiliɓa aɗɔn i yɛ vɔɓa setɛ i zɛ Ɗa kpati roonɛtɛ au kakani a nyaɓa totto.>>

2 Akɨnti lee maangbete Yesɔ tuu Bituru, Yakubu a Yɔhana yɛnɛ yukɔpɔ sɔ̃sɔ̃lɔ̃ a ɗɔwakɔ siji ikɔ sheeli. I ɗɔ nɔɔ kɨnnɛ Yesɔ bi kɔsirɛ ai ɗekɨn a ɗɔukɔ. 3 U fãrã rii puru ɓolo-ɓolo, shɔwɔyɛ sɔɔ fãrã ɓa a kooni nankɔni ɓa. 4 Kɛɗɔn Yesɔ jadɔ taatiyi i zɛ Ɗa jashonɛyi Iliya a Musa i shɛ a Yesɔ ɗekɨn i ɗɔ nyanwanɛ awuni.

5 Bituru geli Yesɔ nɛ, <<shɔmala, pɛ vi tɔ̃vɨn u a ɗɔnkɔ, u pɛli ɗɔ susunɛ pɛ ɗɔ taati gbete a ɓɛɛ gbete Iliya ɓɛɛ wɔsɔ̃n Musa ɓɛɛ.>> 6 Bituru sha vim ɓau zɛnɛniɓa i a Yesɔ jadɔ gãsiyini aru seti pɛliyi tɔ waanɛ.

7 Kɛɗɔn nyasi arɛ kukkiyirɛ, yenya shɛ a nyasiu nɛː <<Shɔnkɔ ɔ̃rɛ majaa, gbete n ɔriyɛ. Ɔ ntau nyatɔ!>>

8 Tɛ̃ɛ̃ti Yesɔ jaɗɔyi kɨnlinɔɔ piti i ji zɛ shɔ wɔ ɓa ji Yesɔ kɔ sheeli.

9 Aɗagbete i ɗɔ nɔnɛ a kɔpɔ, Yesɔ ãsi u jaɗɔyi nyanɛ, ɔkɔɔ geli shɔwɔ vi gbete ɔ zɛ ɓang nɛ see akɨnti gbete Yesɔ shɔzɛ jaa yulapatɛ a sàà. 10 Aruumkɔ i gɨn Yesɔ nyaurɛ ai nɔɔ, i hɨ zɔ ruu nɛ, <<Yunɛlapa a sàà, u dɔɔ kɛnɛ iviya?>>

11 I hɨ Yesɔ nɛ,<<aru viya shɔmala nyaãsinɛ Musa i shanɛ Iliya kɔ arɛ ɗekɨn ɗa shɔ-shɔ-ranɛ u akɛkɨn viya?>>

12 Yesɔ risinyanɛ, <<nizɛ kɔ Ɗa jashone Iliya atɛtɔ a ɗekɨn aru u ntori vi piti kpai. Ama aru viya Ɗalapa bee a laabeenɛ shanɛ Yesɔ shɔzɛja yɛ ɓoraa waanɛ shɔu bɛ̃u ruubiitɔ viya? 13 Ama n gelɔɔtɛ Iliya a tɛttɔ, shɔ pɛliu vi gbete shɔ kasi pɛlinɛ awuni, ji nɔgbete Ɗalapa beeyɛ nɛyɛ ɔ̃ nankɔ.>>

14 Yesɔ au jadɔyi i zɛ mɔɔyi toli nyatɛ waanɛ aɗagbete sɔu u jadɔyi gãsiyi ɗɔbii, shɔmala nya-ãsinɛ Musa i ɗɔgbete i masi nya a Yesɔ jaɗɔyi gãsiyini. 15 Naa mɔɔyi i zɛ Yesɔ tɛ tɛ̃ɛ̃ti vim ãkɛ vibii-zaanɛ i yurɛ a gee Yesɔ nyarɛ.

