1 Yesɔ to Yeriko u ɗɔɔ tɛnɛ yɛti kou. 2 Yupɛ̃ni saa bɛnɛ tɛnɛ wɔɔ ɗɔn gbete u niinɛ Zakka. U si shɔ vinaa. 3 Zakka kasinɛn zɛ shɔgbete shɔ ɓaunɛ Yesɔ pɛ, ama aru upɛ shɔ terere ji zɛ Yesɔ ɓa aru mɔɔyi si bang. 4 Kɛɗɔn Zakka yurɛ yɛ ɗekɨn a gẽ laa sɨnti wɔɔ pẽniba aru u zɛ Yesɔ, si Yesɔ yɛ sɔɔji ɗɔukɔ.

5 Naa Yesɔ to dɔɔ laautɛ, a ɗee nɔɔ a lapa, a geli Zakka nɛ, <<Nonɛ tɛ̃ɛ̃ti, Zakka n yɛn roo nɛmjo aa wɛrɛkɔ.>> 6 Kɛɗɔn Zakka norɛ tɛ̃ɛ̃ti, a tɛ Yesɔ naarɛ a sisɨn puru.

7 Naa shɔwi piti kpai i zɛ vimtɛ kɛɗɔn i gaa nyanwalinɛ a kn kɔrɔ nɛ, <<Jau witi zatitɛ a shɔ ruuvini wɛrɛǃ >>

8 Kɛɗɔn Zakka yurɛ a shi Uɓeyelapa ɗekɨn a shanɛ, <<Weshopɛ, shɔmalaǃ Ãng tete vinaa n yɛn vɔsi ɗɔ ziti n ã shɔ raayi ɗɔgbete, shɔgbete n kuliyi nɔɔtɛ kpai, n yɛn sɔriyi ɓa nɛ̃ɛ̃ti a vigbete n tɛ ai naa.>>

9 Yesɔ geliu nɛ, <<Nɛm raanɛ aa wɛrɛmtɛ, aru ukɔ ma uji Ibirayi ɓɛurukɔ. 10 Shɔzɛja arɛ nɛn raa shɔ u kã shɔgbeteu niiyɛ.>>

11 Aru si mɔɔyi i doo ɗɔgbete i wesho a Yesɔ nya yɛ, Yesɔ yɛ ɗekɨn u ɗɔgbete geliyi ruɓusinɛ yɛ. Aru si Yesɔ atɛ maani a Urushalimani, shɔ tee sisɨn nɛ Ɗa gaa kɛ kpati roonɛ. 12 Kɛɗɔn Yesɔ shanɛː Shɔwɔɔ siɗɔn pẽniba gbete sã nyaba yɛnɛ komɔɔ wɔɔ kpɛlɛ aru shɔ ãu kpati, a kɨntiuni pɛli nyaba wɛrɛ sɔɔnɛrɛ. 13 Naa yuu zati yɛnɛtɛ, a ɓaa u jawɛrɛ kopiwi nya, a vɔsi ko-pi shɔpiya saa tarimɛɛ a geliyi nɛ,<<Ɔ riki naa a saa mini setɛn sɔɔtɛ.>>

14 Ama u shɔbiiyi i bɛ̃ɛ̃ u ruubii noni, kɛɗɔn i sho jashonɛyi a kɨnti gbete yɛtɛ, nɛyi shanɛ, u ji kasi ɓa jam u ɔ̃ u kpati rɛ ɓa.

15 Naa shɔ ã jau kpatitɛ a sɔɔrɛ. Tɛ̃ɛ̃ti a ɓau jawɛrɛyi nyarɛ nɛi apɛ ang ɗɔbii, aru nɛn zɛkɨn nɛi kpaa nɛkɨn ayuu saa gbete n ãyɛ niya.

