1 Lewɔɔ siɗɔn shɔ saabɛnɛ tɛnɛ a shɔ ruuviniyini i arɛ aru i nta Yesɔ vimatinɛ, 2 ama Farasiyayi a shɔmala nyaãsinɛ Musa i gaa nya kɨnkɔrɔ nwanɛ i ɗɔgbete shanɛ, jam risiu yuutɛ shɔ ruuviniyi i ɓɛsa, shaa vishaanɛ a yini a ɗɔzɔǃ 3 Kɛɗɔn Yesɔ geliyi kɛ ruɓusinɛmː

4 Shɔ tɔpɛnɛ shɔzɛ gbete awɔ tete nɛu mɛrɛ̃ɛ̃ aɗɔn laa maani kɛɗɔn gbete atete ni nii rɛ, yɛ pɛlikɛ pikoviya? Yɛ yaa mɛrɛ̃ɛ̃ gãsiyi laa nɛ̃ɛ̃ti au jaa kopi tu maannɛ ɓa a ɗɔɔ nya shaanɛ, u kãɗɔɔ mɛrɛ̃ɛ̃ gbete au niiyɛ setɛ kpaa ɗɔtɛ ɓaya. 5 Kɛ kpaa ɗɔnɛ, yɛ nta sisɨn purutɔ u tuu au lakɔrɔ, 6 u n ti wɛrɛrɛ. Kɛɗɔn yɛ ɓaa ɓɛsayi nyarɛ au shɔnyakãsirini u geliyi nɛ, <<Ɔ arɛ ɔ pɔ̃sing naa jo a yɛti puru ntanɛmni, aru n kpaa mɛrɛ̃ɛ̃ gbete niiyɛtɛ.>> 7 Jinankɔ, n gelɔɔtɛ Ɗalapa yɛ nta yɛti puru waanɛ a kolapa aru shɔ ruuvini gbete yaa ruuvini pɛlinɛtɛ, u tɛɛ shɔzɛ laa nɛ̃ɛ̃ti au jaa kopi tu maanɛɛ wɔsɔ-wɔsɔ gbeteyi i ji kãɓa ruuvini yaanɛ ɓa.

8 Yesɔ geliyi ruɓusinɛ wɔɔ sɔ̃nnɛ, <<Shɔu tɔɔpɛnɛ suu wɔɔ u saa gbete shɔ ɓaanɛ siliva Koin aɗɔn kopi, u gbete kɛ niinɛ, ɔ zɛnaa yɛ pɛli kɛpikoviya, suu yɛ dɔɔ yaa pitila u koo wɛrɛu rɛ, u kãli ɗɔɔ ko-piɗɔpiya setɛ kpaa ɗɔtɛ. 9 Naa kɛ kpaanɛ yɛ ɓaa ɓɛsayi nya kpai au shɔ nyakãsirini a ɗɔzɔ u geliyinɛ, <N ɗɔɔ yɛti puru ntanɛ aru n kpaa saa siliva gbete niiyɛtɛ. Ɔ pɔ̃sing naa jo a yɛti puru ntanɛniǃ> 10 N gelɔɔtɛ, Ji nankɔ, Ɗa jashɔnɛyi lapa i nta yɛti purutɔ aru shɔ ruuvini gbete yaa ruuvini pɛliyɛ.>>

11 Yesɔ yɛ ɗekɨn a shanɛni nɛ,<<Jawɔɔ siɗɔn u javɔshɔ ziti.>> 12 Shɔ wujaa geli ɓeye nɛ, <<N kasirɛ a ang a vivɔ gbete a yɛ ang yɛ dɔdɔrimkɔ,>> Kɛɗɔn jau vɔsi ɓɛjaayi zitiwi u vinaa rɛ.

13 A kɨntiuni ji ɔ̃ɓa dɔkɔkɔni ɓa, shɔ wujaa mɛli u vinaa gãsi, a toliu saa a vi gãsiyini kpai a yaa wɛrɛrɛ. A yɛkɛ tipi kpɛlɛ-kpɛlɛ a ɗɔuni, a ɗɔwakɔ nyo sãu piti kpai a nyaɓa sɔrɔɔ a suu kpangtangyi yuu kpai. 14 Akɨnti gbete nyo vi gbete u a wuniyɛtɛ piti. kɛɗɔn vaanwo shɛrɛ waanɛ a tipiuni ko-piɗɔpiya, siu vi sɔ̃nyatɛ kpai. 15 Kɛɗɔn a yɛrɛ kã vishonɛ a shɔzɛ gbete naa, jaa tipiu kɔ, kɛɗɔn jau dɔ̃u naarɛ nɛu gasin ganya au jaa, 16 A kãrɛ nɛn shaa vishaanɛ gbete ganya i shaayɛ, ama shɔwɔɔ ji ãwu viwɔɔ ɓa nɛu shaarɛ ɓa.

