Atos 23

1 Bulus taari yupɛ̃ni Yahudawayi nɔɔ abi a shanɛ, <<N shɔbii Israilayiǃ Anɛ naa nam ang sisɨn n yuuyɔrinɛ ɓa ang ɔ̃nɛ tɔ̃vɨn a Ɗalapa ɗekɨn ni ɓa.>> 2 Yupɛ̃ni Hananiya a ãsi shɔ gbeteyi shili maani a Bulus ɗɔbii nya nɛi wau naa nɛ a nya. 3 Bulus geliunɛ, <<Mɔkɔ shɔ kɔ̃nɛlinɛmiǃ A pɛ bi jaa gbete shɔ yo penti puru ɗɔnyɛǃ Mɔkɔ ma Ɗalapa yɛ waatɔ! A ɔ̃tɛ ɗɔgbete a yeerin ruu ayuu nɔgbete laabeenɛ Musa matɔɔ yɛ, a shomni piti a naa Musa nya ãsinɛutɛ a nɛ shɔu waantɔ.>>

4 Shɔ gbeteyi shi a Bulus ɗɔbii maani i geliunɛ, <<A ɗɔgbete a ɗãa Ɗalapa, yupɛ̃ni shɔlansi a wɛrɛ Ɗa?>>

5 Bulus risinya nɛ, <<N shɔbii Israila i ji zɛ ɓa nɛu pɛ yupɛ̃ni shɔlansi wɛrɛ Ɗa ɓa. Ɗalapa nyaruubii shanɛ, Mɔkɔ sha ruukɔ̃linɛ a shɔgbete sãwɔ yɛ yuu.>> 6 Naa Bulus zɛtɛ nɛ shɔ dɔlaawɔ i shɔ Sadukiyawayi shɔ dɔlaa wɔsɔ̃n Farasiyayi, a nwnya a farasiyayi tete a kaka a shanɛ, << N shɔbii shɔ Israilayi, n jo shɔ tipi Farasiya kɔ, Farasiyayi jaa, aru gbete n ã sisɨntɛ, ntɛ vɔrɔyi yɛ yulapatɔ a sàà suruni arumkɔ shɔ yeerin ruu kɛkn a yuu! >> 7 Naa sha ruumtɛ tɛ̃ɛ̃ti, Farasiya a Sadukiyawa ni i gaa zɔ nyamasinɛ, kɛdɔn i kɨnwu vasirɛ. 8 Aru shɔ Sadukiyawayi i shanɛ shɔyɛ yuu ɓa a sàà ni ɓa, nɛ viwɔ sɔ̃n ɓa naa Ɗajashonɛlapa ko suruni ɓa; Ama shɔ Farasiyayi i ã ɓɛɛ sisɨn tɛttɔ ayuu vi taatimini piti kpai. 9 Kɛɗɔn yuyɔrinɛ pẽniba yurɛ atette shɔmala nya ãsinɛ Musa a shɔ dɔlaa Farasiyayi ni, i gaa nya masinɛ i shanɛ, <<U ji kpaa jam ɓa a ruu kɔ̃linɛ wɔni ɓa. Mɛnɛ Ɗa suru ko Ɗajashonɛlapa wɔyi ikɔyi nwanyarɛ awuni!>>

10 Naa yupɛ̃ni sojau zɛtɛ nɛ ruu nwatɛ waanɛ, seeti pɛliutɔ nɛ shɔwiyi i yɛ ntali Bulus rɛ sekɛ-sekɛ. Kɛɗɔn yupɛ̃ni sojau ãsiu sojayi nyanɛ, sojawiyi nodiinɛ i raa Bulus a shɔwiyi naa a kaka i n tiu sojayi wɛrɛ.

11 A zɨmbauni Uɓeyelapa arɛ a shi Bulus ɗɔbii ageliunɛ, <<Mɔkɔ nta seetinɛ! A shi tɛttɔ ang yuu a Urushalimani, ɔ̃raatɛ kaka jazɨng akɔrɔ a pɛli sɔ̃nji nankɔ a tipi Roomani.>>

Yahudawayi i manya nɛi nyɔ Bulus vɔrɔ

12 a dii ɓuru Yahudawayi gãsiyi i toli nya i maruu nɛ yɛ nyo Bulus vɔrɔ. I tɛɛrɛ nɛ yɛ shaavi ɓa, nɛ yɛ ɓoo ɓa setɛyi nyo Bulus vɔrɔtɛ. 13 Shɔzɛ gbeteyi maruu kɔ̃linɛu i tɛɛ shɔzɛ lazititɔ. 14 Kɛɗɔn i yurɛ i yɛ shɔlansi wɛrɛ Ɗa a gãsi shɔ shɔpẽni dɔlaayi ɗɔbii i geliyinɛ, << U teetɛ kpai nɛ, u yɛ shaa viwu ɓa setɛ u nyo Bulus vɔrɔtɛ 15 Dɔdɔrim ɔkɔ a shɔpẽniyini ɔ shonya a yupɛ̃ni Roman ɗɔbii nɛu ntiɔ Bulus arɛ, ɔ pɛli naa ɔ kasiu ruuwɔ ntanɛ au yuuni totti, ama u maa ɓɛɛ bitɛtɔ u yɛ nyou vɔrɔ si ji towɔ ɗɔbii ɓa.>>

