1 Jawɔɔ siɗɔn a Kayisariya u niinɛ Kɔnaliyo, u si yupɛ̃ni soja Rooma a kn soja gbete shɔ ɓaanɛ<<Italiyayi kn soja>>. 2 U si shɔ Ɗalapa gɨnnɛ, ukɔ au shɔwɛrɛni kpai i bassi pɛ Ɗalapa, totti ã Yahudawa shɔraayi vitɔ, wɔsɔ̃n gaki Ɗa tɔ a lee-lee. 3 Si mɛnɛ atette niti a nɔɔrirɛ, au zɛ Ɗajashonɛlapa wasa-wasa gbete arɛ au ɗɔbii a shanɛ, <<Kɔnaliyo!>>

4 Kɔnaliyo nteri Ɗajashonɛlapa nɔɔ a bi a seetini a shanɛ, <<Viu piviya, Uɓeyelapa?>>

Ɗajashonɛlapau kasinya nɛ,<<Ɗalapa ntabiinyatɔ̃nɛtɛ aa gakinɛni aa vishonɛ raantanɛni, mabiitɛ yɛ kasaa nyatɔ. 5 Dɔdɔrim sho shɔwɔyinɛ yɛnɛ Joopa a i ɓaa jawɔɔ nya u niinɛ Siman Bituru. 6 Nɔ a Siman wɛrɛ shɔu sɔ̃ kooyɛ, shɔ gbete u wɛrɛ a nyaɓooti wapo.>> 7 Kɛɗɔn Ɗajashonɛlapau yɛrɛ, a Kɔnaliyo ɓaau jawɛrɛyi nya ziti a Sojani, jagbete gɨn Ɗalapa u si shɔ gbete pɛliu vishonɛ alee -leeyɛ. 8 Kɔnaliyo geliyi vigbete Ɗajashonɛlapa shayɛ kpai, kɛɗɔn a shoyirɛ yɛnɛ Joopa. 9 A dii ɓuru, siyi a nyaba anɛ a Joopani maani, kɛɗɔn Bituru gẽ jalapa atette niti aru u gaki Ɗa. 10 Nwo sɨurɛ kasi viwɔɔ shaanɛ; si shɔ nwa vishaanɛtɛ, kɛɗɔn a zɛ vi a nɔrinɛ. 11 A zɛrɛ kolapa ɓɛlitɛ, viwɔɔ a ɗɔnɔnɛ naa kpenti fãrã, shɔ ɗɔnɔsinɛ a kawanɛ nɛ̃ɛ̃ti anɛ tipi. 12 A ɓuzɨni vivaayi ko shɔpiya aɗɔn, shɔ gbeteyi dɔɔ nɛ̃ɛ̃ti a ɗɔnni, vi koonɛ buruyi a jaanɔ ɓiliyini. 13 A nta yeenya wɔɔ shanɛ,<<Yulapanɛ, Bituru, a nyonɛ a shaarɛ!>>

14 Ama Bituru shanɛ, <<Yɛ pɛli ɓa, Uɓeyelapa! N ji shaa vi gbete ɓa wɔsɔ-wɔsɔ ɓa ji lee gbete ni ɓa, ko vigbete nya-ãsinɛ Musa zãritɔ ɓa wɔsɔ-wɔsɔ ɓa.>> 15 A nta yeenya sɔ̃n nɛ, <<Vigbete Ɗalapa shatɛ nɛ wɔsɔ-wɔsɔ mɔkɔ ɓaanɛ nɛɓa wɔsɔ-wɔsɔ ɓa.>> 16 Ɗalapa nyanwa nankɔ ɓa taati, kɛdɔn tɛ̃ɛ̃ti viu sɔɔ kolaparɛ.

