Atos 21

Bulus Yɛnɛ Urushalima

1 U vasiyinya u sãu nyabarɛ. u to latosi u tɛrɛ yɛnɛ tipi kos; A dii ɓuru u yɛkɛ Rodes, a ɗɔukɔ u yurɛ yɛnɛ Patara. 2 Ji ɗɔwakɔ u kpaa latosi yɛnɛ tipi Fonishiya, kɛɗɔn u to latosirɛ u yɛrɛ. 3 U zɛ tipi Sayipuru, kɛɗɔn u ka a nagang yɛnɛ tipi Suriya, au nokɛ a tipi Taya, a ɗɔ gbete u latosi yɛ nɔsiu viyɛ. 4 Ji ɗɔukɔ u kpaa shɔ sisɨn ãnɛ Ɗa bi wɔyirɛ au ɔ̃ ayini lee maanzii. Kɛɗɔn Ɗa suru kaka pɔ̃yirɛ i geli Bulus nɛ ukɔ yɛ Urushalimanɛ 5 Naa u ɗaa yɛnɛ pɛlitɛ u sã nyabarɛ u yɛrɛ. i piti kpai a ɓesoyini a jaayini, i dɔ̃u dɔɔ a nyaba shɛnɛ komouni, a ɗɔukɔ u ta yugboti piti kpai u gaki Ɗa rɛ. 6 Kɛɗɔn u vasi zɔ nyarɛ, u to ɓuzɨn latosirɛ u yɛrɛ, ikɔma i sã nyaba i sɔɔ wɛrɛ rɛ. 7 U yɛ ɗekɨn a ranɛni yunɛ Taya yɛnɛ Tolemayi a ɓuzɨn latosi, a ɗɔ gbete u gee shɔ sisɨn ãnɛyi a Ɗa bi nyayɛ, au ɔ̃ ayini lee gbete. 8 A dii ɓuru u yurɛ u tokɛ tipi Kasariya, u yɛrɛ u ɔ̃ a Filibu wɛrɛ shɔ Ɗa nyaruubii nwanɛ, shɔ gbete shɔ lɔyiyɛ atette shɔzɛ maazii nɛu ɔ̃ shɔnaapɔ̃nɛ a Urushalima. 9 U jasoroyi aɗɔn nɛ̃ɛ̃ti gbeteyi ji tɛɛ vɔshɔ ɓa, i nwari shɔ Ɗa nyaruubii. 10 Akɨnti gbete naa u ɔ̃tɛ a ɗɔu dɔɔ ziti, kɛɗɔn janyagadi wɔɔ siɗɔn u niinɛ Agabu gbete shɛ a tipi Yahudiya. 11 Agabu arɛ au ɗɔbii, a tuu Bulus visãn maanɛrɛ, a mau dɔɔ au naayini a shanɛ, <<Shompɛ vigbete Ɗa suru shayɛ: Shɔ visãm Yahudawayi yɛ maujo nankɔ a Urushalimani, ai yɛ ãu shɔ gbeteyi ɓa Yahudawa ɓa a naa.>>

12 U a shɔ gãsiyini naa u ntatɛ nam, u gaki Bulus rɛ ukɔ yɛ Urushalimanɛ. 13 Ama Bulus kasinya nɛ, << Ɔ pɛli ivi ɔ nyavɔ kɛ sang sisɨn nɛ viya? N mabii tɛttɔ ɓanɛ aru shɔu mang a Urushalima ko sheeli ɓa, ama n mabiitɛ ko shɔu nyong vɔrɔ a Urushalima a Uɓeyelapa Yesɔ yuu.>>

14 U ji zɛunɔɔ sisɨn kosinɛ dɔɔɓa, kɛɗɔn u zɨnnyarɛ, au shanɛ, <<Mɛnɛ u ɔ̃pɛ nɔgbete Uɓeyelapa kasi pɛlinɛyɛ.>>

15 Naa u ɔ̃tɛ a ɗɔu dɔɔ ziti kɛɗɔn u mabii au yɛ Urushalimarɛ. 16 Gãsi Jadɔɔyi gbete i shɛ a tipi Kasariya i dɔ̃u dɔɔ sɔ̃njo, ai tuurɛ yɛnɛ jawɔ wɛrɛ Maason au yɛ ɔ̃ a wuniyɛ, a Sayipuru, shɔu ãsisɨn tɛttɔ a Ɗa bi tɛ̃ɛ̃tɛ̃ɛ̃.

