1 Naa ɗaa vishaanɛ gbete shɔ shaa a pasika gbete shɔ ɓaanɛ yisiti ate māāni. 2 Kɛɗɔn shɔ yupɛ̃niyi au pɛli vi yuu ãnɛ jaa Ɗa a shɔmala nya ãsinɛ Musa, i nta shɔ setitɔ, i kã nyaba gbete i yɛ sã Yesɔ nɛ shɔu nyou vɔrɔ kaali.

3 Kɛɗɔn japɛ̃pɛ̃ɛ̃ tosi Yahuza sisɨn gbete shɔ ɓaunɛ Isikariyoti, u ji tete shɔzɛ gbete a Yesɔ jadɔyi kɔ. 4 Yahuza yurɛ a yɛrɛ nwanya a yupɛ̃niyi gbete pɛli vi yuu ãnɛ a jaa Ɗa a yupɛ̃niyi jaa Ɗa tɛttinɛyi nɔgbete yɛ mɛliyi Yesɔ i nyou vɔrɔ yɛ. 5 I nta yɛti puru tɔ waanɛ i marɛ nɛi yɛ ãu saa. 6 Yahuza kasirɛ, kɛɗɔn gaa kɛ nyaba kãnɛ gbete yɛ ãi Yesɔ yɛ, ɓa mɔɔyi zɛnɛniɓa.

7 Naa dii yumusinɛ borodi gbete yisiti ɓa ɗɔn ɓayɛ pɛlitɛ, kɛ lee gbete shɔyɛ yee jamɛrɛ̃ɛ̃ pasika yɛ. 8 Yesɔ sho Bituru a Yɔhana, a nya ãsinɛmiː <<Ɔ yɛnɛ ɔ nwariu vishaanɛ pasika n ɗau shaatɔ.>>

9 I hɨ Yesɔ nɛ<<A kasinɛ u nwaraa vishaanɛu pi ɗɔpiya?>>

10 Yesɔ kasiyinya nɛ, <<Naa ɔkɛ to yɛti komɔɔ nɛ, ɔ kpɛsi jawɔɔ tuu jakpari mii tɛ, ɔ gɨu akɨnti yɛnɛ wɛrɛ gbete yɛ to ɗɔnyɛ. 11 Ɔ geli shɔwɛrɛu nɛ: <Shɔmala shɔunɛ u hɨ a pɛ, jaa gbete n yɛn shaa vishaanɛ ang jadɔyini a ɗɔnyɛ piya?> 12 Yɛ tasɔɔ jaa pẽniba gbete shɔ maa a yuu ɓɛɛ zɔwɔyɛ. Ɔ yɛ kpaarɛ ko iviya shɔ tɔ̃ritɛ aɗɔn piti kpai.>>

13 Yesɔ jadɔyi ziti i to yɛti komɔɔurɛ i kpaa ko iviya jo nɔgbete Yesɔ geliyɛ kɔ, kɛɗɔn i tɔ̃ri vishaanɛ pasikarɛ.

14 Naa ɗaa vishaanɛ pɛlitɛ, Yesɔ au jashonɛyini i ɔ̃ a ɗɔzɔ aru i shaa vishaanɛ. 15 Yesɔ geliyi nɛ, <<N kasi tɛttɔ, n shaa vishaanɛ pasikami a ɔkɔni n ɗan ɓoo raayɛ! 16 N gelɔɔtɛ, n yɛn shaa vishaanɛ pasika toɓa, setɛ u ɗaa pɛlitɛ aɗɔgbete Ɗa roo kpati aɗɔn a lapa atɛ.>> 17 Kɛɗɔn Yesɔ tuu kɔpii, dɔ̃ri Ɗalapa a shanɛ, << Ɔ tɛɛnɛ ɔ vɔsirɛ awɔ nɔɔ. 18 N gelɔɔtɛ yuunɛ dɔdɔrim yɛnɛ ɗekɨn n yɛn ɓoo mii inabim toɓa, se leegbete Ɗa kpati roonɛ atɛ.>>

19 Kɛɗɔn Yesɔ tuu borodi a dɔ̃ri Ɗalapa dalirɛ a ãyirɛ a shanɛ, <<Shompɛ n bi gbete n ãwɔyɛ, ɔ pɛli jo ɗɔkɔ nɔgbete ɔ kpaa sisɨn ang biiyɛ.>>

