1 Masayi ɔ yɛ yeeri zɔ ruutɔ a yuuniya? Ɔ nyaba naa raanɛ ɓa ko fɛ̃ɛ̃ ko ɔ piya. Akɛ yeeri shɔwɔɔ ruunɛ yuu, akɛ pɛli vigbete shɔu pɛli sɔ̃nnɛjo, si a lɛsɔ yuutɛ. 2 U zɛtɛttɔ Ɗalapa ruunɛ yeenɛ pɛ tɔ̃vɨn a shɔgbete i pɛli vim nankɔ yɛ ni. 3 Ama mɔkɔ masa, a pɛli vigbete a yeeri shɔwɔyi ruu yuuyɛ sɔ̃njo! A zɛ naa a yɛ ranaatɔ a Ɗalapa ruuyeenɛ niya? 4 Ko a bẽẽ Ɗalapa bɔrɔɔ vitɔ̃vɨng gbete pɛli yɛ, au sisɨn mɛnɛ, a yɛti zazza gbete pɛli a yuumitɔ ya? Ɔ zɛtɛttɔ nizɛ kɔ Ɗalapa vipɛlinɛ pɛ tɔ̃vɨn, aru gbete u ɗɔɔ nyaba kãnɛ gbete yɛ sɨnrɛ ɔ yaa ruuviniyɛ. 5 Ama ɔ sisɨn lakinɛ katara-katara, aru nankɔ ɔ ɗɔgbete pɛliyɛnɛ ɔ yukɔnɛ u ɔ̃ pẽnɛba a lee gbete Ɗalapa sisɨn gɨnvɔ̃ au vitɔ̃vɨng pɛlinɛ au ruuyeenɛyini shɔyɛ tasitɔ a ɓili. 6 Aru gbetenkɔ Ɗalapa yɛ shori ko-piya vi ɗɔnwanɛjo nɔgbete sho viyɛ. 7 Shɔ gãsi i ɓejo a ɗɔɔ vi tɔ̃vɨn pɛlinɛ, i kã bassinɛ a kutinɛ, a vitɔ̃vɨng pɛlinle; a Ɗalapa yɛ ãi Suru gbete sɔ̃ nyaɓayɛ. 8 Zɔgãsi i kasi ba i yuu i bẽẽ nyaba tɔ̃vɨntɔ, i kasinɛ nɗa i gɨn vigbete ɓa tɔ̃vɨn ɓayɛ; Ɗalapa yɛ nɔsiu sisɨn gɨnvɔ̃ pẽnɛba ai yuukɔ. 9 A ɗɔwaakɔɔ shɔgbete i pɛli vi kɔ̃linɛ iyɛ ɓooraatɔ a kɔnɛni, shɔyɛ gaa a Yahudawayi a pɛsi a shɔgbete i ɓa Yahudawaɓayɛ. 10 Ama shɔgbete kɛ pɛli vitɔ̃vɨng nɛ Ɗalapa yɛ ãu basinɛtɔ, a kutinɛ, a ɔ̃nɛ yɛti puru, Yahudawayikɔ a ɗekɨn yɛnɛ sɔ̃n shɔgbete i ɓa Yahudawaɓa. 11 Ɗalapa yeeri shɔ ruu ji nagbetenkɔ piti kpai.

12 Shɔgbeteyi ɓa Yahudawaɓa i ɓa a nya ãsinɛ Musa ni ɓa; Ama i pɛli ruuvinitɛ i nitɛ ka nyaãsinɛni. Yahudawayikɔ i nya ãsinɛ ɗɔn; ikɛ pɛli ruuvininɛ Ɗalapa yeeriyi ruujo a nyaba nya ãsinɛ Musakɔ. 13 Ɓa nya ãsinɛ Musakɔ ntanɛ yɛ sɨnrɛ shɔu ɔ̃ shɔ tɔ̃vɨn a Ɗalapa ɗekɨn ni ɓa, ama setɛ a pɛli vigbete nya ãsinɛ Musau shayɛtɛ. 14 Shɔgbete i ɓa Yahudawa ɓa i ɓa a nya ãsinɛ Musani ɓa; ama ikɛ shɔvinɛ a Musa nya ãsinɛni a sisɨn gbikiri gbikiri, i tu ɓɛji naayi i nya ãsinɛukɔ, ko i nya ãsinɛ ɓa. 15 I vipɛlinɛ tasitɛ nɛ shɔ bee nya ãsinɛu tɛttɔ ai sisɨnni. I sisɨn tasiyi tɛttɔ nɛ vimpɛ nizɛ, lewɔɔ i sisɨn wiliyitɔ nɛ iji pɛli viɓa tɔ̃vɨn ɓa, lewɔɔ sɔ̃n raitɔ nɛi pɛli vitɔ̃vɨng. 16 Aruumkɔ, nagbete ruutɔ̃vɨng gbete n nwayɛ, vimyɛ ɔ̃ ji nankɔ aɗagbete Ɗalapa a Yesɔ Kirisi kabii yɛ yeerɔɔ ruu gbete shɔ ɓusi a sisɨntɔ piti kpai.