17 Bituru tɔkɛ lɛrinɛ fɛ̃ɛm aru u zɛ dɔɔ nɔrinɛm, kɛɗɔn shɔ gbete Kɔnaliyo shoyɛ i kpaa Siman wɛrɛ-rɛ, ai shirɛ a nyeba wɛrɛukɔ. 18 I ɓaa nyarɛ ai hɨnɛ, <<Shɔzati wɔɔ a dɔmni u niinɛ Siman Bituru ya?>>

19 Si Bituru doo ɗɔɔ kãlinɛ a sisɨn nɛn zɛ dɔɔ nɔrinɛm pɛ, Ɗa Suru geliu nɛ,<<Weshopɛ! Shɔzɛ taati i yɛm i ɗɔgbete i kã ɗɔyɛ. 20 Mabiinɛ a nɔrɛ a gɨyirɛ, yɛ a sisɨn gbete aruviya nkɔng shoyirɛ.>> 21 A Bituru nɔrɛ yɛnɛ ɗɔɔ shɔwiyini a geliyi nɛ,<<Nkɔng ɔ̃rɛ jagbete ɔ kãuɗɔyɛ. Ɔ a pi aruviya?>> 22 I kasinya nɛ.<<Yupɛ̃ni Soja Rooma au niinɛ Kɔnaliyo ukɔ shourɛ,>>U pɛ shɔ tɔ̃vɨn, au bassi Ɗalapa tɔ, a shɔ Yahudawa i ãu bassiutɔ kpai. Ukɔ Ɗajashonɛlapa geliunɛ u waa a nya au wɛrɛ, nɔgbete a yɛ nta vigbete yɛ shayɛ. 23 Bituru tosi shɔyi ɓusɨng wɛrɛ-rɛ, a ãi ɗɔroonɛrɛ.

A dii ɓuru mabiirɛ a yɛrɛ ayini; A gãsi shɔ sisɨn ãnɛyi a Ɗa bi a Joopa i gɨyirɛ jo. 24 Kɛ a dii ɓuru wɔɔ i to Kayisariyarɛ, a ɗɔ gbete Kɔnaliyo u si ai ɗɔ ganɛyɛ, a ɓɛzɔɔyini a nyazɔɔ, a ɓesayi maani ni gbete waayi nyayɛni. 25 Naa Bituru sikɛ to ɓuzɨn nɛ, Kɔnaliyo kpaaurɛ, a nwesi au ɗekɨn, a basiurɛ. 26 Ama Bituru sã Kɔnaliyo naa a shanɛ,<<Yulapanɛ, n ji shɔzɛ kɔ.>> 27 Bituru yɛ ɗekɨn a nyanwanɛ a Kɔnaliyo ni, kɛdɔn a to yɛti wɛrɛ-rɛ a kpaarɛ shɔ tolinyatɛ waanɛ. 28 A geliyi nɛ,<<Ɔ awɔ yuu ɔ zɛ tɛttɔ fɛ̃ɛm au nya-ãsinɛ ji tɔ̃ɓa Yahudawayi ɓasi yuu a shɔ gbeteyi ɓa Yahudawa ɓa a nyazɔ niɓa. Ama Ɗalapa tasintɛ nɛn nkɔng zɛ shɔwɔɔnɛ ɓa wɔsɔ-wɔsɔ ɓa, ko vizarani ɓa. 29 Arumkɔ shɔ shonrɛ nɛn atɔ, n ji tɔɓa nɛn a ɓani ɓa. N ji hɨ ɓanɛ dɔdɔrim a shon aruviya ɓa?>> 30 Kɛɗɔn Kɔnaliyo shanɛ,<<Si ji ɗaa nankɔ lee taati gbete tɛɛ ɓayɛ, n si aɗɔ Ɗa gakinɛ ang wɛrɛ, si dɔɔɗa ntatɛ taati atette niti. Ɓa shɔ zɛnɛni ɓa jawɔɔ tosi fãrã kpelen-kpelen a shi ang ɗekɨn 31 a shanɛ: <Kɔnaliyo! Ɗalapa nta a gakinɛtɛ tɛ vigbete a ã shɔraayi yɛ ni. 32 Sho shɔwɔɔnɛ a Joopa a jawɔɔ ɗɔbii u niinɛ Siman Bituru. U shɔzati a Siman shɔ koo tɔ̃ri u wɛrɛ, roo wɛrɛ a nyaɓooti wapo.> 33 Aruukɔ n shonya shɔu ɓaa nyarɛ, a atɛm ukɔ tɔ̃vɨn. Dɔdɔrim u yɛm a Ɗalapa ɗekɨn kpai, u ɗɔ gbete u ga ko-iviya gbete Uɓeyelapa ãsiu-nyanɛ u geliuyɛ.>>

