Atos 11

Bituru Geli shɔ Ɗa gɨnnɛyi Ruu a Urushalima

1 Jashonɛyi a shɔ gãsi shɔ gbeteyi a sisɨn Ɗabii a tipi Yahudiya kpai i ntarɛ nɛ shɔ gbeteyi ɓa Yahudawa ɓa nɛi tɛ Ɗa nyaruubii sɔ̃ntɛ jo. 2 Naa Bituru yɛ Urushalimatɛ, gãsi shɔ gbeteyi shi ayuu nakoo aru shaa yeenɛ i waaba a Bituru ni i shanɛ, 3 <<Aru ivi a yɛ shɔ gbeteyi shɔ ji yeeri shaa ɓa i wɛrɛ a sháà vishaanɛ a yini viya?>> 4 Kɛɗɔn Bituru tasiyidɔɔ vigbete pɛliyɛ gaa au gɨn-gɨn nɛ:

5 <<Aɗagbete n si ɗɔɔ Ɗa gakinɛ a Komoo a Joopa, n nɔrirɛ, ang nɔrinɛ n zɛ viwɔɔ kɛ nɔnɛ naa fãrã pɛ̃niba a kolapa wanɛ nɛ̃ɛ̃ti, a shi ang nkɔni maani. 6 N kɨnnɔɔ ɗɔɔli a ɓuzɨn n zɛ vivaa wɛrɛyi a shɔ ɓiliyini, a vigbeteyi koo a buruyi wɔsɔ̃n janoyini. 7 Kɛɗɔn n nta yeenya gelin nɛ,<Bituru Yulapa nɛ, yeenɛ a shaarɛ.> 8 Ama n kasinya nɛ, Ɓa nankɔ ɓa! Uɓeyelapa, n ji tosi vishaanɛ vikɔ̃linɛ au ɓa wɔsɔ-wɔsɔ ɓa ji shãni ang nyani ɓa. 9 Yeenya shɛ sɔ̃n a kolapa shanɛ, <Mokaa ɓaa viwɔɔ nɛ vikɔ̃linɛ gbete Ɗalapa sɔɔ tɛttɔ wɔsɔ-wɔsɔ nɛ ɓa wɔsɔ-wɔsɔ ɓani.> 10 Vim pɛli ɓa taati, au kɨnti ni kɛɗɔn a viu sɔɔ kolaparɛ. 11 A ɗaukɔ tɛ̃ɛ̃ti shɔzɛ taati i arɛ a wɛrɛ gbete n-si aɗɔnyɛ, shɔ shoyi a Kasariya anɛ n ɗɔbii. 12 Kɛɗɔn Ɗa Suru gelin nɛ, nɛn yɛnɛ ayini nkɔng tasi yuvɔsinɛ nɛ, mazɔɔyi mangbete ai sisɨn ãnɛ aɗɔn, i shɛ a joopa i dɔ̃n dɔɔ yɛnɛ Kasariya, a u kpai u yɛ Kɔnaliyo wɛrɛ rɛ. 13 kɛɗɔn a geliu nɔgbete zɛ Ɗajashonɛlapa shi au wɛrɛ yɛ, Ɗajashonɛlapa geliu nɛ,<Sho shɔwɔɔ nɛ yɛnɛ Joopa u ɓaa Siman nya gbete shɔ ɓaunɛ Bituru yɛ. 14 Ukɔ yɛ nwarɔɔ ruurɛ, mokaa a shɔwɛrɛni piti ɔ ranaarɛ.> 15 Naa n gaa nyanwanɛtɛ, kɛɗɔn Ɗa suru nɔrɛ ai bi, nagbete gaa nɔnɛ au biiyɛ. 16 Kɛɗɔn n kpaa sisɨn a vigbete Uɓeyelapa shayɛ nɛ:<Yɔhana pɛli shɔ batizima a mii, ama a yɛ pɛli shɔ batizima a Ɗa suru.> 17 Pɛ nizɛ Ɗalapa ã shɔ gbeteyi ɓa Yahudawa ɓa vi zali a ukɔni naa ukɛ ã sisɨn nɛ a Uɓeyelapa Yesɔ kirisi biini; Nkɔng pi n tɔnɛn zãri Ɗalapa piya!>>

