1 Lewɔɔ Yesɔ u ɗɔ shinɛ a nya ɓooti wapo Janisara shɔ kpaa bi awuni māāni nɛi nta Ɗa nya ruubii. 2 Yesɔ zɛ latosi ziti a nya ɓooti; Ama shɔ jazɨng sãnɛyi i yarɛ i ɗɔɔ jang sɔkinɛ. 3 Yesɔ to a latosi wɔ gbete si Siman ɓɛɛ a geliunɛ nɛu gisi latosiu pɛ a yɛti mii. Yesɔ ɔ̃kɛ yɛti latosiu kɔ a mati shɔ ruu Ɗalapa kɛkn.

4 Naa yisi nya nwanɛtɛ, a geli Siman nɛ,<<Gisi latosiu pɛ tete mii jamba, mokɔ a mɛsayini ɔ tɛ̃ɛ jang a mii ɔ sã jazɨng pɛ.>>

5 Siman kasi nyanɛ, <<Mashɔwɛrɛ,>> <<U ntalitɛttɔ zɨnzɨn u ji sã viwɔɔ ɓa, ama akɛ shanɛ nankɔ, n yɛn tɛ̃ɛ jangtɔ.>>

6 I tɛ̃ɛ jangrɛ i sã jazɨng waanɛ naa jang kɛ ntanɛ. 7 Kɛɗɔn i ɓaa ɓɛsa vishonɛyi nyarɛ nei arɛ nei pɔ̃siyi naa jo. I arɛ i yiki jazɨng a latosiu ziti piti lot naakɛ lunɛ yɛti mii.

8 Naa Siman Bituru zɛtɛ nankɔ, a taa yugboti a Yesɔ ɗekɨn a shanɛ,<<Yukati ang ɗɔbiini, Uɓeyelapa! N pɛ shɔruuvini!>>

9 Bituru a shɔ gãsiyini ɔ̃rikɛ vibii zaanɛ aru jazɨng waanɛ ai sãmini. 10 Si sɔ̃njo nankɔ a Yakubu a Yɔhana Zɛbadi ɓɛjaayi, Bituru shɔ nyakãsiriyi. Yesɔ geli Siman nɛ, << Mokɔ zaanɛ; yunɛ dɔdɔrim yɛnɛ ɗekɨn a yɛ sãkɛ shɔzɛ.>>

11 I zaa latosi rɛ yɛnɛ nyasasa i yaa vi piti kpai i gɨn Yesɔ rɛ.

12 Yesɔ usi a komɔɔ shɔwɔ siɗɔn vibii pɛliutɔ abi kpai. Naa zɛ Yesɔ tɛ, a ta yugbuti au ɗekɨn a gakiu rɛ nɛ,<<Shɔmala, akɛ kasinɛ a gating pɛ!>>

13 Yesɔ gɨn naarɛ a ɗɨurɛ.<<N kasitɛ,>>Yesɔ kasi nyarɛ. <<gatinɛ!>> Kɛɗɔn jau gatirɛ tɛ̃ɛ̃ti. 14 Yesɔ ãsiu nyanɛ,<<Mokɔ geli shɔ wɔnɛ, ama sã nyabanɛ a yɛ shɔlansi ɗɔbii u zɛatɔ; ɗau tasi shɔnɛ a gatitɛ, a ã viyuu ãnɛ naa Musa ãsi nyayɛ.>>

15 Ama Yesɔ ruubii raa koou piti kpai, mɔɔyi arɛ nɛi weshɔ au nya nɛu gatiyitɔ ai vɔrɔni. 16 Ama Yesɔ yɛ ɗɔgbete shɔɓa ɗɔmɓa, aru u gaki Ɗa.

17 A lewɔɔ Yesɔ usi ɗɔɔ vimatinɛ, shɔ Farisiyayi a shɔmala nya ãsinɛyi isi ɗɔɔ ɔ̃nɛ a ɗɔuni, i shɛ komɔɔ a tipi Galili, Yahudiya a Urushalima. Uɓeyelapa kaka shɔ gatinɛ si Yesɔ ni. 18 Shɔwɔyi i tuu shɔgbete u bi vɔ kagbete a siri. I kã nyaba gbete i n-tiu wɛrɛu aru i pɔ̃u a Yesɔ ɗekɨn, 19 ama aru gbete shɔ si waanɛ, i ji kpaa nyaba gbete i yɛ tosiuyɛ ɓa. Kɛɗɔn i turɛ i n-tiu yujaa lapa gbete shɔ mau lapatɔ zali, i ɓɛli yujaaurɛ, i tosiu kɛkn a shɔ tete au sirini a Yesɔ ɗekɨn. 20 Naa Yesɔ zɛyi sisɨn ãnɛtɛ, a geli jaunɛ,<<N yasaa ruuvinitɛ.>>

