1 Akɨnti lee taati Festu to tipi Yahudiyarɛ, a yurɛ a Kasariya yɛnɛ Urushalima. 2 Aɗɔwakɔ shɔlansi a wɛrɛ Ɗa a yupɛ̃ni Farasiyayi i wuli Bulus rɛ au ɗɔbii, i gaki Festu rɛ nɛu 3 pɔ̃rɛ shɔu sɔɔri Bulus Urushalimarɛ, aru si matɛttɔ nɛ shɔ wɔɔyi i nyou vɔrɔ a nyaba. 4 Festu kasinya nɛ, <<Bulus ɔ̃ shɔ jaahɨm a Kaseriya, yɛ ɔ̃ ɓa ɗɔkɔkɔ ɓa n ang yuu n yɛn yɛ ji ɗɔwakɔ. 5 Aru nankɔ ɔ yupɛ̃niyi i a pɛ a nkɔni, i wuluurɛ naa kɛ pɛli viwɔɔ nɛ kɔ̃linɛni.>>

6 Akɨnti gbete Festu ɔ̃tɛ lee maantaa yɛnɛ kopi ai ɗɔbii, a sɔɔ tipi Kasariyarɛ. A dii ɓuru a ɔ̃rɛ la-ɔ̃nɛ ruuyeerinɛ, kɛɗɔn ãsi-nyarɛ nɛ shɔu n ti Bulus nɛ ang ɗekɨn. 7 Naa Bulus totɛ, a Yupɛ̃ni Yahudawa gbeteyi shɛ a Urushalima i kɨntiurɛ atette, i ɗɔgbete wuli ruukɔ̃linɛ au yuu fɛ̃ɛm, gbete i ai yuu i ji zɛnɔɔ tasinɛ dɔɔɓa.

8 Ama Bulus rau yuu a shanɛː <<N ji pɛli nya ãsinɛ Yahudawayi ruuvini ji ɓa, ko wɛrɛ Ɗa n ji pɛliyi ruuvini ɓa, ko tipi kayisar n ji pɛliyi ruuvini ji ɓa.>>

9 Ama Festu kasinɛ Yahudawayi nɛi nta sisɨn puru, a hɨ Bulus nɛ, <<A kasitɛ a yɛ Urushalima shɔu yeeraa ruu ang ɗekɨn a ɗɔwakɔ aru vimiyi ya? >>

10 Ama Bulus shanɛ, <<N shi a kayisar jaa ruuyeenɛ, pɛ tɔ̃vɨn shɔu yeering ruu jo a ɗɔnkɔ, n ji pɛli Yahudawayi ruukɔ̃linɛ wɔɔ ji ɓa, moko a yuu a zɛ tɛjitɔ. 11 N kɛ ka nya-ãnɛ Musa nɛ ang pɛli vigbete yɛtɛ nɔgbete shɔu nyon vɔrɔyɛ, n yɛn ɓɛ̃ɛ̃ ɓa shɔu nyonrɛ ɓa, ama ruu tɔ̃vɨn ji ɔ̃ ɓa a vi gbeteyi i wulingni ɓa, shɔ wɔɔ yɛ ãng dɔɔɓa ai naani ɓa, a gakitɔ shɔu turɛn a wuling a kayisar ɗɔbii.>>

12 Akɨnti gbete Festu naki-ruutɛ au shɔruu gelinɛyini, a kasinya nɛ, << A gakitɛ nɛn n ting a kayisar ɗekɨn nya, dɔdɔrim a yɛ yɛkɛ kayisar ɗɔbiikɔ.>>