16 Yesɔ hɨu jaɗɔyi nɛ,<< Ɔ masipi nya ivi a ikɔ ni viya?>>

17 Shɔwɔ a tete mɔɔyi kasi nyanɛ,<<shɔmala n - majavɔshɔ, suru kɔ̃linɛ sãutɔ ji zɛnɔɔ nyanwanɛ ɓa. 18 Aɗagbete viukɛ yusiu lapanɛ, tuurɛ lou a tipi, shɛshiu susãri a nya, u ɗɔɔ ntari yonɛ, u bi gɨntɔ a kakani. N nwari a jadɔyi nya tɛttɔ i shɛshi suru kɔ̃linɛ utɔ iji zɛnɔɔ ɓa.>>

19 Yesɔ kasiu nya a shanɛ,<<Ɔ shɔ jakɨnti miyi gbete i sisɨn ãnɛ ɓa Ɗalapa biini ɓa, n yɛn ɔ̃kɛ ɔkɔɔni ɓanɛkɨnnya? N yɛn ma sisɨn kɛ ɓanɛkɨn a ɔkɔɔni viya? N ti javɔshɔunɛ yɛm.>>

20 Kɛɗɔn i n-tiurɛ a Yesɔ ɗɔbii. Naa suru kɔ̃linɛ zɛ Yesɔ tɛ, tɛ̃ɛ̃ti suruu yusu javɔshɔurɛ bikɛ-zaanɛ. nwesi a tipi u ɗɔ rikinɛ, u nya ɗɔ pupuru shɛshinɛ.

21 Yesɔ hɨ javɔshɔu uɓeye nɛ,<<vim gau piɗaviya?>>

Javɔshɔu uɓeye shanɛ,<<gau pɛlinɛ suu doo bɛ̃rɛ̃ti! 22 Ko piɗaviya Suru kɔ̃linem kasiu nyɔnɛ lokiu tɛttɔ a yaa a miini. Ama akɛ zɛnɔɔ viwɔɔ pɛlinɛ nɛ, ntau raapɛ a pɔ̃siu naa tɔ.>>

23 Yesɔ shanɛ,<<aru iviya a hɨnɛ nkɛ zɛnɔnɛ viya? Vi piti kpai Ɗalapa pɛli shɔgbete kɛ ã sisɨnnɛ Au binitɔ.>>

24 Tɛ̃ɛ̃ti javɔshɔu uɓeye ɗe nya lapa nɛ, << n ã sisɨntɛ, pɔ̃sing naa jo n sisɨn ãnɛ uyɛ ɗekɨn!>> 25 Yesɔ zɛrɛ mɔɔyi i kanɛ au ɗɔbii deyinɛ-deyinɛ, A lasi suru kɔ̃linɛurɛ shanɛ, <<Mokɔ suru kɔ̃linɛm gbete zãri javɔshɔm nyanwanɛ, n ãsinya a shɛnɛ au biini, mokɔ to jam binɛ toti.>>

26 A suru kaa nya lapa, a loki javɔshɔu a tipi, kɛɗɔn a shɛkɛkɨn au biini. javɔshɔu roo naa vɔrɔ a tipi gbete pɔ̃ shɔzɛ gãsiyi shanɛ,<< javɔshɔu vɔtɛ.>> 27 Ama Yesɔ sãu naa a ɗeu lapa, javɔshɔu yulaparɛ.

28 A kɨntiuni Yesɔ tokɛ yɛti wɛrɛ au jaɗɔyini, Yesɔ jaɗɔyi i hɨunɛ,<<aru iviya uji zɛnɔɔ suru kɔ̃linɛ shɛshinɛ jiɓa viya?>>

29 Yesɔ risinyanɛ,<<suru kɔ̃linɛ nam shɛɓa see Ɗa gakinɛ.>>

30 Yesɔ au jaɗɔyi i yaa ɗɔurɛ, i yɛkɛ ɗekɨn a tɛɛ Galili. Yesɔ ji kasiɓa nɛ shɔwɔyi u zɛ ɗɔgbete u ɗɔnniɓa. 31 aru u ɗɔgbete mati u jaɗɔyi vi. geliyinɛ,<< Shɔ yɛ ã Jashɔzɛ shɔ a naa. I yɛ nyou vɔrɔ a knti lee taati yɛ yulapa sɔ̃n a suru ni.>> 32 Ama i ji zɛ ruugbete Yesɔ matiyiyɛ ɓa, i ntau seti hɨnɛ sɔ̃ntɔ.

33 Yesɔ au jaɗɔyi i arɛ a Kapanahum. Aɗagbete i si a wɛrɛ Yesɔ hɨ u jaɗɔyi nɛ,<<Ɔ masi nya si aru ivi a nyaɓani viya?>> 34 Ama i ɔ̃ nyani shɔk, aru a nyaɓa i masi nyanɛ pi ɔ̃rɛ pẽniɓa ai tetteni piya.

