1 Naa Yesɔ yisi shɔ nya nwaarinɛtɛ, a yɛkɛ Kapanahum. 2 Si yupɛ̃ni sɔja Roma wɔ jawɛrɛ gbete u shɔwɛrɛ ntau tɔ̃vɨntɔ; usi vɔrɔ kpɔkpɔk naa kɛ vɔnɛ. 3 Naa yupɛ̃niu nta Yesɔ ruubiitɛ, sho yupɛ̃ni Yahudawayirɛ nɛu ɓau nya u apɛ u gating jawɛrɛ pɛ. 4 I yɛ Yesɔ ɗɔbiirɛ i gakiu nɛ sɔkɔ-sɔkɔ, <<Aru jam tɔ̃ɔtɛ u kpaa a naa pɔ̃nɛtɔ. 5 Ɔriu shɔ biyitɔ u au yuu maariu yahudawayi ɗɔ ɔ̃nɛtɛ.>>

6 Yesɔ yɛrɛ a yini, U siɓa wɛrɛni kpɛkpɛlɛ niɓa a ɗagbete shɔ yupɛ̃ni sojau sho ɓɛsayi nɛi geliutɔ, Shɔmala, mokɔ yɔraa yuunɛ. N jo tesiɓa nɔgbete a yɛ ang wɛrɛɓa, 7 ukɔ sɨnrɛ n zɛnaa n ji tesiɓa n a ɗɔbii ɓa ang yuu ɓa. Ãsi ɓɛjo nya, n jawɛrɛ yɛ gatitɔ. 8 N kɔma n shɔwɔyi naa, sojayi sɔ̃njo ang naani. Nkɛ geli shɔmnɛ, <<U yɛnɛ! see yɛrɛ; Nkɛ geli shɔmnɛ, Apɛ!>> see arɛ; Nkɛ pɔ̃ng jawɛrɛnɛ, <<Upɛli vim! See pɛlirɛ.>>

9 Naa Yesɔ nta vimtɛ, manaa kɛ a nosisɨng; a zaanɔɔ a mɔɔ gbete i gɨu dɔɔ yɛ bi a geliyi nɛ,<<N gelɔɔtɛ, n jo kpaa shɔ sisɨn ãnɛ wɔɓa naa jam niɓa, ko a tipi Isirela!>>

10 Shɔ yupɛ̃niu jashonɛyi sɔrɛ i kpau jawɛrɛu gatitɛ.

11 A kɨntiuni Yesɔ yɛ komɔɔ wɔ gbete shɔ ɓaanɛ Nain, u jadɔyi i gɨu a dɔɔ a mɔɔyini waanɛ. 12 Naa atɛ a nya komɔɔ wuni, shɔ tuu vɔrɔtɛ shɔ kaanɛ awuni. suvɔ jaa sijo jau kɔ sheeli, suu sijo atette mɔɔ pẽniɓau ni. 13 Naa Uɓeyelapa zɛutɛ, ntau raatɔ au sisɨn ni, kɛɗɔn ageliunɛ, <<mokɔ sɨnɛ.>> 14 Kɛɗɔn a zaarɛ a ɗinaa abi vɔrɔuni, shɔgbete i tuu vɔrɔyɛ i shirɛ. Yesɔ shanɛ,<<Jakasam! Yulapanɛ, nkɔng gelaarɛ!>> 15 Shɔvɔrɔu yulaparɛ ɔ̃rɛ a gaa nya nwanɛrɛ, Yesɔ tuu rɛ ã ɓinirɛ a naa.

16 Seti pɛliyi piti kpai i bɛli Ɗa rɛ. I shanɛ<<Nkɔ janyagadi pɛ̃niba atɛ au teteǃ >> I sha sɔ̃n nɛ <<Ɗalapa au shɔbiiyi ɗɔ raanɛtɛ!>> 17 Yesɔ ruubii raa tipi Yahudayi piti kpai.

