1 A knti vim Bulus yaa Atina rɛ a yɛkɛ Koranti 2 A ɗɔwakɔ kpaa shɔ Yahudawa wɔɔ u niinɛ Akila, shɔ yeeu a Pontu. Akila a ɓɛso Briskila ni i ɓɛɛ anɛ a tipi Italiya siyi ji ɔ̃ ɓa dɔkɔkɔni ɓa, aru Kalaudiyu ãsinya nɛ ko-pi Yahudawa shɔpiya u yaa tipi Roomatɔ. Bulus yɛrɛ ai ɗɔbii, 3 aru siu vishonɛ pɛ gbete a ikɔ ni vihãnɛ tɛnti, kɛɗɔn ɔ̃rɛ a pɛli vishonɛrɛ ikɔ ni a nyazɔ 4 Ko-pi lee susunɛ shɔpiya Bulus naki ruutɔ a Yahudawayi ɗɔ-ɔ̃nɛ, aru Ɗa nyaruubii, pɛli-nyaba nɔgbete sã Yahudawayi a shɔ gbeteyi ɓa Yahudawa ɓa i yuu.

5 Naa Sila a Timotini i atɛ a Makidoniyani, Bulus ã-yuu gɔɔli aru u nwari shɔ Ɗa-nyaruubii, u ɗɔ gbete tasi Yahudawayi nɛ, Yesɔ kɔ ɔ̃rɛ Shɔshɔraanɛ. 6 Ama Yahudawayi i masi Bulus nyarɛ ai sha vikɔ̃linɛ au yuu, kɛɗɔn Bulus kuti zɛburu au fãrã a geliyi nɛ, <<Ɔkɛ niinɛ, n naa ɓa ɓuzɨn ni ɓa ɔkɔɔ kãjo awɔ yuu, n naa ɓa ɓuzɨn ni ɓa, dɔdɔrim yɛnɛ ɗekɨn n yɛkɛ shɔ gbeteyi ɓa Yahudawayi ɓa ɗɔbii.>> 7 A kɨntiuni Bulus yaa ɗɔurɛ a yɛkɛ jawɔɔ wɛrɛ u niinɛ Titu Jusitu, au Bassi Ɗalapayɛ, u wɛrɛkɔ pɛsi Yahudawayi ɗɔ-ɔ̃nɛrɛ 8 Kiripu yupɛ̃ni a Yahudawayi ɗɔ-ɔ̃nɛ, ã-sisɨnrɛ a Uɓeyelapa biini, au shɔwɛrɛni kpai, a gãsi shɔgbeteyi korantini waanɛ i nta Bulus nyanwanɛ, i ã-sisɨnrɛ au nyani, shɔ pɛliyi Batizima rɛ.

9 Lewɔɔ a zɨmba Uɓeyeylapa geli Bulus a nɔɔrinɛ nɛ,<<Mokaa nta-seetinɛ, yɛ ɗekɨn a shɔ Ɗa-ruubii nwarinɛni, mokaa ɔ̃nɛ nyani, 10 n a mokoni, shɔwɔɔ yɛ lɛsaa dɔɔ ɓa, aruiviya shɔzɛ waanɛ gbeteyi i a koomon pɛ n maa.>> 11 Aruumkɔ Bulus ɔ̃rɛ a ɗɔu saa gbete a shɛlɛ maangbete, u ɗɔgbete matiyi Ɗa-nyaruubii yɛ. 12 Ama a ɗagbete shɔ Rooma i ã Gaaliyo kpanti a tipi Akaya yɛ, Yahudawayi i toli yuu i sã Bulus i n-tiu ɗɔ gbete shɔ yeeruu aɗɔnyɛ. 13 I shanɛ, <<Jaam u ɗɔgbeteu pɔ̃ shɔ nɛ, shɔu gɨn Ɗalapa a nyaba gbete nya-ãsinɛ Musa zãritɔ.>>