35 Yesɔ ɔ̃ tipi a ɓaa u jaɗɔyi kopi tu ziti nya a shanɛ,<<shɔgbete kɛ tɔnɛ nɛn kasi ɔ̃nɛ awɔ tetem a ɗekɨn, ɔ̃riutɛ lakɔrɔ yɛ ɔ̃ a knti, ukɔ yɛ ɔ̃ sɔ̃n jawɛrɛ a tetteni kpai.>>

36 A tuu jajja wɔɔ pẽtẽrẽ a pɔ̃u ai tete. Yesɔ turɛ a mutuu a nɔsisɨn kɛɗɔn a shanɛ, 37 <<Shɔgbete kɛ tɛ jajja pẽtẽrẽm nanɛ ang nii tɛ nkɔ; shɔgbeteu kɛ tɛng nanɛ ji tɛ ɓa nkɔ ɓa ama tɛ shɔgbete shong-yɛ naa.>>

38 Yɔhana geli Yesɔ nɛ,<<Shɔmala, u zɛ jawɔɔ kɛ shɛshi suru kɔ̃linɛ nɛ àà nii, u zãruutɔ aru u ɓa au tetteni ɓa.>>

39 Ama Yesɔ shanɛ, <<mokɔ zãruunɛ, shɔwɔɔ ɓa gbete yɛ pɛli shonɛ vibii-zaanɛ ang nii, u sha vikɔ̃linɛ sɔ̃n ang yuu gbãgbã ɓa, 40 shɔgbete ji masi nya ɓa a ukɔuni ɓa, pɛ u ɓɛɛ. 41 N gelɔɔtɛ nizɛ, shɔgbete kɛ ãwɔ mii ɓoonɛ nɛ a waa ang nii, aru gbete nɛmpɛ kirisi ɓɛ̀ɛ̀ yɛ kpaa vigbete Ɗa pɔ̃siu nɛn ãu a lee gadiitɔ.>>

42 Yesɔ sha sɔ̃nnɛ, shɔu kɛ pɔ̃ shɔgbete ã sisɨn ang bi ruuvini pɛlinɛ nɛ, Ɗalapa yɛ gɔ̃u yuusho yɛ tɛ̀ɛ́ shɔgbete shɔ masiu tari vi nanɛ pẽniɓa a kɔrɔ a lokiu a mii wapotɔ. 43 A naa kɛ pɔ̃anɛ a pɛli ruuvini, zɛ̃ɛ̃ naau ɓili. Yɛ ntotɔ a to ɗɔ Ɗa kpati roonɛ a naa kagbete a nogbete a bi to wɛrɛ yaa a naa ka ziti piti kpai, yaa gbete niki ɓa. 44 (A ɗɔwakɔ, raɓoonɛ yisi nyaɓa, yaau ma shɔ niki dɔɔɓa.) 45 A dɔɔ kɛ pɔ̃anɛ a pɛli ruuvini, zɛ̃ɛ̃ dɔu a ɓili. Yɛ ntotɔ a to ɗɔ Ɗa lakpati ɔ̃nɛ a dɔɔ ɓa a nogbete a bi yɛ to wɛrɛ yaa a dɔɔ ka ziti piti kpai. 46 (A ɗɔwakɔ, raɓoonɛ yisi-nya ɓa, yaau ma shɔ niki dɔɔɓa.) 47 A nɔɔkɔ kɛ pɔanɛ a pɛli ruuvini, zɔ kati a loki ɓili. Yɛ ntotɔ a to Ɗa ɗɔ kpati roone a nɔɔ kagbete a nogbete a bi yɛ to wɛrɛ yaa a nɔɔ ka ziti piti kpai. 48 A ɗɔwakɔ

<<raɓoonɛ yisinya ɓa,

yaau ma shɔ niki ɗɔɔɓa.>> 49 Ɗalapa yɛ sɔɔ kopiya pɛtɔ a yaa wasa-wasa, nagbete shɔ too vivaa, gbete shɔ ã Ɗalapa aru vi yuu ãnɛ a nteyɛ̃.

50 Nteyɛ̃ pɛ vi tɔ̃vɨn; ama nteyɛ̃ kɛ yau nya shɔ̃tinɛ nɛ, a sɔruu nya shɔ̃tinɛ sɔ̃nkɛ pikoviya?

Mɔkaa yuuni, a ɔrii mɛzɔutɔ a ɔ̃ ɔ̃nɛ nya tɔ̃nɛ a ɗɔzɔɔ.