17 Akɨntini kpai naa gɨn ruumtɛ au sisɨn a shanɛ, Maye jawɛrɛ piti kpai i ɗɔgbete shaavi i yaa gãsi a tipi waanɛ ama nkɔng yɛm a ɗɔɔ vɔnɛ a nwoniǃ 18 N yɛn yulapa n sɔɔ mayɛ ɗɔbii n geliunɛ, <<Maye n pɛli Ɗalapa ruuvinitɛ a mokɔni.>> 19 N ji yɛɓa nɔgbete shɔu ɓannɛ mɛjau toti ɓa; ama a tunkɛ naa shɔzɛ gbete atette mɛjawɛrɛyi. 20 Kɛɗɔn a yurɛ sã nyaɓa yɛnɛ ɓeye ɗɔbii

Ama siu doo aɗɔ kpɛlɛ a nyaɓa wɛrɛ ɓeye zɛurɛ; raa sã ɓeye rɛ, a yurɛ a kɔ̃ti ɓɛjaa naa abi u ɗɔgbete tasiu ɔrinɛ.

21 Ɓɛjaa shanɛ, <<Maye, n pɛli Ɗalapa ruuvinitɛ, a mokɔni. N ji yɛɓa shɔu ɓannɛ mɛjau toti ɓa.>> 22 Ama ɓeye ɓaa u jawɛrɛyi nyarɛ, a shanɛ, <<Radɔɔ ɗɔnǃ Ɔ n ti fãrã tɔ̃vɨn ɔ tosiu abi. Ɔ tosiu saa jana a korãtini a dɔɔ.>> 23 Kɛɗɔn ɔ yɛnɛ ɔ n ti gunapu gbete nutɔ ɔ yeerɛ, u musiyuu u shaarɛ u nta yɛti puru! 24 Aru si majam vɔtɛ, ama dɔdɔrim u a suruni; si niitɛ, ama dɔdɔrim n kpautɛ. Kɛɗɔn i piti kpai i gaa yumusinɛrɛ.

25 Kɛɗɔn u jaa pẽniɓa u si ɓili a jaa. Aɗagbete a wɛrɛ yɛ, naa atɛ a nyaɓa wɛrɛ maani, a nta viwaanɛ a soni a sasanɛni. 26 Kɛɗɔn a ɓaa jawɛrɛ wɔɔ nya gbete a hɨu nɛ,<<Ivi a ɗɔɔ yɛnɛ viya?>> 27 Jawɛrɛu kasiu nyanɛ<<Mɛzɔ̃u sɔɔ wɛrɛtɛ, meye pɔ̃rɛ shɔ yeeriu gunapu aru sɔɔ wɛrɛtɛ a suruni.>> 28 Ama ɓɛjaa pẽniɓa tuu sisɨn waanɛ ji to yɛti wɛrɛ ɓa; kɛɗɔn ɓeye shɛrɛ a gakiu nɛ u to yɛti wɛrɛ nɛ. 29 Ama kasi ɓeye nya a shanɛ, <<Kɨnnɔɔ pɛ, saa piti kpai n pɛlaa vishonɛ naa jawɛrɛ, n ji ɓɛ saa nyaɓa ɓagbete niɓa.>> A ãnkɛ i vi ɓa gbete niviya? ko jàà ma a ji ang ɓa ɓagbeteni ɓa nɛn musi yuu nɛn nta yɛti puru a masayi ni ɓa! 30 Ama mɛjam zɔ a vinaa tɛ piti kpai a suu kpangtanyi yuu, naa a wɛrɛ tɛ a yeeriu gunapu nonɛtɛ!

31 Ɓeye kasinya nɛ, <<Majaa, a ɓɛɛjo nkɔni a lee-lee a ɗɔzɔ, vigbete n a wuniyɛ ji a ɓɛɛko. 32 Ama ntootɔ u musiyuu tɔ u nta yɛti puru aru mɛzɔ̃m si vɔtɛ, ama dɔdɔrim u a suruni, si niitɛ ama dɔdɔrim n kpautɛ.>>