1 Yesɔ geliu jadɔyinɛ<< Shɔ vinaa wɔɔ siɗɔn gbete ãu shɔviganɛ u vinaa nɛu kɨnrin nɔɔ aɗɔn. A kɨntiuni shɔ geli shɔvinau nɛ, nɛu shɔviganɛ u ɗɔgbete u zɔki u saa yɛ, 2 Kɛɗɔn shɔwɛrɛu a ɓau shɔviganɛu nyarɛ a geliu nɛ, N nta ivi aa yuuni viya? Ɔ̃nɛ a ɓasi n vinaa gbete aa ɗɔbii piti kpai, aru a yɛ ɔ̃ toti n shɔviganɛ ɓa. 3 Kɛɗɔn shɔviganɛu hɨu yuu nɛ, < N shɔwɛrɛ yɛ nyikin kɛtɔ ang vishonɛni, n pɛli kɛpikoviya? N kaka jasaa lanɛ sɔ̃n ɓa, n usẽ vi gakinɛ sɔ̃n ɗɔn. 4 N zɛ vigbete n yɛn pɛliyɛtɛǃ Naa shɔ kɛ nyikinnɛ ang vishonɛni, n yɛn sã wesayi ai yɛ tɛng naa ai wɛrɛ yɛ.> 5 Kɛɗɔn ɓaa shɔ gbete ɓɛshɔwɛrɛ gɨyi vi nya rɛ piti kpai. A hɨ shɔ gbete a ɗekɨn nɛ,<Mashɔwɛrɛ gɨn a nɛkɨnya> 6 A kasinya nɛ, <Nɔɔ zeetun tutu laa maani> nkɔ a vi n ɓasaa yɛ yɛm, Shɔviganɛu geliu nɛ; ɔ̃nɛ a bee laa ziti atu kopi. 7 Kɛɗɔn a hɨ shɔgbete pɛsiyɛnɛ, mɔkɔ ma shɔ gɨn a nɛkɨn ya? A kasinyanɛ, <Lazɔrɔ vishaa laa taati, nkɔ a vi n ɓasiyɛ yɛm,> Shɔviganɛu geliu nɛ; <Beenɛ laa ziti au jaa mantaa.>

8 <<Kɛɗɔn shɔwɛrɛu bɛli shɔviganɛ nyayeenɛ aru u ruu kpɛ̃nɛ aɗɔn. Jakɨntiyi zɛnɔɔ gɨnnɛtɛ a ɓɛzɔɔyi jakɨntini a ruu kpɛ̃nɛ u tɛɛ shɔ gbete i ɗɔsẽsẽ tɔ.>>

9 Yesɔ yɛ ɗekɨn a shanɛ ni nɛ,<<N gelɔɔtɛː Ɔ sho vishonɛ awɔ vinaa aru ɔ kãrɔɔ yuu wesayi, nɔgbete ɔ vinaa kɛ yisinyanɛ, Ɗalapa yɛ tɛwɔ naatɔ a kolapa ɗɔgbete suru yisinya ɓa dangdang. 10 Shɔgbete kɛ pɛli tɔ̃vɨnɛ a vi fɛ̃ɛ̃ ni, yɛ pɛli tɔ̃vɨntɔ a vi pẽnibani, shɔgbete ji pɛli tɔ̃vɨn ɓa a vi fɛ̃ɛ̃ ni ɓa, yɛ pɛli tɔ̃ɓa a vi pẽnibani ɓa. 11 A ji zɛnɔɔ saa gbete Ɗalapa ãyɛ sãnɛ ɓa a kotipimni ɓa, a yɛ sã suru gbete sɔ̃ nyaɓa yɛ kɛpikovi a lapa niviya? 12 Ɔ ji kɔ shɔwɔɔ vinaa ɓa, pi yɛ ãwɔ vigbete ɔ ɓɛɛyɛ piya?

13 <<Jawɛrɛ wɔɔ ɓa gbete yɛ ɔ̃ foo a shɔwɛrɛ ziti i dɔɔ yɛ ɓa; ko u bẽẽ gbete u ɔri gbete, ko u ã sisɨn a gbete nya u bɛsi wɔɔ nyatɔ. A yɛ gɨn Ɗalapa dɔɔɓa a saani ɗɔzɔɔni piti kpai ɓa.>>

14 Naa Farasiyayi i nta vigbete Yesɔ shayɛtɛ piti kpai, i latirɛ aru i ɔri saa bang. 15 Yesɔ geliyi nɛ, <<Ɔkɔɔ ɔ̃rɛ shɔgbete i kasi tasinɛ a shɔ ɗekɨn nɛyi pɛ shɔ wɔsɔ-wɔsɔyi.>> Ama Ɗalapa zɛwɔ sisɨnyi tɛttɔ, vi gbete shɔzɛ bassi yɛ, ikɔ vigbete Ɗalapa kasi zɛnɛ ɓa.