18 Naa i nta vimtɛ, i yaa nyamasinɛ ai bɛli Ɗalaparɛ, i shanɛ,<<Shɔ gbeteyi ɓa Yadudawa ɓa Ɗalapa ã nyabatɛ i kɔsi sisɨn i yaa ruuvini pɛlinɛ aru i kpaa ɔ̃nɛ a suruni.>>

Shɔ Ɗa gɨnnɛ a Antiya

19 Gãsi shɔ gbeteyi ãsisɨn a Ɗabii shɔ gbeteyi sãtirɛ aru raatasinɛ gbete shɔ pɛliyɛ a ɗagbete shɔ nyo Istifanu yɛ. Shɔ gãsiyi i yurɛ yɛnɛ tipi pinitiya a Sapuru, a komoo Antiya, i ɗɔgbeteyi geli Yahudawayi kɔ sheeli Ɗa nyaruubii. 20 Ama gãsi shɔ gbeteyi ãsisɨn Ɗabii, shɔ gbeteyi a Sapurus a Sayirin, i yɛ Antiya rɛ i nwari shɔ gbeteyi ɓa Yahudawa ɓa Ɗa nyaruubiirɛ, i ɗɔgbete geliyi ruu tɔ̃vɨn ayuu Uɓeyelapa Yesɔ nyaruubii. 21 Uɓeyelapa kaka si a yini, a shɔzɛ waanɛ i ã sisɨnrɛ a Ɗabii, i sɔɔ Uɓeyelapa ɗɔbiirɛ.

22 Ruu vigbete si ɗɔyɛnɛ tipi Antiya to shɔ gbeteyi gɨn Ɗalapa shorɛ a Urushalima. Kɛɗɔn shɔ Ɗa gɨnnɛyi i sho Barnaba yɛnɛ tipi Antiya. 23 Naa atɛ a zɛ nɔgbete Ɗalapa tasi shɔ vɔɔ susãritɛ a bi, a nta yɛti purutɔ, a geli ruutɔ kpai nɛi ãsisɨntɔ a Uɓeyelapa nii a sisɨn gbete. 24 Barnaba u si shɔ tɔ̃vɨn, u Ɗa suru aɗɔn fɛ̃ɛm, a shɔzɛ waanɛ i sɔɔ u Uɓeyelapa ɗɔbiirɛ.

25 Kɛɗɔn Barnaba yɛ Taasurɛ aru u kã Shawulu ɗɔ. 26 Naa kpautɛ, a n-tiukɛ Antiya, a saa gbete sɔ̃ɔ̃li, i ziti piti i kpazɔɔ a shɔ gbeteyi ãsisɨn Ɗabiini, ai mati shɔzɛ waanɛi virɛ. A Antiya kɔ shɔ gbeteyi ãsisɨn a Ɗabii shɔ gai ɓaanɛ rɛ nɛ Kirisa.

27 A ɗaukɔ gãsi janyagadiyi yurɛ a Urushalima yɛnɛ Antiya. 28 Shɔzɛ gbete ai tetteni u niinɛ Agabu, Ɗa suru ãu kakarɛ a yurɛ nwanya a shanɛ vanwɔ yɛ shɛtɔ a koo kpai, vim pɛli a saa gbete Kalaudiyu si kpati yɛ. 29 Kɛɗɔn Yesɔ jadɔɔyi marɛ nɛ kopiya ji nɔgbete u kaka sãyɛ, nɛi yɛ dɔ̃si ɓɛzɔɔyi shɔ gbeteyi ã sisɨn naapɔ̃sinɛtɔ a Yahudiyani. 30 I pɛlirɛ nankɔ, kɛɗɔn i shoshi shɔpẽniyi a jaa Ɗa saaurɛ a Barnaba a Shawulu naa.