20 Sɔ̃njo nankɔ, ãi kɔpii rɛ a knti vishaanɛ ɗarɛ, a shanɛ, <<Shompɛ kɔpii gbete Ɗalapa maruu sɔɔ ang kpaa, gbete n yɛn ntee awɔ yuu. 21 Ama, ɔ kɨnnɔɔ pɛ! Shɔgbete au mɛlin yɛ u yɛm a ɗɔɔ vishaanɛ a nkɔni! 22 Nkɔ Shɔzɛja n yɛ vɔ nɔgbete Ɗalapa kasiyɛ, ama shɔgbete au mɛliu yɛ u yukɔnɛ ɗɔn.>> 23 Kɛɗɔn Yesɔ jadɔyi i gai yuu hɨnɛ, pi yɛ pɛli vi kɔ̃linɛm pi au tete ni piya?

24 Kɛɗɔn Yesɔ jadɔyi nya masinɛ yuu ai tete aru nɛ pi yɛ ɔ̃ pẽniba ai tetteni piya. 25 Yesɔ geliyi nɛ, Kpati shɔ tipim gbeteyi i ji zɛ Ɗalapa ɓa i kaka ai shɔbiiyi yuuni. yupɛ̃ni koomi i ɓai yuunɛ i pɛ <<Shɔ wesaayi.>> 26 Ama yɛ ɔ̃ ɓa nankɔ awɔ tete niɓa; shɔ gbete yɛ ɔ̃ yupɛ̃ni awɔ tete ɔriutɛ kaka jazɨng a kɔrɔ u ɔ̃ naa jajja fɛ̃ɛ̃, yupɛ̃ni u ɔ̃ naa foo. 27 Pi ɔ̃rɛ pẽniba piya, shɔgbee au ɔ̃ tipi shaa vi shaanɛ ya ko shɔgbete ãli shɔ vishaanɛ ya? Pɛ Shɔgbete au ɔ̃ a tipi u ɗɔɔ vishaanɛ shaanɛ ukɔ ɔ̃rɛ pẽniba. Ama nkɔng yɛm awɔ tete naa shɔgbete ãli shɔ vishaanɛ yɛ. 28 <<Ɔ ɔ̃ tɛttɔ a nkɔni aɗagbete shɔ ntalin nyayɛni piti kpai;>> 29 Nagbete mayɛ ang kaka nɛn roo kpati a wuniyɛ, nkɔ ma n ãwɔ kaka sɔ̃njo nankɔ, 30 ɔ yɛ shaarɛ ɔ ɓoorɛ a nkɔni ang ɗɔɔ kpati roonɛ, ɔkɔ yɛ ɔ̃rɛ a yulaa kpati shɔ Isirela laduru kopi atu ziti ɔ sãyirɛ.

31 Bituru, Bituru Japɛ̃pɛ̃ɛ̃ kã nyaba tɛ aru u ntawɔ sisɨn piti kpai, u vɔsi tɔ̃vɨn a kɔ̃linɛ, naa shɔjalanɛ shɛshi sɛ̃ɛ̃ a tete visha. 32 Ama Siman n gakaa Ɗa tɛ, a sisɨn ãnɛ yɛ nwesiɓa. Ama naa akɛ sɔɔnɛ ang bi, a ã mɛzɔ̃yi kaka tɔ. 33 Bituru kasinya nɛ, <<Uɓeyelapa, n yɛn gɨn atɔ yɛnɛ jaahm n vɔ a mɔkɔni!>> 34 Yesɔ shanɛ, <<Bituru n gelaatɛ, Kpaasi kɔ̃ɔ̃ ɓɛɛ nyaɓaanɛ a zɨmbam setɛ a shatɛ ɓa taati nɛn ji zɛn nii ɓa.>>

35 Kɛɗɔn Yesɔ hɨu jadɔyi nɛ, <<A ɗagbete n showɔɔ siyɛ a ɗauni saa ɓa, jaduu ɓa, ko kodɔɔ ɓa, viwɔɔ leerɔɔ si tɛya?>>I kasinya nɛ,<<Ko vigbete ji leeriu ɓa,>> 36 Yesɔ shanɛ, <<Ama dɔdɔrim, shɔu saa ɗɔn a duuni u tuu naani; shɔu zaali sitɛɓa u mɛliu fãrã u wɔɔ zaali awuni. 37 Nagbete n gelɔɔ yɛ Ɗa nya ruubi gbete shanɛ, <Shɔ ɓasiutɛ a shɔ ruuvini,> ɔ̃tɛ̃ kaka jazɨng akɔrɔ Ɗa nya ruubii u ɔ̃ nizɛ ang yuu, vigbete shɔ bee ang yuu u ɗɔgbete ɔ̃ nizɛ.>>