21 Shɔmala nya ãsinɛ a Farasiyayi i gaa shalinɛ ai nɔɔ nɛ,<<Shɔm ɓɛɛ piya gbete sha vikɔ̃linɛ a Ɗa yuu piya! Ɗalapa kɔ sheli yasi shɔ ruuvinirɛ!>> 22 Yesɔ zɛyi sisɨn tɛttɔ a geliyi nɛ,<<A ruu ivi ɔ lɛri awɔ sisɨn ɗɔkɔviya? 23 Pi shɔpi pɛlaa shɔ shanɛ,<Ɗalapa yasaa ruuvinitɛ,>ko Yulapanɛ a raarɛ? 24 N yɛn tasɔɔtɔ nɛ, shɔzɛja u kaka shɔ ruuvini yasinɛ aɗɔn a koo.>>Kɛɗɔn Yesɔ geli jaa gbete u bi vɔ kagbeteu nɛ,<<N gelaatɛ, yulapanɛ, a tuu siri a yɛ wɛrɛ!>> 25 Tɛ̃ɛ̃ti jau yulaparɛ ai ɗekɨn piti kpai, a tuu siri gbete roo ɗɔnyɛ, a yɛ wɛrɛrɛ u ɗɔ Ɗalapa bɛlinɛ. 26 I piti kpai viu ɔ̃rii vibii-zaanɛ! A setini waanɛ, i bɛli Ɗalapa, i shanɛ,<<U zɛ vibii zaanɛ wɔɔ nɛmtɛǃ>>

27 A kɨntiuni, Yesɔ shɛrɛ a zɛ shɔ sabɛnɛ tɛnɛ, u niinɛ leevi, u ɗɔ ɔ̃nɛ a yɛti jaa sabɛnɛ tɛnɛ. Yesɔ geliunɛ,<<Gɨn npɛ.>> 28 Leevi yulaparɛ, a yaa vi piti kpai a gɨn Yesɔ rɛ.

29 Kɛɗɔn Leevi pɛli Yesɔ vi yumusunɛ pẽniba au wɛrɛ, atette shɔzɛtiyi si shɔ sabɛnɛ tɛnɛ waanɛ a shɔ gãsiyini. 30 Farasiyayi a shɔmala nya ãsinyi gbete ai tete i hɨ Yesɔ jadɔyi nɛ. <<Aru ivi ɔ shaavi a ɓoonɛni a shɔ sabɛnɛ tɛnɛyini a shɔruuvini ni viya?>>

31 Yesɔ kasinyanɛ, <<Shɔ gbagbalayi kã likitan ɓa, ama see shɔgbete i vɔrɔyɛ. 32 N jo a ɓa nɛn ɓaa shɔ wɔsɔ- wɔsɔ nya ɓa, ama n arɛ a shɔruuviniyi yuu.>>

33 Shɔ gãsiyi i geli Yesɔ nɛ,<<Yɔhana jadɔyi i ma nyatɔ a lee-lee a Ɗa gakinɛni, Farasiyayi i jadɔyi i pɛli sɔ̃njo nankɔ; ama a jaɗɔyi i pɛli ɓɛjo ɓa aru iviya?>> 34 Yesɔ kasiyinya nɛ, <<Ɔ zɛnaa yɛ pɛlikati shɔ sotɛnɛ ɓɛsayi i ɓẽẽ vishanɛ alee yumusunɛ aɗagbete shɔ sotɛnɛ u doo a yini ya? Yɛ pɛli ɓa! 35 Dii yɛ atɔ a shɔyɛ tuu shɔ sotɛnɛu ai ɗɔbiini, kɛɗɔn iyɛ ma nyatɔ.>>

36 Yesɔ geliyi ruɓusinɛ wɔsɔ̃n nɛː <<Shɔ gbete yɛ nta jafãrã sɔɔ nɛn rɛɛ u gbaali a wuniyɛ piya? Shɔu kɛ pɛlinɛ, yɛ nta jafãrã sɔɔtɔ, usɔu yɛ yɛɓa au gbaalini ɓa. 37 Shɔwɔɔ gbete yɛ tuu mii inabi sɔɔ nɛn tɛ̃ɛ a jaduuko gbaali yɛ ɓa, aru mii inabi sɔɔ yɛ sã jaduukoutɔ, mii inabiu yɛ zɨkitɔ, jaduuko u lɛsirɛ. 38 Mii inabi sɔɔ ɔ̃tɛ kaka jazɨng a kɔrɔ shɔ tẽu a jaduuko sɔɔ. 39 Shɔgbete kɛ ɓoo mii inabi gbaalinɛ, yɛ kasiu u sɔɔ boonɛ ɓa.<U gbaaliu pɛ tɔ̃vɨn,>au shayɛ.>>