34 Kɛɗɔn Bituru gayi nyanwanɛrɛ nɛ: <<Dɔdɔrim n zɛtɛ pɛ nizɛ Ɗalapa tuu kopiya ji nazɔɔ gbetenkɔ kpai. 35 Shɔ gbeteyi ntau seetitɔ ai pɛli vigbete tɔ̃vɨn yɛ, Ɗalapa tɛyi naa kaaziti, ko-pi shɔ nyakoo shɔpiya. 36 Ɔ zɛ ruu gbete Ɗalapa shoshi shɔ Israilayitɛ, au geliyi ruu tɔ̃vɨn gbete au n ti ɔ̃nɛbiinyatɔ̃nɛ Yesɔ Kirisi kabii, ukɔ ɔ̃rɛ Uɓeyelapa piti kpai. 37 Ɔ zɛ nɔgbete ruum raa tipi Yahudiyatɛ, gaa a Galili, akɨnti gbete Yɔhana nwari shɔ nya aru Batizimayɛ. 38 Ɔ zɛ Yesɔ kirisi shɔ Nazara ruubiitɛ, a nɔgbete Ɗalapa ãu Ɗa Suru wɔsɔ̃n a kaka. Yɛ kopiɗɔpiya, pɛli vitɔ̃vɨng, shɔ gbete japɛ̃pɛ̃ɛ̃ mayi dɔlaa gatiyirɛ, aruviya Ɗalapa u si awuni. 39 Ukɔu ɔ̃rɛ shɔshinɛkɨnti a vigbete pɛliyɛ kpai a tipi Israila a ɓuzɨn Urushalimani. Kɛɗɔn shɔ nyourɛ a nyaba naɓaanɛlaa. 40 Ama Ɗalapa yuusiu lapa a dii taati a pɔ̃rɛ shɛ a shɔ ɗekɨn, 41 Ji shɛ ɓa a kopiya ɗekɨn ɓa, ama ji shɔshinɛkɨntiyi ɗekɨnkɔ sheeli gbete Ɗalapa lɔyi tɛttɔ tɛ̃ɛ̃tɛ̃ɛ̃yɛ, u shɔ gbete au shaarɛ u ɓoorɛ awuni a knti gbete yuu a sàà yɛ. 42 Au ãsiu-nyanɛ nɛu nwari shɔ Ɗalapa nyaruubiitɔ, u tasiyinɛ pɛ ukɔ shɔ gbete Ɗalapa ãu naa nɛ ukɔ u ɔ̃ shɔruuyeenɛ, aru shɔ gbeteyi nɔkãkãri a shɔgbeteyi vɔtɛtɔyɛni i yuu. 43 Janyagadiyi kpai i nwanya tɛttɔ au yuuni, i shanɛ shɔgbete ikɛ ã sisɨn nɛ au biini shɔyɛ yasiyi ruuvinitɔ au nii.>>

44 Si Bituru u doo ɗɔɔ nyanwanɛ, Ɗa Suru nɔɔ a shɔ gbeteyi wesho au nya i yuu kpai. 45 Shɔ Yahudawa gbeteyi a a Bituru ni a Joopayɛ bizayikɛtɔ nɛ Ɗalapa tẽẽri shɔgbeteyi ɓa Yahudawaɓa i Ɗa Surutɛ jo abiini kpai. 46 Aru nankɔ i ntarɛ ikɛ nwanyanɛ a nyakoo totot i ɗɔɔ gbete bassi Ɗa yɛ.

See Bituru nwanyarɛ nɛ: 47 <<Shɔmiyi tɛ Ɗa Surutɛ, ji naa gbete au tɛyɛ. shɔwɔɔ yɛ zãriyi dɔɔtɔ nɛ shɔu pɛliyi batizima ɓa a mii ni ɓaya?>> 48 See Bituru ãsi-nyanɛ shɔu pɛliyi batizima a Yesɔ Kirisi nii. Kɛɗɔn i geli Bituru nɛ u ɔ̃ pɛ a yini ko lee ziti.