18 Naa Yɔhana jadɔyi i geliu vimtɛ piti kpai, a ɓa shɔzɛ ziti nya ai tete, 19 a shoyirɛ a Uɓeyelapa ɗɔbii nɛi hɨu nɛ,<<Mɔkaa ɔ̃rɛ shɔgbete Yɔhana shɔ Batizima ãnɛ nwanya au yuu nɛ yɛ arɛ ya? ko u ga shɔwɔ toti ya?>>

20 Naa i atɛ Yesɔ ɗɔbii i shanɛ,<<Yɔhana shɔ Batizima ãnɛ shanɛ u hɨ a pɛ moka ɔ̃rɛ shɔgbete shanɛ yɛ ayɛ ya, ko u ga shɔwɔya?>>

21 A ɗauni Yesɔ gati shɔvɔrɔi jitɔ waanɛ, a vɔrɔni noshɛ-noshɛ, suru kɔ̃linɛni a shɔ nɔgbãtiyini kpai. 22 Yesɔ kasi Yɔhana shɔ Batizima ãnɛ jashonɛ nyanɛ, Ɔ sɔnɛ ɔ geli Yɔhana shɔ Batizima vigbete ɔ zɛyɛ a shɔgbete ɔ ntayɛni; shɔ dɔɔ gbutuyi i raatɔ, shɔ vibiiyi i kpaa gatinɛtɔ, shɔ -shoo gbãtiyi i nta ruutɔ, vɔrɔ yulapatɔ, shɔraayi i nta Ɗalapa nya ruubii jo piti. 23 Ɗa tasi shɔgbete i jo kɔ dɔɔɓa ang yuuni ɓayɛ vɔɔ susãri biini.

24 Akɨnti gbete Yɔhana shɔ Batizima ãnɛ jashonɛyi i yaa ɗɔutɛ, Yesɔ gaa nyanwaanɛ a Yɔhana yuu a mɔɔyi ɗekɨn:<<Ɔ yɛ Yɔhana ɗɔbii aɗɔgbete shɔ ɓa ɗɔm yɛ, ɔ kasi ivi zɛnɛ viya? Ɔ kasi wisi pẽniba gbete sɔrɔ rooriyɛ zɛnɛ ya? 25 Ɔ yɛ ɗɔ ivi zɛnɛ viya? Ɔ yɛ shɔgbete ai tosi fãrã tɔ̃vɨn ɗɔ zɛnɛ ya? Shɔgbete ai tosi iri fãrãn yɛ i nta tɔ̃vɨn i ɔ̃ a kpati nyaba wɛrɛ! 26 Ɔ gelin pɛ, ɔ yɛkɛ ɗɔ ivi zɛnɛ viya? Ɗa jashonɛya? Nn nizɛ, ama ɔ zɛ vigbete au tɛɛ Ɗa jashonɛtɛ. 27 Yɔhana u pɛ shɔgbete a shɔ beeu ruubii a labeenɛ nɛ: <Ɗalapa shanɛ, n yɛn sho n jashonɛ aa ɗekɨn u ɓelɔɔ nyaba tɔ.> 28 Yesɔ geliyi nɛ, n gelɔɔtɛ, Yɔhana tɛɛ jaa gbete shɔ yeeyɛ tɛttɔ piti kpai a banɛni. Ama shɔgbete u pɛ̃tɛ̃rɛ̃ a ɗɔu Ɗa roo kpatiyɛ tɛɛ Yɔhana tɛ banɛni.>>

29 Mɔɔyi kpai i ntau ruutɔ; a shɔ saabɛnɛ tɛnɛyini i kasitɔ nɛ Ɗa nya ruubii pɛ ruu tɔ̃vɨn, i kasirɛ Yɔhana pɛliyi Batizima rɛ. 30 Ama shɔ farisiyayi a shɔmala nya ãsinɛ ni i bɛ̃ɛ Ɗa nya ruubi gɨnnɛ a noni ijo tɛ Batizima gbete Yɔhana pɛli shɔyɛ ɓa.

31 Yesɔ yɛ ɗekɨn nɛ,<<N yɛn tɛsi shɔ jakɨntimiyi kɛ a iviya? I kɛ naa iviya?>> 32 I ɔ̃ naa jajayi gbete i ɔ̃ a nya lumoyɛ. I ɗɔ zɔ nya ɓaanɛ,<<U ɗɔgbete u warɔɔ viyumusinɛyɛ, ɔ ji sasaɓa! U tɔ̃ so vɔrɔ,!>> ɔji sɨnɓa! 33 Yɔhana shɔ Batizima arɛ, ji shaaviɓa ji ɓo mii ɓa, ɔ shanɛ, <<U rãama biini>> 34 Yesɔ shɔzɛ jaa arɛ, shaarɛ a ɓoorɛ,Ɔ shanɛ Ɔ kn nɔɔpɛ jam bi! U shɔvi ãnɛ roo a ɗɔɔ mii ɓoonɛ kɔzai, shɔ saabɛnɛ tɛnɛyi a shɔruuvini ɓɛsa. 35 Ɗalapa sẽrɛ̃ au pɛlinɛni shɔyɛ zɛu tɔ̃vɨn jo a shɔgbete i tɛyɛ bi.