13 A lewɔɔ kpati Agiripa a kpati Banis i a Kasariya nɛi tɛ Festu naa. 14 Akɨnti gbeteyi ɔ̃tɛ lee waanɛ a ɗɔuni, kɛɗɔn Festu tasi kpati dɔɔ Bulus ruubiirɛ: a shanɛ, <<Jaa wɔɔ aɗɔn gbete Felis yasin a jaahm. 15 Aɗagbete n si a Urushalimayɛ shɔlansi a wɛrɛ Ɗa a Yahudawayi yupɛ̃ni dɔlaa i wuli jaaurɛ ang ɗɔbii, i gaking rɛ nɛn yeeriu au yuu. 16 Ama n geliyi n-tɛ au nakoo Rooma u ji yeruu jo a yuu shããni ɓa, naa shɔ gbete shɔ wuluurɛ ji ɔ̃ ɓa a ɗɔmni ɓa, setɛ shɔ ntiutɛ a shɔ gbete i wulu ɗekɨn, i ɗɔ gbeteyi zɛ zɔɔ a nɔɔ, kɛɗɔn shɔu ãu naarɛ u nwanya naa kɛ zɛnɔɔ u yuu raanɛnɛ u raarɛ. 17 Naa i aa ɗɔmtɛ, n ji yisi ɗaa ɓa, a dii ɓuru n ɔ̃rɛ ayuu la-ɔ̃nɛ ruyeenɛ ang pɔ̃rɛ shɔ n ti jaaurɛ. 18 Naa shɔ gbeteyi wuli ruu i yutɛ, ama i ji wuliu ɓa ayuu vi tɔ̃vɨn gbete n pɔ̃ ang sisɨn yɛɓa. 19 Ama i masinya a Bulus ayuu vi wɔɔ ai nyaba gɨnnɛ, aru shɔ gbete vɔ tɛttɔ au niinɛ Yesɔ, ama Bulus tasinɛu doo a suruniyɛ. 20 Si nkɔng ma n ang yuu n ji zɛ vigbete n yɛn pɛli aru ruumni ɓa, kɛɗɔn n hɨ Bulus rɛ kasitɛya u yɛ Urushalima shɔu yeeriu ruu aɗɔwakɔ aru vigbete shɔ wuli au yuuni yɛ. 21 Ama Bulus gaki rɛ nɛ shɔu shiri ruum pɛtɔ, shɔu gantɔ see ɗagbete kpati kayisar nwarin ruutɛ, kɛɗɔn n ãsi-nyarɛ n-tɛ shɔu pɔ̃unɛ a ɗɔ ganɛ yɛnɛ ɗagbete shɔ n-tiu kayisar ɗɔbiiyɛ.>>

22 Kpati Agiripa geli Festu nɛ, <<N kɔma n yɛn kasitɔ n nta jaam ruu ang yuu.>>

Festu kasiunya nɛ, <<I yɛ ntau ɓuru.>>

23 A dii ɓuru kpati Agiripa a Banisni i to ɗɔ-ɔ̃nɛurɛ a bassinɛni kirim-kirim, i a a nyazɔ a yupɛ̃ni dɔlaawini wɔsɔ̃n yupɛ̃ni gbeteyi sã komoou yɛ. Kɛɗɔn Festu ãsi shɔ nyarɛ nɛ shɔu n ti Bulus nɛ, shɔ n-tiurɛ. 24 Kɛɗɔn Festu shanɛ, kpati Agiripa a shɔ gbeteyi aɗɔm a ukɔuni kpai, a zɛ jaa gbete aa ɗekɨn tɛya, shɔ Yahudawa gbeteyi aɗɔm a shɔ Urushalimani kpai, i wuliu ang ɗɔbii. i shaati nya nɛ ji tɔ̃ɓa shɔu yau a suruni ɓa. 25 Ama n ji zɛ vi gbete pɛliyɛ au yɛtɛ nɔgbete shɔu nyou vɔrɔyɛ ɓa. Ama aru u au yuu gaki rɛ nɛ shɔu n ting ruu kayisar ɗɔbii, ang kasirɛ n-tɛ shɔu n tinɛ yɛnɛu ɗɔbii. 26 N ruu wɔɔ gbete n zɛnɔɔ kpati Roma beerinɛ au yuuni ɓa. arumkɔ n-tiurɛ awɔ ɗekɨn, Kpati Agiripa, aru akɨnti gbete ɔ kɛ hɨliu ruunɛyɛ, n kpaa vigbete n yɛn bee yɛkɨn. 27 Ang zɛnɛ ɓa tɔ̃vɨn ɓa shɔu dɔ̃ shɔ jaahɨm shɔ ji tasiu ruuvini ɓa.