16 Jawɛrɛ gbete gaa anɛ yɛ shanɛ,<<Shɔwɛrɛ n rikinaatɛ a saa tarimɛɛ gbete a ang yɛni n kpaaraaɓa lazɔrɔ kopi.>>

17 U shɔwɛrɛ risinya nɛ, nn bee, a pɛ jawɛrɛ tɔ̃vɨn! Aru gbete a pɛli vi pẽtẽrẽ tɛ sisɨn gbete, n yɛn sing arɛ a ɔ̃ kpati a komɔɔ pẽniba kopi,

18 U jawɛrɛ gbete pɛsiyɛ arɛ a shanɛ, <<Kpati, n rikinaatɛ n kpaaraatɛ saa tarimɛɛ maani ayuu vi gbete aa ang yɛni.>>

19 Geliu jawɛrɛn nɛ, << A yɛ ɔ̃ kpati komɔɔ maani.>>

20 << Kɛɗɔn jawɛrɛ wɔɔ arɛ a shanɛ, Kpati, nkaa saa tarimɛɛ yɛm; n ma a nya jafãrã n ɓusitɔ. 21 Seti pɛlintɔ mɔni, aru a pɛ shɔ lanɛ. A tɛ vigbete ɓa a ɓɛɛ ɓa, a yee vi aɗɔgbete a ji ɓaa ɓa yɛ.>>

22 U shɔwɛrɛ geliu nɛ, <<Apɛ jawɛrɛ kɔ̃linɛǃ N yɛn shovi jo a nyakɔ n shataarɛǃ A zɛtɛttɔ n pɛ shɔ lanɛ, n tɛ vigbete ɓang nɓɛɛ ɓa n yee sɔ̃n aɗɔgbete ɓang nkɔng ɓaarɛ ɓa. 23 A ji pɔ̃sin saa u ɓa, a mbuntɛ saa ɓa a ruuviya? N sikɛ sɔɔnɛ n kpaa javiwɔɔ a yuuni.>>

24 Kɛɗɔn Kpatiu geli shɔgbete i ɗɔ shinɛ a ɗɔuni nɛ, <<Ɔ tɛ saa tarimɛunɛ au naani ɔ ã jawɛrɛ gbete u ɓɛɛ kopim.>>

25 Ama i geli i shɔwɛrɛu nɛ, <<Shɔwɛrɛ, u saa tarimɛɛ wɔɔ ɗɔn kopi viyaǃ>>

26 Shɔwɛrɛu risinya nɛ, <<N gelɔɔtɛ, shɔgbete u vi aɗɔnyɛ, shɔ ãvi ba sɔ̃njo ikɔ;>> ama shɔgbete u viɓa, ko ja shɔgbete au naa yɛ shɔ yɛtɛkati au naani. 27 Dɔdɔrim n shɔnopɔ̃ gbete iji kasing ruubii ɓa, shɔgbete iji kasiɓa nɛn ɔ̃rii kpati ɓa yɛ, ɔ n ti nɛ yɛm ɔ nyɔi ang dekɨn.

28 Naa Yesɔ sha vimtɛ a yɛkɛ Urushalima ai ɗekɨnkɔ a yai knti. 29 A ɗagbete Yesɔ atɛ maani a Betafaji a Betani ni gbete a kɔpɔ zeetung, a shou jaɗɔyi ziti a ɗekɨn. 30 A nya ãsinɛ miyi nɛ,<<Ɔ yɛnɛ a jakomɔɔ gbete au dekɨn miyi; ɔkɛ tonɛ, ɔ yɛ zɛ jagãtola wɔ shɔ matɔ gbete shɔ ji gẽ ɓa au yuuni ɓa, ɔ kaliurɛ ɔ n-tiu arɛ yɛm. 31 Shɔwɔɔ kɛ hɨ ɔnɛ, ɔ kali pɛ ruu iviya? Ɔ geliu nɛ, Uɓeyelapa kasitɔ.>>

32 U jaɗɔyi i yɛrɛ i kpaa jo nɔgbete geliyɛ. 33 Naa i kɛ kali jagãtolaunɛ, shɔ gãtolauyi i geliyinɛ, <<Ɔ kali jagãtolau aru iviya? >>

34 I kasinya nɛ, <<Uɓeyelapa kasitɔ.>>

35 I n ti Yesɔ jagãtolaurɛ. Kɛɗɔn i pɔ̃li i fãrã rɛ a yuu jagãtolauni Yesɔ gẽrɛ aɗɔn. 36 U ɗɔɔ yɛnɛ shɔ ɗɔgbete shɔ ɓati fãrã a nyaba.