36 Shɔ farisiya wɔ ɓaa Yesɔ nya nɛu a ɗɔ vishanɛ au wɛrɛ, Yesɔ yɛu wɛrɛurɛ a ɔ̃rɛ a shaavirɛ awuni. 37 Aɗɔ komɔɔuni suwɔ si ɗɔuni shɔruuvini kpishik. suu ntarɛ nɛ Yesɔ ɗɔɔ vishanɛ a farisiya wɔɔ wɛrɛ, yulaparɛ a n ti noo gbete u sẽẽ ɗɔn tɔ̃vɨn sũru-sũru a jakotoro lot u saa yuni. 38 A shi a Yesɔ knti, au ɗɔ dɔɔ, u ɗɔ sɨnɛ a miri tɛnɛni au dɔɔ. A sɔ̃u dɔɔ au suyu, a tɔ̃kiu dɔɔurɛ a tɛ̃riu nosũsũrɛ aɗɔn. 39 Naa shɔ farisiya wɔ zɛ vimtɛ, a sha au sisɨng nɛ,<<Jam si tɔnɛ nɛn ɔ̃ jo janyagadi nizɛ, si zɛ sumtɛ ko u piya, gbete au ɗiliu naa abiimyɛ; si zɛ suum ɔ̃nɛ ruuvini gbete ɔ̃yɛtɛ.>> 40 Yesɔ nwanyarɛ a geliunɛ,<<Siman, n kasaa viwɔ gelinɛ.>>

Siman kasi nyanɛ,<<Nn, shɔmala,>> <<gelinɛ.>>

41 <<Shɔwɔyi si ziti i kɔ̃ saa a shɔ saa nyakɔpɔ ãnɛyi naa,>>Yesɔ gaa nɛ. Shɔzɛ gbete wɔ kɔ̃ saa lazɔrɔ laamāāni ɓa māāni (500), shɔzɛwɔ kɔ̃ sɔ̃nkɛ lazɔrɔ laa ziti atu kop (50). 42 Shɔwi nyaba saau sɔrinɛ si ɓa, a yasiyi saaurɛ piti kpai. <<Shɔu yɛ ɔriu ba piya?>>

43 Siman kasi Yesɔ nɛ<<N zɛ naa, shɔgbete au ɓɛ si bang yɛ.>>

Yesɔ risi Siman nyanɛ, a shatɛ tɔ̃vɨn, 44 Kɛɗɔn Yesɔ zanɔɔ a suu bi a geli Siman nɛ,<<A zɛ suum tɛya? N a wɛrɛ, a ji ãng mii ɓa nɛn sodɔɔ awuni ɓa, ama suu sorin dɔɔtɛ au muru a sɔ̃li sɔ̃n au suyu. 45 A ji kɔ̃tin naa ɓa biini ɓa, ama n ɓɛ tɔnɛ a wɛrɛm jo yang dɔɔ tɔ̃kinɛ ɓa. 46 A ji n ting noo zeetung ɓa nɛn sɔ̃ yuu ɓa, ama suum sɔ̃rin dɔɔtɛ a nɔɔ sũrũsũrũ ni. 47 N gelaatɛ, kɛɗɔn, u bɔrɔɔ ruuvini au pɛli ɓam shɔ yasiutɛ. Ama shɔgbete shɔ yasiu ruuvini pẽtẽrẽm yɛ tasi ɔrinɛjo fɛ̃ɛ̃.>>

48 Kɛdɔn Yesɔ geli suu kɛnɛ, <<A ruuvini shɔ yasaa tɛ.>> 49 Shɔgbete ai ɔ̃ a ɗɔɔ vishaanɛ a ɗɔuniyɛ i geli zɔnɛ,<<Shɔm pi au yasi shɔruuvini piya?>>

50 Ama Yesɔ geli suu nɛ, <<A sisɨn ãnɛ raatɛ; yɛnɛ a yɛti puru ni.>>