Atos 6

Shɔ Lɔɔ Shɔnaapɔ̃sinɛ Maangzii

1 A ɗauni, naa Yesɔ jadɔɔyi aɗɔ ɗekɨn yɛnɛ a shanɛni, gãsi Yahudawa gbeteyi nta nya Helenawa a Yahudawa gbeteyi ntanya Aramaya yɛ nya yurɛ ai tetteni. Yahudawa gbeteyi ntanya Helena yɛ i shanɛ shɔ vɔsi saa ko-pi leepiya nɛ shɔ kɔi suvɔ gbete ai tete ɓa. 2 Kɛɗɔn Yesɔ jashonɛyi kopi atu ziti i ɓaa kn shɔ gbeteyi ã sisɨn Ɗabii nya a ɗɔzɔɔ kpai ai shanɛ, << Ji kɔriɓa u yaa Ɗa nyaruubii nwanɛ aru nɛu vɔsi suvɔyi vishaanɛ a saa ɓa. 3 Aru nankɔ mazɔ̃yi, ɔ lɔɔ shɔzɛ maanzii awɔ tete gbete shɔ zɛi tɛttɔ nɛ Ɗa Suru raayi bitɛ kpai ai sẽrẽni aɗɔn, u yɛ pɔ̃yirɛ i pɛliu vishɔnɛmrɛ. 4 U ɔkɔma u ãu sisɨn kɛ a ɗɔɔ Ɗa gakinɛ a vishonɛ Ɗa nyaruubii nwanɛ.>>

5 Shɔ sisɨn ãnɛ Ɗa biyi i kpai i kasinyarɛ a vigbete Yesɔ jashonɛ shayɛni, kɛɗɔn i lɔɔ Istifanu rɛ jagbete u a Ɗa Suruni a sisɨn-ãnɛni, a Filibu a porokoru, a Nikanɔ, a Timon, a Barimina, a Nikɔla shɔ Antiya, shɔ gbete u ɓa Yahudawa ɓa ama to Yahudawayi ɗa gɨnnɛ ji gadi. 6 Shɔ n-tiyirɛ a Yesɔ jashonɛyi ɗekɨn, a Yesɔ jashonɛyi gakiyi Ɗarɛ a pɔ̃siyinaa rɛ ayuu ko shɔpiya. 7 Kɛɗɔn Ɗa nyaruubii raaɗɔ yɛ ɗekɨnɗekɨn. Yesɔ jadɔɔyi a Urushalima shɛkɛ waanɛ-waanɛ, a shɔlansiyi a wɛrɛ Ɗa waanɛ i tɛ sisɨn ãnɛnrɛ.

Shɔ Sã Istifanu

8 Istifanu, jaau Ɗa tasiu vɔɔ susãri tɛttɔ abi fɛ̃ɛm a kakani waanɛ, pɛli vibiizaanɛyitɔ pɛ̃niba a vitasinɛyini a shɔ ɗɔbii. 9 Ama shɔwɔyi i masinya a Istifanu ni i si shɔ Yahudawayi kn ɗɔ-ɔ̃nɛkɔ gbete shɔ ɓainɛ shɔ gbeteyi ranaatɛyɛ, i pɛ Yahudawayi ai shɛ a Sariya a Alezandariya, wɔsɔ̃n a tipi Silikiya a tipi Asiya. i tonya masinɛ a Istifanu ni. 10 Ama Ɗa Suru ã Istifanu sẽrẽ gbete yɛ nwanya ai risiunya dɔɔɓa. 11 Kɛɗɔn i woo shɔ gãsiyi nɛyi shanɛ <<U ntarɛ kɛ dã Musa nɛ a Ɗalapa ni! 12 A nyabankɔ i sɨnrɛ mooyi sisɨn durɛ, a yupɛ̃ni dɔlaayi a shɔmala nya-ãsinɛ Musani. I sã Istifanu rɛ i n-tiu yupɛ̃niyi ɗekɨn. 13 Kɛɗɔn i n ti shɔwɔyirɛ nɛi yeeriu nya ayuu. I shanɛ<<Jaamkɔ, shali vikɔ̃linɛ lee-lee aru u wɛrɛ Ɗa wɔsɔ-wɔsɔ a Musa nya-ãsinɛni. 14 U ntarɛ kɛ shanɛ Yesɔ shɔ Nazara yɛ zɨli wɛrɛ Ɗam a tipi u kɔsiu nakoo gbete Musa yasiuyɛ kpai!>> 15 Shɔ gbeteyi si ɗɔ,ɔ̃nɛ a yupɛ̃ni Yahudawayi ɗɔruyeenɛ kpai i ntẽẽri Istifanu nɔɔ bi i zɛu nɔkɨn ɔ̃ naa Ɗajashonɛlapa ɓɛɛ.