17 Ɔ sha kɛnɛ ivi awɔ yuuni viya? Ɔ ɓawɔɔ yuunɛ shɔ Yahudawa; ɔ pɔ̃ sisɨn a Musa nya sisɨn, ɔ basi a Ɗalapani; 18 Ɔ zɛ vigbete Ɗalapa kasinɛ ɔ pɛliyɛ tɛttɔ, ɔ mati vi tɛttɔ a nya ãsinɛni gbete yɛ sɨnrɛ ɔ lɔɔ vitɔ̃vɨng; 19 Ɔ zɛ tɛtɔ ɔ pɛ shɔ gbete ɔ tasi shɔ nɔgbãtiyi nyabayɛ, ɔ pɛ ɗɔsẽsẽ a shɔ ɗɔkɨnriyi bini ni, 20 a shɔgbete i geli shɔ rãnyi ruuyɛ, a shɔmala gbete i mati shɔgbete i ji zɛ ruuɓayɛ vi. Ɔ zɛtɛttɔ nizɛ kɔ a Musa nya ãsinɛ kpai ruutɔ̃vɨng zɛnɛ a tɔ̃vɨn ni aɗɔn. 21 Ɔ mati shɔwɔɔ vi ɔ mati ɔ yuu ɓɛ ji ɓa aruuviya? Ɔ nwari shɔ nyanɛ, <<Shɔkɔ ɓoo vinɛ>> ama ɔ ɓoo vi ɓaya? 22 Ɔ shanɛ, <<Shɔkɔ pɛli kpantanɛ>> ama ɔ pɛli kpantang ɓaya? Ɔ bɛ̃ɛ vigãnkitɔ ama ɔ raa vi ɓa a wɛrɛ Ɗa ni ɓaya? 23 Ɔ basinɛ nɛ i Ɗalapa nya ãsinɛ aɗɔn ama ɔ n ti yusẽe ɓa a Ɗalapani a tete gbete ɔ bẽẽ u nya ãsinɛ tɔɓa? 24 Ɗanyaruubii shanɛ, <<A wɔɔ yuukɔ ɔ shɔ Yahudawayi, shɔgbete i ɓa Yahudawa ɓa i sha vikɔ̃linɛ a Ɗa yuu.>>

25 Ɔ kɛ gɨn nya ãsinɛ nɛ, ɔ sha yeenɛ ukɔ vitɔ̃vɨng; ama naa ɔkɛ bẽẽ nya ãsinɛ Musa nɛ, ɔ̃ naa shɔgbete shɔji yereiyi shaa ɓayɛ. 26 Naa shɔgbetei ɓa Yahudawaɓa, a shɔji yeeriyi shaa ɓa ikɛ gɨn vigbete nya ãsinɛ shayɛnɛ, Ɗalapa yɛ pɔ̃i ɓa a tete shɔgbete shɔ yeeriyi shayɛtɛ ɓaya? 27 Aru gbetenkɔ ɔ shɔ Yahudawayi, shɔgbete i ɓa Yahudawaɓa iyɛ yeerɔɔ ruu aru gbete shɔ beerɔɔ nya ãsinɛ Musa tɛttɔ shɔ yeerɔɔ shaa sɔ̃n tɛttɔ; ama i gɨn nya ãsinɛtɔ, ko shɔji yeeriyi shaa ɓa naa gbete shɔ yeeriuyɛ ɓa. 28 A vimni piti kpai, shɔu upɛ gaanɛ Yahudawa a shɔ yeeriu shaatɛ nizɛ yɛ piya? Ɓanɛ shɔgbete u pɛ shɔ Yahudawa a bi ɓiliyɛ, shɔgbete u shaa yeenɛ pɛ vi zɛnɛ. 29 Ɓa, shɔ Yahudawa tɔ̃vɨn ukɔ ɔ̃rɛ shɔgbete au kɔsi sisɨntɛ, ukɔ ɔ̃rɛ shɔgbete shɔ yeeriu shaa tɛyɛ, shɔmpɛ Ɗalapa Suru vishonɛ, ɓa nya ãsinɛ gbete Musa beeyɛ ɓa. Shɔm ukɔ tɛɛ bɛlinɛ rɛ a Ɗa naa, ɓanɛ shɔzɛ naa ɓa.