38 Yesɔ jadɔyi i shanɛ, <<Kn noopɛ! Uɓeyelapa nkɔ zaali yɛm ziti!>> Yesɔ shanɛ, <<tesitɛ.>>

39 Yesɔ yaa ɗɔurɛ a gɛ̃kɛ kɔpɔ zeetung nagbete pɛli a lee-lee, u jadɔyi i gɨu dɔɔni. 40 Naa Yesɔ to ɗɔutɛ kɛɗɔn geliyi nɛ, ɔ gaki Ɗa tɔ, nɔgbete ɔ yɛ wẽsi ɓa japɛ̃pɛ̃ɛ̃ naani ɓayɛ. 41 kɛɗɔn Yesɔ yurɛ a yɛ ɗekɨn, yɛ ɔ̃ naa shɔ lo tari ni zali, kɛɗɔn a sɔ̃sirɛ a gaki Ɗa rɛ, a shanɛ 42 <<Maye, Kɛ ɔ̃nɛ a pɛlinɛ tusun jawaa raaɓoonɛm kati, ɓa n pɛlinɛ ɓa ama u ɔ̃ vigbete a kasiyɛ.>> 43 Kɛɗɔn Ɗa jashonɛ lapa shɛrɛ au ɗɔbii a masiu bi rɛ. 44 Yesɔ u atette raaɓoonɛ waanɛ, kɛɗɔn mabii u ɗɔɔ Ɗa gakinɛ, u dɔnwanɛ sɔ̃li naa kpaa nteli a tipi.

45 Naa Yesɔ yutɛ a ɗɔɔ Ɗa gakinɛ ni, sɔu jadɔyi ɗɔbii a kpai ɗɔɔ noroo-roonɛ aru si yɔtɔ i sisɨn vɨngtɛ. 46 Yesɔ hɨu jadɔyi nɛ,<<Ɔ roo- noroo pi ruuviya? Ɔ yulapa nɛ ɔ gaki Ɗa nɔgbete ɔ yɛ toɓa japɛ̃pɛ̃ɛ̃ naa ni ɓayɛ.>>

47 Si Yesɔ ji yisi nyanwanɛ ɓa, kɛɗɔn mɔɔ waanɛ i arɛ a Yahuza Isikariyoti ni shɔzɛ gbete au tete jadɔ kopi atu ziti, arɛ a Yesɔ ɗɔbii nɛn kasi nya maanɛ nɔgbete geli shɔwi yɛ, 48 ama Yesɔ hɨ Yahuza nɛ, <<A mɛli Shɔzɛja a nya maanɛ ya?>> 49 Naa Yesɔ jadɔ gãsiyi i zɛ vigbete yɛ pɛliyɛtɛ nam, i hɨ Yesɔ nɛ, <<Uɓeyelapa u shovinɛ au zaali mini ya?>> 50 Shɔzɛ gbete atette Yesɔ jadɔyi shɛshiu zaali a kɔ yupɛ̃ni gbete pɛli vi yuu ãnɛ jaa Ɗa jawɛrɛ yushoo nakɨn.

51 Ama Yesɔ shanɛ, <<Tesitɛǃ >> kɛɗɔn Yesɔ ɗi naa a jau shoo, a gatiurɛ.

52 Yesɔ geli shɔ yupɛ̃ni gbete pɛli vi yuu ãnɛ a jaa Ɗa a yupɛ̃niyi gbete i tɛtti jaa Ɗa yuu ãnɛyɛ a yupɛ̃ni dɔlaa gbete i au ɗɔbii nɛ sãutɔ, <<Ɔ ang ɗɔbii a laabaa a zaali ni aru ɔ sãngtɔ naa shɔ nyaba zɛnɛ ya? 53 N ji a ɔkɔni lee-lee a Ɗa jaa yuu ãnɛ ɔ ji sãn ɓa. ama dɔdɔrim pɛ ɔ ɗaa vishonɛ arɛ, aru japɛ̃pɛ̃ɛ̃ u tasiu kaka vishonɛ pɛlinɛ shɔ ɗɔkɨnriyɛ.>>

