1 Yesɔ sɔatɛ a ɓooti Urudu a Ɗalapa suruni abi, Ɗalapa suru turɛ ntiu jalaa. 2 A ɗɔ japɛ̃pɛ̃ɛ̃ ntau sisɨn dɔɔ laziti. A ɗauni piti kpai ji shavi wɔ ɓa.

3 Japɛ̃pɛ̃ɛ̃ geliunɛ, <<akɛ ɔ̃nɛ Ɗalapa jaa, risi tarim u ɔ̃ borodi.>>

4 Ama Yesɔ kasi nyanɛ, << Ɗalapa nya ruubii shanɛ, ɓa borodi kɔ raa Shɔrɛ shɛli ɓa.>>

5 Kɛɗɔn japɛ̃pɛ̃ɛ̃ tuu sɔ̃n yɛnɛ ɗɔ wɔɔ a lapa a tasiu vinoshɛ̃- noshɛ̃ a koo piti kpai, geliunɛ, 6 <<N yɛn ãa vim piti kpai a kakani,>>Japɛ̃pɛ̃ɛ̃ geliunɛ, Shɔ ãn tɛttɔ a naa kpai, n yɛn ã sɔ̃njo shɔgbete n lɔyɛ. 7 <<Vim piti kpai yɛ ɔ̃ a ɓɛɛ kɔ, kɛɗɔn, a kɛ sɔ̃sinɛ ang ɗekɨn a geeng nya.>>

8 Yesɔ kasi nyanɛ, <<Ɗalapa nya ruu bi shanɛ, a gee jo Ɗalapa nya kɔ shɛli!>>

9 Kɛɗɔn japɛ̃pɛ̃ɛ̃ turɛ yɛnɛ Urushalima a pɔ̃u a yujaa Ɗa gakinɛ gagala, a geliunɛ, << Akɛ ɔ̃nɛ Ɗa jaa, kɔbii nɛ aɗɔm a tasi tipi,>> 10 aruumkɔ Ɗalapa nya ruubii shanɛ, <<Ɗalapa yɛ ãsi nya au jashonɛ lapayi bi nɛi kɔatɔ tɔ̃vɨn.>> 11 Sha sɔ̃n nɛ, <<Ɗa jashɔnɛ i yɛ sã a naatɔ aru a yɛ kɔdɔɔrɛ a tari.>>

12 Kɛɗɔn Yesɔ kasi nyanɛ, <<Ɗa nya ruu bi shanɛ, <Mɔkɔ nta Uɓeyelapa a Ɗalapa sisɨn nɛ.> >>

13 Naa japɛ̃pɛ̃ɛ yisi Yesɔ sisɨn ntanɛ a vi totot, a yau sɔ̃nrɛ.

14 Yesɔ sɔɔ Galili rɛ a Ɗa suru ni bi, u ruubii ra tipiu piti kpai. 15 Mati shɔvi a ɗɔgbete Yahudawa i toli nya i nwaa ruu yɛ, kopiya bɛliutɔ.

16 Kɛɗɔn Yesɔ yurɛ yɛkɛ Nazara, ɗɔgbete bayɛ, naa gbete pɛli lee-lee yɛ a lee susunɛ yɛ jaa Ɗa gakinɛ. Yulapa a ɓali Ɗa nya ruubii. 17 Shɔ ãu vigbete shɔ bee vi aɗɔnyɛ Ɗa jashonɛ Ishaya beeyɛ a naa ɓɛlirɛ a kpaa ɗɔgbete shɔ beenɛ:

18 <<Ɗa suru u a nkɔni,

aru ukɔ lɔnrɛ nɛn n ti shɔraayi Ɗalapa nya ruubii.

Ukɔ shonrɛ nɛn dɔti nya nɛ shɔgbete shɔ mayi yɛ shɔ yayi naatɛ

a shɔnogbãti i nɔɔ ɓɛlitɔ;

nɛn kali shɔgbete a shɔ meyi yɛ naatɔ,

19 nɛn geli shɔ nɛ

leu atɛ gbete Uɓeyelapa yɛ raa u shɔzɛ yɛ.>>

20 Yesɔ li vigbete shɔ bee vi aɗɔnyɛ a ã shɔ jaa Ɗa tɛtti a naa a ɔ̃ kɛ tipi. Shɔgbeteu ai si jaa Ɗa i tɛ̃ɛriu nɔɔ bi pururu kpai, 21 Naa Yesɔ geliyitɛ nɛ, <<Ɗa nya shanɛ ɔ̃nɛm nizɛ awɔ shoni nɔgbete ɔ ntarɛ shɔ ɓali yɛ.>> 22 I piti kpai i bɛliu rɛ a ɔ̃rikɛ vibii zaanɛ au nya shanɛni. I shanɛ, << N ɓa Yusufu ɓɛjaa ɓaya?>>

23 Yesɔ geliyi nɛ, <<N zɛtɛtɔ ɔ yɛ gelin ruɓusinɛmtɔ, Likita gataa yuunɛ.>> Ɔyɛ gelin wɔsɔ̃n nɛ, nɛn yɛrɛ nɛ pɛli vibii zaanɛm jo a wɛrɛ koo naa a pɛli ɓam Kapanahum yɛ.