Bulus a Yakubu ɗɔbii

17 Naa u to Urushalimatɛ shɔ sisɨn ãnɛ a Ɗa bi i tɛu nakaziti. 18 A dii ɓuru Bulus yɛ a ukɔuni nɛn kasi Yakubu zɛnɛ; si shɔpẽniyi wɛrɛ Ɗa i ji aɗɔn kpai. 19 Akɨnti gbete Bulus geeyi nyatɛ, a Bulus tasiyidɔɔ vigbete Ɗalapa pɛli atette shɔ gbeteyi ɓa Yahudawa ɓa wasa-wasa. 20 Naa i nta vigbete Bulus geliyitɛ, i piti i bassi Ɗa niitɔ. Kɛɗɔn i shanɛ, <<Mazɔ̃ Bulus, kɨnnɔɔ pɛ shɔzɛ waanɛ a atette Yahudawayi i ã sisɨntɛ a Ɗa nyaruubiini, i kpai i ã yuu tɛttɔ a nya-ãsinɛni. 21 Shɔ geliyi a ruubii tɛttɔ, nɛ aɗɔ gbete a mati Yahudawa vi shɔ gbeteyi ɓa atette Yahudawa i tipi ɓa, nɛi yaa Musa nya ãsinɛ gɨnnɛtɔ, a geliyinɛ shɔkɔ yeeri jaa shaa nɛ, ko nɛ ikɔi gɨn Yahudawayi nakoonɛ. 22 I yɛ ntatɔ nɛ a atɛ nizɛ. Kɛɗɔn shɔ yɛ pɛli kɛpikoviya? 23 Nkɔ vi gbete u kasirɛ a pɛliyɛ yɛm. Shɔzɛ nɛ̃ɛ̃ti aɗɔm shɔ gbeteyi i tɛɛ tɛttɔyɛ. 24 Yɛ ayini ai ɗɔ yumusinɛ yusɔɔnɛ naa Musa nya-ãsinɛ shayɛ, a shoriyi saa yusɔɔnɛtɔ, kɛɗɔn i yɛ kpaa nyaba yuumonɛ kɛkn. A nyabankɔ shɔyɛ zɛ kɛkn nɛ vigbete shɔ sha aa yuu yɛ, ɓa nizɛ ɓa, ama shɔyɛ zɛ kɛkn nɛ mɔkaa yuu a gɨn Musa nya ãsinɛtɔ. 25 Ama aru shɔ gbete ɓa Yahudawa ai rii shɔ sisɨn-ãtɛ a Ɗabii, u beeriyi sẽkoo tɛttɔ u ãyitɛ nɛ ɔ̃riyitɛ kaka jazɨng akɔrɔ ikɔi shaa vishaanɛ gbete shɔ ã vigbeteyi i suru ɓa, ko kpaa, ko vivaa gbete shɔ zaukɔrɔyɛ, wɔsɔ̃n nɛ ɔ̃ryitɛ kaka jazɨng akɔrɔ ikɔi roonɛ a shɔ soni ko shɔ vɔshɔni.>> 26 Kɛɗɔn adii ɓuru Bulus tuu shɔwiyirɛ i yɛrɛ i sɔɔyurɛ. A Bulus to wɛrɛ Ɗa rɛ a geliyi dii gbete yɛ tuuyi yɛ yɛnɛ lee gbete yusɔɔnɛ yɛ i si nyayɛ, ukɔ ɔ̃rɛ lee gbete shɔyɛ ã viyuu ãnɛ a kopiya yuu.

