1 Kɛɗɔn Yesɔ geliu jadɔyi rubusinɛ aru u matiyi nɔgbete i gaki Ɗa ko-pi lee piya ikɔ nyo sisɨnɛ. 2 Yesɔ shanɛː Shɔ ruvɔsinɛ wɔɔ siɗɔn a koo wɔɔ gbete nta seti Ɗalapa ɓa, bassi shɔ ɓa 3 Suvɔ wɔɔ si sɔ̃njo a kouni, gbete ali shɔ ruu vɔsinɛ ɗɔbii, u ɗɔɔ gakinɛ nɛu ãng tɔ̃vɨn, a shanɛ, sɔkkɔ yeerin ruumpɛ tɔ̃vɨn aru nya yeerinɛ gbete n shɔnɔpɔ̃ i yeerimɓa yuumǃ

4 Shɔ ruu vɔsinɛu ɓɛ̃ɛ̃pɛ a ɗauni anɔni, ama a kɨntiuni a geliu yuu nɛ, Ko n nta Ɗalapa seti ɓa, n bassi shɔ ɓa, 5 ama aru gbete suvɔm yɔrintɛ bang, n yɛn pɛli nɔgbete n pɛliyɛ u kpaa vigbete gaki yɛ, n ji pɛli ɓa, yɛ yɛ ɗekɨn ang ɗɔbii alinɛni u pɔ̃nrɛ n yɔɔ waanɛǃ

6 Kɛɗɔn Ubeyelapa shanɛ, <<Ɔ nta vigbete shɔ ruvɔsinɛ gbete kuli shɔnɔmi shayɛ pɛ. 7 Ɗalapa yɛ yeeruu tɔ̃vɨn ɓaya, u ãu shɔbiiyi gbete i sɨnriu niti a zɨmɓani tɔ̃vɨn ɓaya? Yɛ wari yuutɔ ai ɗɔɔ naa pɔ̃sinɛnin ya? 8 N gelɔɔtɛ, yɛ ntayi nyavɔtɔ, u shorii vigbete i kasiyɛ tɛ̃ɛ̃tiǃ Ama naa n Shɔzɛja nkɛ sɔɔnɛ, yɛ kpaa shɔ sisɨn ãnɛ kati a kooni ya?>>

9 Yesɔ sha ruɓusinɛm aru shɔ gbete i tuyi yunɛ ikɔ ɔ̃rɛ shɔgbeteyi pɛli vi tɔ̃vɨn ama i risi shɔwɔɔ pɛtɛlɛ. 10 Yesɔ shanɛ, Shɔwɔyi siɗɔn ziti i yɛ ɗɔ Ɗa jaa yuu ãnɛ: gbete si Shɔ Farasiya wɔɔ si shɔ sabɛnɛ tɛnɛ. 11 Kɛɗɔn shɔ Farasiyau yurɛ gaa Ɗa gakinɛ a shanɛ, n dɔ̃raatɛ Ɗalapa, nɔgbete mɓa naa shɔzɛ gãsiyi gbete i rari shɔ vi a kaka ɓa, mɓa shɔgbete i sha ruu kɔ̃linɛyi ɓa, ko, mɓa kpãngtãng ɓa, mɓa naa shɔwɔɔ ɓa, n dɔ̃raatɛ mɓa naa shɔ sabɛnɛ tɛnɛm ɓa. 12 A lumɔ gbete n manyatɔ lee ziti, atette vi kopi gbete n kpaayɛ n ã gbetetɔ a ɓuzɨn ni.

13 Ama shɔ sabɛnɛ tɛnɛu shi a a ɗɔɔ kpɛlɛ, ji ɗeu nɔɔ ɓa kolapani ɓa, ama a waa naa au nɔsisɨn u tasinɛ u pɛ shɔ ruuvini yaanɛ a shanɛ, <<Ɗalapa ntang rajo, n pɛ shɔruvini!>>

14 Yesɔ shanɛ, <<N gelɔɔtɛ, shɔ ruuvinim sɔɔ wɛrɛ rɛ a sisɨn puru a Ɗalapa dekɨn, ɓa naa Farasiyam ɓa. Shɔgbete kɛ tuu yuunɛ shɔyɛ rooriu a tipi, ama shɔgbete kɛ roori yuunɛ shɔyɛ basiu pẽniba.>>

15 Shɔwɔɔyi n ti Yesɔ jabẽrẽtiyi nɛu pɔ̃siyi naa a yuu. Yesɔ jadɔyi naa i zɛtɛ nankɔ, kɛɗɔn i lasi shɔtɔ, 16 ama Yesɔ ɓaa jajjayi nya au ɗɔbii a shanɛ, <<Ɔ yaa jabɛ̃rɛ̃tiyitɔ i ang ɗɔbiirɛ, ɔkɔɔ zãriyinɛ, aru Ɗa kpati roonɛ naa shɔmiyi i ɓɛɛkɔ. 17 Ɔ kpaa sisɨn tɔ! Shɔgbete ji tɛ ruu Ɗa kpati roonɛ ɓa naa jajjaa ɓa, yɛ to ɗɔu ɓa.>>