16 Ama naa Bulus ɓɛɛnaa jaa nta vigbeteyi maa yɛtɛ, yurɛ a yɛ sojayi wɛrɛ pẽnibau a geli Bulus ruurɛ. 17 Kɛɗɔn Bulus ɓaa yupɛ̃ni sojawɔ nya ageliunɛ, <<Tu jakasam pɛ a n-tiu a yupɛ̃ni ɗɔbii u ruuwɔ dɔni kasiu gelinɛ.>> 18 Sojau tu jakasaurɛ a n-tiu u yupɛ̃ni soja ɗɔbii a shanɛ, <<Shɔ jaahm Bulus ɓanya a gaking rɛ nɛn n ti jakasam pɛ aa ɗɔbii, aru gbete u nya shanɛ wɔɔ ɗɔn au kasaa gelinɛyɛ.>>

19 Yupɛ̃ni sojau sã jakasau naarɛ a gɔ̃u kagbete a hɨunɛ, <<A kasin ivi gelinɛ viya?>>

20 Jakasau geliunɛ, <<Yupɛ̃ni Yahudawayi maruu tɛttɔ nɛ a gadi ɓuru i yɛ arɛ i gakaa rɛ nɛ shɔ n ti Bulus pɛ ai yupɛ̃niyi ɗekɨn, nɛi yɛ pɛli naa mɛnɛ yupɛ̃niyi kasiu ruuwɔ hɨlinɛtɔ tot-tot. 21 Ama mɔkɔ weshoonɛ ai nyani, aru shɔzɛ gbeteyi tɛɛ lazititɔ shɔ gbeteyi yɛ ɓu a nyaba i ɗɔgbeteyi gauyɛ. I tee tɛttɔ nɛi yɛ shaa vi ɓa nɛi ɓoo ɓa setɛ i nyou vɔrɔtɛ, i maabii tɛttɔ nɛi pɛlitɔ, ama dɔdɔrim i gaakɛ vigbete aa nya ntanɛ.>>

22 Yupɛ̃ni sojau geli jakasau nɛ, << Mɔkɔ geli shɔwɔnɛ nɛn gelin ruumtɛ.>>A ã jakasau naarɛ yarɛ.

Shɔ n ti Bulus gɔmna Felis ɗɔbii

23 Kɛɗɔn yupɛ̃ni sojau ɓau yupɛ̃ni sojawɔyi ziti nya a gelinɛ, <<Ɔ mabiinɛ ɔ tu soja laa kopi ɔ yɛ tipi Kaisariya a shɔ gbentɛ̃yini laataa atu kopi, a shɔ shalaayini laa kop, ɔ mabiirɛ ɔ yɛ yaa ɗɔm a zɨmɓa si gɨnɗadɔɔ yɛtɛ maanɛ̃ɛ̃. 24 Ɔ kã gbentẽ gãsiyi gbete Bulus yɛ gẽ aɗɔnyɛ yɛnɛ gɔmna Felis ɗɔbii a yukɔnɛ yɛ kpau ɓa nyabani yɛ.>> 25 Kɛɗɔn yupɛ̃ni sojau beeri gɔmna Felis sẽkoo naa shɔmː

26 Yunɛ kalaudiyus Lisiyasi, yɛnɛ yupɛ̃niba gɔmna Felis, n gee a nyatɛ fɛ̃ɛm.

27 Jaam shɔ Yahudawayi sãurɛ si ɓauvɔrɔ nyotɛ maani, n yurɛ ang sojayini gbãgbã n raurɛ, aru n ntarɛ nɛu pɛ jaa tipi Rooma. 28 Si n kasirɛ n zɛ vigbete i sãu au yuuni pɛ, ama n turɛ n n-tiu ai yupɛ̃niyi ɗekɨn. 29 N kpaarɛ u vigbete pɛliyɛ au yɛ pɔ̃rɛ shɔu nyo vɔrɔ ko shɔ ɓau a jaahm yɛ ɓa, vigbete i ɗãu au yuuni yɛ jo ai ruu nya-ãsinɛ.

30 <<Naa gelintɛ nɛi manyatɛ au yuu nɛi kasiu vɔrɔ nyonɛ, n dɔ̃u naa kɛkɨn aa ɗɔbii gbãgbã, n geliu shɔnɔpɔ̃yi tɛttɔ n-tɛ i yeeriu ruujo aa ɗekɨnkɔ.>>

31 Arumkɔ sojayi i tuu Bulus rɛ naa gbete shɔ ãsiyinyayɛ yɛnɛ Antipatiri a zɨmba. 32 A dii ɓuru soja gbeteyi raa a dɔɔ yɛ i yaa soja gbeteyi shɔ gbentẽ gẽnɛi nɛi yɛ ɗekɨn awuni, ikɔma i sɔɔ sɔ̃npɛ i wɛrɛ soja pẽniɓa. 33 I tuurɛ yɛnɛ tipi Kaisariya, i ã gɔmna Felis sẽkoourɛ, i yasiu Bulus rɛ a naa.

34 Naa gɔmna Felis ɓali sẽkooutɛ a hɨ Bulus nɛ, a pi jaa tipi shɔpiya? Naa ntatɛ nɛu pɛ jaa tipi Kilikiya, 35 a shanɛ, <<N yɛn weshootɔ aa nyani aɗagbete a shɔnɔpɔ̃yi kaanɛ.>>Kɛɗɔn gɔmna ãsi nyarɛ nɛ shɔu pɔ̃u a ɗɔ gbete gɔmna Hirudu ɔ̃yɛ.