16 Nya ãsinɛ Musa a laabeenɛ Ɗa jashonɛyi shɔ gɨnjo ukɔ anɛ ɗagbete Yɔhana shɔ Batizima a yɛ; ama sãnɛ ɗagbete shɔ nwa ruu tɔ̃vɨn aru Ɗa kpati roonɛ yɛ, kopiya u ɗɔgbete kã nyaba tonɛ. 17 Ama yɛ ɔ̃ pɛlaa kolapa a kotipi ni i yisinyarɛ, a nogbete shɔ tɔnɛ javi dɔnɛ gbete a yɛti labee Musa u nii rɛ.

18 Kopiya kɛ yaa ɓeso naa nɛ a tɛ so wɔɔ pɛli kpangtangtɛ, shɔ gbete kɛ tɛ so gbete shɔ yau naa nɛ pɛli kpangtang a suuni.

19 Shɔwɔɔ siɗɔn shɔ vinaa gbete tosi fãrã gbete u saa a yuuni, shaa vishaanɛ gbete tɔ̃vɨn ko-pi lee-piya. 20 Ama shɔwɔɔ si sɔ̃n ɗɔn, shɔ raa u niinɛ Liyazaro, u nɔrɔ abi vɔ̃sɔ̃k, shɔ n-tiu a shɔ vinaa nyaba wɛrɛ a lee-lee, 21 liyazarɔ kasinɛn shaa vishaanɛ gbete tẽli a tipi a shɔ vinaa la-ɔ̃nɛ vishaanɛ. ko zaayi ma i arɛ i ɗɛɛtiu nɔ̃rɔ̃tɔ.

22 Kɛɗɔn shɔ rau vɔrɛ, Ɗa jashonɛ lapa i tuurɛ, i ãu ɗɔɔ ɔ̃nɛ kiriri a ɗɔɔ yumusinɛ a Ibirayi ɗɔbii a kolapa. Shɔ vinaa vɔrɛ shɔ gbãurɛjo. 23 A wɛrɛ yaa, shɔ vinaa u ɗɔɔ raɓoonɛ waanɛ, kɛɗɔn a ɗee yuu a zɛ Ibirayi aɗɔ kpɛlɛ a Liyazaroni au kagɨn. 24 kɛɗɔn a ɓaa nya, maye Ibirayi! Ntang raajo, a sho Liyazaro pɛ u ɗii janaa a mii u ɗii ang ɗɛɛti n nta ɗɔ bàànɛ pɛjo, aru n a ɗɔɔ raɓoonɛ waanɛ a yɛti yaam!

25 Ama Ibirayi shanɛ, kpaasisɨn pɛ majaa, aɗagbete a si a kotipi yɛ, a si a vigbete tɔ̃vɨn ni kpai, Liyazaro kpaa ɓɛjo vi kɔ̃linɛ piti kpai. Ama dɔdɔrim u ɗɔgbete nta binyatɔ̃nɛ aɗɔm, a sɔ̃nji ɗɔɔ raaɓoonɛ waanɛ. 26 Ɓa shɔnkɔ sheeli ɓa, au tete a ɔkɔɔni too pẽniɓa aɗɔn gbete shɔ pɛliyɛ, aru u zããri shɔgbete kasi tɛɛnɛ yɛnɛ ɔ ɗɔbii ko anɛ u ɗɔbii.

27 Shɔ vinaau shanɛ, N gakaatɔ, maye Ibirayi, sho Liyazaro pɛ yɛnɛ mayɛ wɛrɛ, 28 aru mazɔ̃yi aɗɔn maani, u yɛrɛ u gɔ̃yi yuushopɛ nɔgbete ikɔ sɔɔnɛ toti a ɗɔgbete n ɗɔɔ raaɓoonɛ waanɛ a ɗɔmi.

29 Ibirayi shanɛ, <<Mɛzɔ̃yi i shɔ yuusho gɔ̃nɛ aɗɔn Musa a Ɗa jashonɛyini; mɛzɔ̃yi i weshopɛ jo ai nyakɔ.>> 30 Shɔ vinaa kasinya nɛ,<<Ji tesi ɓa, maye Ibirayi! Ama shɔwɔɔ kɛ yunɛ sàà kɛ yɛ i ɗɔbiinɛ, i yɛ yaa ruuvini pɛlinɛtɔ.>>

31 Ama Ibirayi shanɛ, i ji wesho ɓa Musa nyani a Ɗa jashonɛni ɓa, ko shɔwɔɔ u yurɛ a sàà i yɛ wesho ɓau nyani ɓa.