18 Yupɛ̃ni Yuhudawa wɔɔ hɨ Yesɔ nɛ,<<Shɔmala tɔ̃vɨn, n yɛ pɛlikovi n kpaa suru gbete yisi ɓa yɛ viya?>> 19 Hɨunɛ, <<A ɓang pi ruu ivi nɛn shɔ tɔ̃vɨn viya?>>Shɔ tɔ̃vɨn ji gbete ukɔ ɔ̃rɛ Ɗalapa sheeli, 20 a zɛ nya ãsinɛ tɛttɔː <<Mokaa roonɛ shɔwɔɔ soni, mokaa nyɔ shɔnɛ, makaa ɓɔɔ shɔ vinɛ, mɔkaa shinɛ ayuu vigbete ɓa nizɛ ɓa; a bassi meyetɔ a minini.>>

21 Jau risinya nɛ<< N gɨn nya ãsinɛm tɛttɔ piti kpai sing doo pẽtẽrẽ anɛ dɔdɔrim.>>

22 Naa Yesɔ nta vigbete jau shayɛtɛ, a geliu nɛ,<<Rosaatɛ vi gbete a yɛ pɛliyɛ. Mɛlaa vinaa piti kpai a ã saa shɔ raayi, a yɛ kpaa vinaa kɛ kolapa. Kɛɗɔn a arɛ a gɨnrɛ.>>

23 Naa nta vigbete Yesɔ geliu yɛtɛ, u sisɨn lɛsirɛ waanɛ, aru u vinaa siɗɔn waanɛ. 24 Yesɔ zɛrɛ u sisɨn lɛsitɛ a shanɛ, <<Yɛ ɔ̃ri shɔ vinaayi yukɔnɛ pẽniba i to ɗɔɔ Ɗa kpati roonɛrɛ!>> 25 Yɛ ɔ̃ri woba pɛlaa u to nɔɔ ɓoo a no gbete shɔ vinaa yɛ to ɗɔgbete Ɗa roo kpati aɗɔn yɛrɛ.

26 Shɔgbete i nta ruum i hɨ Yesɔ nɛ, piyɛ ranaa kɛpiya?

27 Yesɔ kasiyinya nɛ, <<Vigbete shɔzɛ zɛ naa yɛ pɛli dɔɔɓa yɛ, a Ɗalapa bi yɛ pɛlitɔ. >>

28 Bituru geli Yesɔ nɛ, << Kɨnnɔɔ pɛ, u yau u vigbete u a wuniyɛtɛ piti kpai u gɨn atɛ.>> 29 Yesɔ geliyi nɛ, <<N gelɔɔtɛ, shɔgbeteu kɛ yaa wɛrɛnɛ ko ɓeso, ɓezɔ̃yi, Beye a ɓinini wɔsɔ̃n ɓɛɛ jaayini aru u ã yuu aru Ɗa kpati roonɛ, shɔwɔɔ ɓa atette mini ɓa a shɔ yɛ raau ɓa yɛ, 30 vigbete yaa yɛ piti kpai Ɗalapa yɛ ãu wɔsɔ̃n u tɛɛ vigbete siu a wunitɔ, yɛ kpaa suru gbete yɛ yisi nyaɓa sɔ̃n a koo gbete kanɛ yɛ.>>

31 Yesɔ tuu u jadɔyi kopi tu ziti kagbete a geliyi nɛ, <<Ɔ weshopɛ! U yakɛ Urushalima vigbete Ɗa jashonɛyi i bee a n Shɔzɛja yuu yɛ ɔ̃ nizɛ. 32 Shɔyɛ ãu shɔgbete i ɓa Yahudawa ɓa a naa, i yɛ ãriu nya, i dãurɛ, i tulu susãri bi. 33 I yɛ waurɛ a nyɔu vɔrɔ, ama lee taati yɛ yulapa a suruni.>>

34 Ama Yesɔ jadɔyi iji kpaa kara ruugbete Yesɔ nwanya au yuuni ɓa. Shɔ ɓusi ruu dɔɔtɔ ai ɗɔbiini, i ji zɛ vigbete Yesɔ nwanya au yuuni ɓa.

35 Naa Yesɔ atɛ maani a Yerikoni, shɔ nogbãti wɔɔ si ɗɔɔ ɔ̃nɛ a nyakara nyaba uɗɔɔ vi gakinɛ. 36 Naa shɔ nogbãti nta mɔɔyitɛ i ɗɔɔ tɛnɛ kɛɗɔn a hɨnɛ, <<Ivi ɗɔɔ yɛnɛni viya?>> 37 Shɔ geliu nɛ,<<Pɛ Yesɔ shɔ nazara tɛrɛ.>>

38 Kɛɗɔn shɔ nogbãtiu ɓaa nya a gãgãni,<<Yesɔ Dauda ɓɛjaa ntang raajoǃ>>

39 Shɔgete isi dekɨn yɛ, i lasiu nɛ, zẽnyanɛ, ama jau kaa nya sɔ̃n a gãgãni bang nɛ, <<Dauda ɓɛjaa nta raajoǃ>>

40 Kɛɗɔn Yesɔ shirɛ a ãsi nyanɛ shɔu n-tiu arɛ yɛm au ɗɔbii. Naa atɛ maani Yesɔ hɨunɛ, 41 <<A kasi nɛn pɛlaa iviya?>>

Jau kasinya nɛ, <<Shɔmala n kasirɛ n zɛɗɔ sɔ̃ntɔ.>>

42 Yesɔ geliu nɛ, <<Zɛ ɗɔnɛ! A sisɨn ãnɛ gataatɛ.>> 43 Tɛ̃ɛ̃ti kpaa ɗɔ zɛnɛrɛ a gɨn Yesɔ rɛ, u ɗɔgbete dɔ̃ri Ɗalapa yɛ. Naa mɔɔyi zɛtɛ, kɛɗɔn i piti kpai i bɛli Ɗalapa rɛ.