14 Si Bulus nɛn kasikɛ-nya, kɛɗɔn Gaaliyo geli Yahudawayi nɛ, <<Si pɛlimpɛ ruukɔ̃linɛ wɔɔ, ko ruuvini-vini, n si weshotɔ awɔ nyani. 15 Asitɛɗɔkɔ nya-masinɛkɔ sheeli ayuu ruuyi, a niiyi, awɔ nyaãsinɛ, ɔ̃rɔɔtɛ kaka jazɨng a kɔrɔ ɔ yisi awɔ nɔɔ. Ɓa nkɔng yɛ ɔ̃rɛ shɔ ruuyeenɛ ɓa.>> 16 A nyikiyirɛ a jàà ruuyeenɛni. 17 Kɛɗɔn i kpai i sã Sostanu rɛ yupɛ̃ni Yahudawayi i ɗɔ ɔ̃nɛ, i waurɛ a ɗekɨn jàà ruuyeenɛukɔ, ama vim ji daa Gaaliyo ɓa a biini ɓa.

18 Bulus ɔ̃rɛ a Korantini lee waanɛ a shɔ gbeteyi i ã-sisɨn Ɗa biini, kɛɗɔn a to latosirɛ a priskila ni wɔsɔ̃n Akila i sã nyaba yɛnɛ Suriya. Ama i ɓɛɛ yuunɛ Bulus kouyuutɔ a Kankiriya aru gbete teetɔ. 19 Naa i to Apisa tɛ, Bulus yaa Briskila a Akila ni a ɗɔwakɔ, a to Yahudawayi i ɗɔ-ɔ̃nɛrɛ u ɗɔ gbete masinya a yini. 20 Kɛɗɔn i gakiu rɛ nɛu ɔ̃pɛ toti a yini, ama ji kasiɓa. 21 Aɗagbete yɛ yaayikɛtɔ, a shanɛ,<<Ɗalapa kɛ kasinɛ n yɛn sɔɔtɔ.>>kɛdɔn to latosirɛ a Apisa.

22 Naa nɔtɛ a Kaisariya, yɛ Urushalimarɛ a gee shɔ Ɗa gɨnnɛyi i nyarɛ, kɛɗɔn a yɛ Antiya kɛkn. 23 A knti gbete ɔ̃tɛ dii sekaa a ɗɔuni, kɛɗɔn yuurɛ zaa tipi Galantaya a tipi Pirijiya, u ɗɔgbete masi shɔ gbeteyi i gɨn Ɗalapa i biiyɛ,

24 Kɛɗɔn Yahudawa wɔɔ u niinɛ Apolo, gbete shɔ yeeu a Alezandariya yɛ, arɛ a Apisa, u pɛ shɔ nyanwanɛ waanɛ, zɛ Ɗa-nyaruubii tɛttɔ fɛ̃ɛm. 25 Shɔ matiu vi tɛttɔ a nyaba a Uɓeyelapani, mabii waanɛ a nyanwanɛni, mati shɔ ɓɛɛ ji vi tɔ̃vɨn gbalas a Yesɔ yuu, ama zɛ ɓɛɛ ji ruu Yɔhana Batizima kɔ sheeli. 26 Kɛɗɔn gaa Ɗa-nyaruubii waanɛrɛ ji nta seti ɓa a Yahudawayi i ɗɔ-ɔ̃nɛni ɓa, naa Briskila a Akila ni i nta ruugbete shatɛ, i tuurɛ i tasiudɔɔ ruu Ɗa-nyaruubii sɔ̃nrɛ fɛ̃ɛm. 27 Apolo kasi tipi Akaya tɛnɛrɛ, shɔ Ɗa gɨnnɛyi gbete i a Apisa i pɔ̃siu naarɛ i beeri shɔ Akayayi sẽkoorɛ, nɛi tɛu naa kaziti, naa to ɗɔwatɛ, pɔ̃si shɔ ɗɔwiyi naatɔ waanɛ shɔ gbeteyi i ã sisɨn a nyaba gbete Ɗalapa nta shɔraayɛ, 28 Masi nyatɔ waanɛ a Yahudawayini, Ɗa-shaariurɛ a shɔ ɗekɨn, a nɔgbete tasiyi a Ɗa nyaruubii nɛ Yesɔ kɔ ɔ̃rɛ kirisi.