Shɔ Sã Bulus A Wɛrɛ Ɗa

27 Ama naa dii maazii atɛ lee yisinɛ, gãsi Yahudawayi gbete i shɛ a tipi Asiya i zɛ Bulus a wɛrɛ Ɗa. Kɛɗɔn i shɔli moorɛ ai sã Bulus rɛ. 28 I ɗɔɔ shaati nyanɛ, <<Shɔ Israila! Ɔ pɔ̃siunaa joǃ Shompɛ jaa gbete ra koɗɔpiya u ɗɔgbete mati shɔ vikɔ̃linɛ aru Israila yɛ, aru nya-ãsinɛ Musa, wɔsɔ̃n au wɛrɛ Ɗa. Dɔdɔrim n ti gãsi shɔ gbeteyi ɓa Yahudawa ɓa tɛ a wɛrɛ Ɗa, lɛsi ɗɔ wɔsɔ-wɔsɔmtɛ!>> 29 I sha vim aru si zɛ Bulus tɛttɔ a komoo a Toropimuni a Asiya, ai ɓuzɨn kɔmɔɔ. I tɔnɛ mɛnɛ Bulus tuutɛ yɛnɛ wɛrɛ Ɗa).

30 Kɛɗɔn shɔwi rãɗɔu piti kũri, a shɔwi yurɛ kpai i sã Bulus rɛ i shɛshiurɛ ai wɛrɛ Ɗa. Shɔ ku nyaba wɛrɛ Ɗaurɛ tɛ̃ɛ̃ti. 31 Mooyi i kã Bulus nyonɛ, kɛɗɔn ruum to yupɛ̃ni sojayi shorɛ, nɛ ba raa tipi Urushalimatɛ kpai. 32 Yupɛ̃ni sojau yuu tɛ̃ɛ̃ti a siu yupɛ̃ni gãsiyi a sojayini i yɛ mooyi ɗɔbiirɛ gbãgbã. Naa mooyi zɛutɛ a sojayini, i yaa Bulus waanɛrɛ. 33 Yupɛ̃ni sojau arɛ a sã Bulus rɛ, a ãsi-nyarɛ nɛ shɔ mau a saganya ziti, Kɛɗɔn a hɨ kɛkn nɛ, Jaam ukɔ ɔ̃rɛ piya? Pɛli iviya? 34 Atette mooyi shɔ sha vi tot-tot. Aru shɔ nwalinya bang vim pɔ̃ yupɛ̃ni sɔjaurɛ ji zɛ vigbete a ɗɔ yɛnɛ ɓa, kɛɗɔn ãsiu shɔbiiyi nyarɛ nɛi tuu Bulus rɛ yɛnɛ i wɛrɛ soja gbeteyi i ɔ̃ aɗɔnyɛ. 35 Naa Bulus atɛ ɗɔɔli ai wɛrɛ gbeteyi ɔ̃ni, sojayi i tuu kɛtɔ aru mooyi i nyayusinɛ si bang. 36 Aru mooyi waanɛ i gɨn Bulus akɨnti i shati nyanɛ, <<Shɔ nyɔu nɛǃ >>

Bulus Rau Yuu

37 Naa sojayi ikɛ tuu Bulus nɛ yɛnɛ i wɛrɛ ɔ̃nɛni kɛɗɔn Bulus geli yupɛ̃ni sɔjau nɛː<<A yɛ yantɔ n nwanya a mɔkɔni ya?>>

Yupɛ̃ni sɔjau hɨ Bulus nɛː <<A zɛnɔɔ nya Helina nwanɛ tɛya?>> 38 <<Ɓa moko ɔ̃rɛ jaa gbete au n ti yuyɔrinɛ saa gbete tɛɛyɛ si tɛ̃ɛ̃tɛ̃ɛ̃ a tipi Masar ɓaya, ɓa mɔkɔ a tɛɛsi shɔ yuvɔnyonɛyi ɗekɨn i laa ziti atu kopi ɓa nɛ̃ɛ̃ti a ɗɔgbete laa ɓa ɗɔnni ɓayɛ baya?>> 39 Bulus kasi yupɛ̃ni soja nyanɛ, << N ɓɛɛ shɔ Yahudawa, shɔ yeen a tarsu a tipi Kilikiya, n pɛ jaa tipi komoo tɔ̃vɨn. N gakaatɔ yan pɛ n nwari mooyi nyapɛ.>> 40 Kɛɗɔn yupɛ̃ni sojau ãu naarɛ, kɛɗɔn Bulus yurɛ a shi a dodo a deri mooyi naa nɛi zɨnnya pɛ. Naa mooyi i zɨnnyatɛ, kɛɗɔn Bulus nwariyinyarɛ a nya Aramaya.