54 I sã Yesɔ rɛ a n-tiu a yupɛ̃ni gbete pɛli vi yuu ãnɛ jaa Ɗa wɛrɛ, Bituru gɨu akɨnti si yɛtɛ kpɛlɛ. 55 Naa i wu yaa tɛ atette wɛrɛu i ɔ̃lirɛ aɗɔn, Bituru ma yɛrɛ ɔ̃jo atette shɔwini. 56 Shɔzɛ gbete a tete jasoro gbete shovi shonɛ a wɛrɛu zɛ Bituru ɔ̃tɛ a nyayau, kɨnnɔɔ au bi a hɨu nɛ, << Jam kɔma u si jo Yesɔ ni ɗɔzɔ.>>

57 Ama Bituru masi nya aɗɔn, a shanɛ, <<Suum n ji zɛu jo ɓa.>>

58 A kɨntiuni tɛ̃ɛ̃ti shɔwɔ arɛ hɨ Bituru sɔ̃n nɛ, <<Aji tete shɔzɛ gbete Yesɔ jadɔyi kɔ.>>

Bituru risiu nya nɛ, <<Jam, mɓa tetteni ɓaǃ>>

59 Naa ɔ̃tɛ dɔɔɗa gbete jawɔɔ a sɔ̃n Bituru ɗɔbii a hɨu nɛ, << Nya masinɛ ɓa, jam u si a Yesɔ ni ɗɔzɔ, aru ukɔma u shɔ Galili. >>

60 Ama Bituru risi jau nyanɛ, <<Jam, n ji zɛ ruugbete a nwanya au yuuni ɓaǃ>> si Bituru ji yisi nyanwanɛ ɓa kpaasi kɔ̃ɔ̃ ɓaa nyarɛ. 61 Uɓeyelapa rinoo rɛ a zɛ Bituru tiriri, kɛɗɔn Bituru kpaa sisɨn rɛ aru gbete Uɓeyelapa geliu yɛ nɛ,<<zɨbankɔ kɔ̃ɔ̃ ɓɛɛ nya ɓaanɛ a yɛ masi shɔ nya ang yuu ɓa taati nɛn ji zɛn nii ɓa.>> 62 Bituru shɛ bili a sãki nyavɔ waanɛ.

63 Shɔ gbete i tɛttɛ Yesɔ yɛ i waurɛ i latiutɔ. 64 Kɛɗɔn i ma Yesɔ noo a waurɛ i hɨu nɛ, <<Geliu nɛ akɛ ɔ̃nɛ Ɗa jashonɛ pi wa piya?>> 65 I shali vi kɔ̃linɛ wɔyi ayuu i dãli waanɛ.

66 A gadii zɨɨnkɔ yupɛ̃ni dɔlaayi a yupɛ̃ni gbete i pɛli vi yuu ãnɛ a jaa Ɗa wɔsɔ̃n shɔmala nya ãsinɛ i toli nya a ɗɔzɔ, i n ti Yesɔ a kpati shɔ ruu yeenɛi ɗekɨn, 67 i hɨ Yesɔ nɛ, <<Geliu nɛ mokɔ a kirisi ya?>>

Yesɔ risiyi nya nɛ, << Nkɛ gelɔɔ nɛ, ɔ yɛ ã sisɨn ɓa ang ruuni ɓa, 68 nkɛ hɨu ɔ ruu wɔnɛ, ɔ yɛ kasinnya ɓa. 69 Ama yunɛ dɔdɔrim yɛnɛ ɗekɨn Shɔzɛja yɛ ɔ̃ a kakani a shɔ gbete vi tɛu kaka ɓa Ɗalapa nakɨn.>>

70 Shɔwiyi a ɗɔu piti kpai i hɨ Yesɔ nɛ, <<Mokɔ Ɗa jaa ya?>> Yesɔ risiyi nya nɛ, <<Ɔ shatɛttɔ pɛ nkɔ.>> 71 Kɛɗɔn shɔwiyi shanɛ, <<U kãli kɛ ruu ivi totti viya? U au yuu u nta vigbete shatɛttɔ au nya gbɔ̃ti.>>