37 Naa Yesɔ atɛ maani a Urushalimani, a ɗɔgbete nyaba ɓakirɛ yɛnɛ dɔkɔpɔ zeetung, kɛɗɔn u jadɔyi waanɛ gbete i toli nyayɛ i ɗɔɔ Ɗalapa dɔ̃rinɛ i ɗɔgbete i ɓɛliu yɛ a yeenya pẽniba aru vi pẽniba gbete i zɛyɛ:

38 I shanɛ<<Ɗa u tasi kpati gbete arɛ a Uɓeyelapa nii vɔɔ susãri bi niǃ

Ɔ̃nɛ binyatɔ̃nɛ a kolapa, bassinɛ yɛnɛ Ɗalapa biǃ>>

39 Kɛɗɔn gãsi Farasiyayi atette mɔɔ i nwari Yesɔ nya i shanɛ, <<Shɔmala, gelaa jadɔyi nɛ i ɔ̃ shokǃ>> 40 Yesɔ kasinya nɛ, <<N gelɔɔtɛ, i kɛ vɨnyanɛ, tarimiyi ayuu i yɛ gaa nya shatinɛtɔ.>>

41 Naa Yesɔ atɛ maani a komɔɔ Urushalimani, kɛɗɔn a sɨnrɛ aru Urushalimani. 42 Kɛɗɔn Yesɔ shanɛ, <<Ɔkɛ zɛ vi gbete n ti ɔ̃nɛ binyatɔ̃nɛ nɛn nɛ! Ama dɔdɔrim ɔ yɛ zɛɓaǃ 43 Ɗaa kanɛ ɔ shɔnopɔ̃yi i yɛ maanya kãsiri a tɔ̃pɔ̃ i kɨntɔɔ a tete ko-pi kapiya i tasɨn a ɔkɔɔni. 44 I yɛ lɛsɔɔ piti a awɔ shɔbiiyini kpai; i yɛ yaa tari gbete ɔ maa ɗɔɔ awuni ɓa ko gbete ayuu zɔɔni ɓa, vim yɛ ɔ̃ nankɔ aru gbete ɔji kasiɓa nɛ Ɗalapa arɛ aru U raa ɔtɔ ɓa. >>

45 Kɛɗɔn Yesɔ to jaa yuu ãnɛ gaa shɔ vi mɛlinɛi yikinirɛ. 46 A geliyi nɛ, <<Shɔ bee tɛttɔ a Ɗa nya ruubiini nɛ Ɗalapa shanɛ, <N jaa yɛ ɔ̃ wɛrɛ gbete shɔ gakɨn aɗɔnyɛ.> Ama ɔ risitɛ ɓɔɔyi i ɗɔɔ ɓunɛ!>>

47 A lee-lee Yesɔ mati shɔ vi a jaa yuu ãnɛ. yupɛ̃ni au pɛli vi yuu ãnɛ a jaa Ɗa yɛ, a shɔmala nya ãsinɛ Musa, a yupɛ̃ni dɔlayi i kã nyaba gbete nɛi nyɔ Yesɔ yɛ. 48 Ama i ji kpaa nyaba ɓa, aru gbete kopiya wesho jo a vigbete kɛ shanɛkɔ, iji kasi ɓa nɛ ruuwɔɔ u tɛyirɛ ɓa ko gbete ɓa.