24 N gelɔɔ vimtɛ, <<Yesɔ sha sɔ̃n tɔti,>> Ɗa jashonɛ shɔ basiyi ɓa ai wɛrɛ koo niɓa.

25 Ɔ weshɔpɛ ang nya: si nizɛ kɔ suvɔyi isi waanɛ a Isirela a aɗagbete Iliya usi ɗɔnyɛ, mii siɓa saa taati au ɗiti 3.5 vaawɔ̃ɔ raa koou piti kpai. 26 A nan ni piti Ɗalapa ji sho Iliya ɓa a Isireila shɔwɔ ɗɔbiini ɓa, ama shɔ sho Iliya ɓɛjo a suvɔyi ɗɔbii Zarefat a tipi Sidɔn. 27 Shɔzɛ waanɛ ai ɓoraa a vɔrɔ kobii shɔgbete isi a tipi Isirela aɗagbete Ɗa jashonɛ Iliya usi a ɗɔuniyɛ; <<I ji gati ɓa ko gbete, ama ɓɛɛ Naaman shɔ tipi Siriya kɔ gati ɓɛjo sheli.>>

28 Naa shɔgbete isi a ɗɔgbete Yahudawa i toli nya i sha ruu ɗɔnyɛ i nta vimtɛ, i sisɨn lɛsi waanɛ, 29 I yulaparɛ i gɔ̃ Yesɔ rɛ i shɛshiu ɓili kati ai koomɔɔni, i turɛ i ntiu yukɔpɔ lapa aɗɔgbete shɔ marii komoo aɗɔnyɛ. i kasinɛ nɛi dɔ̃ukɛ a nyepuru tipidi. 30 Ama Yesɔ tɛɛ a mɔɔyi atette a sãu nyaba a yɛrɛ.

31 Kɛɗɔn Yesɔ yɛkɛ Kapanahum, komɔɔ gbete a Galili yɛ, aɗɔgbete mati shɔvi a lee susunɛ. 32 I piti kpai viwu ɔ̃rikɛ vibii zaanɛ au vimatinɛ ni, aru Yesɔ nwanya a kakani.

33 A ɗɔgbete Yahudawayi toli nya aru ruu waanɛ shɔwɔ siɗɔn a raamani bi; kɛɗɔn kanya a kakani, 34 A shanɛ,<<A! kasi ivi a ukɔ ni viya, Yesɔ shɔ Nazara? A aɗɔm nɛn lɛsiutɔ ya? N zɛtɛtɔ ko a piya: Apɛ Ɗalapa jashonɛ lapa wɔsɔ-wɔsɔ!>>

35 Yesɔ lasi, raamãu nyanɛ<< Zɨnya nɛ a shɛ jau biini yaunɛ!>> Raamau lɔki jau a tipi a shɛrɛ au biini ɓau lɛsinɛ niɓa.

36 Viwu ɔ̃ri shɔwi vibii zaanɛ ai geli zɔnɛ,<<Shɔmpɛ ruu gbete pi nankɔ piya? Nya ãsinɛ a kakani jam ãsi raama nyanɛ i shɛkati i shɛrɛ viya!>> 37 Yesɔ nya ruubii raa ɗɔ a tipiu kpai.

38 Yesɔ yaa ɗɔgbete Yahudawayi i toli nya i nwa ruu ɗɔn kɛ a yɛ Siman wɛrɛ. Siman ɓɛkpɛni usi a vɔrɔ norini, shɔ nwari Yesɔ nyarɛ a yuuni. 39 Yesɔ yɛrɛ a shi au nya ɗɔ roonɛ a geli noriu nɛ u yau naa nɛ, suu yulaparɛ a kãriyi vishanɛrɛ.

40 A kɨntiuni a ɗaɗarɛ shɔgbete ai ɓɛsa isi vɔrɔyɛ i n-tiyi a Yesɔ ɗɔbii; pɔ̃si naarɛ i gatirɛ piti kpai. 41 Raama shɛki a shɔzɛ bi waanɛ, <<I kaa nyanɛ apɛ Ɗalapa jaa!>>

Yesɔ ãsi raamawi nya ji yai ɓanɛ i nwanyarɛ ɓa, Aru viya i zɛtɛttɔ nɛu ukɔ kirisi.

42 Naa dii katɛ Yesɔ ya komɔu kɛkati, a yɛkɛ ɗɔgbete yɛ ɔ̃ a yɔbm yɛ. Shɔ gau ɗɔ kãnɛrɛ, naa i kpautɛ i kasiu zãrinɛ nɛu yɛ ɗɔwɔɓa. 43 Ama Yesɔ geliyinɛ, <<Ɔ̃rintɛ kaka jazɨng a kɔrɔ n yɛrɛ n nwa Ɗa nya ruubii aru Ɗa kpati roonɛ a komɔɔ wɔyi, aru viya Ɗalapa shonnɛ n pɛlijo ukɔ a koo.>> 44 Kɛɗɔn Yesɔ nwa Ɗalapa nya ruubii a ɗɔgbete Yahudawa i toli nya i nwa ruu aɗɔn a kotipiuni piti, aru pɛ ruumkɔ shɔ shourɛ.