Longa lya Ugima
1 Aho mwanduso ng’ana pfinu pfose pfiumbighwe yumwe yakemighwe Longa tsakabaho. Ayo Longa tsakakala na Imlungu, naye Longa kakala Mlungu. 2 Yeye tsakahamwe na Imlungu aho mwanduso. 3 Kubitila yeye pfinu pfose pfiumbighwa, na bila yeye kuduhu cho chose ichiumbighwe, mna apfila ipfiumbighwe. 4 Mghati mwake mumo mwaukalile ugima, na ugima awo tsauwa mwanga kwa iwanu. 5 Ghumwanga gholangatsa mchisi, na ichisi ng’achidaha kughutsima baye.
6 Tsakulawila munu yumwe iyatumighwe kulawa kwa Imlungu, taghwa lyake Yohana. 7 Ayo katsa kwa ukalangama, kuwalongela iwanu tsimbuli tsa ghumwanga, ili kubitila yeye iwanu wose wahulike na watoghole. 8 Yeye imwenyegho ng’akalile ghumwanga baye, ila katsa yawalongele iwanu tsimbuli tsa ghumwanga. 9 Aghuno ghugho ghumwanga ghwa kweli, ghumwanga ighung’ali ghukutsa muisi kuwalangatsa iwanu wose.
10 Ayo Longa kakala muisi, na hata kama Imlungu tsakaumba isi yose kubitila yeye, iwanu ng’awamtangile baye. 11 Katsa ukaye yake, lekeni iwanu wake ng’awambokele baye. 12 Lekeni iwanu wose iwambokele, awala iwamtoghole, kawatenda wadahe kuwa wana wa Imlungu; 13 iwana ing’awelekighwe baye kwa uwetso wa iwanu, wala kwa ngupfu tsa ilukuli, au ka pfayobama imunu, ila ka pfayobama Imlungu.
14 Naye Longa katendeka kuwa lukuli, kakala hamwe na twetwe. Na twetwe tuwona utunitso wake, utunitso ka wa Imwana nyalimwe, iyatsile kulawa kwa Baba, kamema uluso na ukweli.
15 Yohana kalonga tsimbuli tsake. Kakemelela kulonga, "Ayuno yuyo yaniwalongele apfino, ‘Ayo iyakutsa kuchughu kwangu mkulu kubita nene kwaapfila yeye tsakabaho ng’ana nene nyelekighwe.’ "
16 Kwa apfila mna ukutimilika kwake, twetwe twose tubokela ketseketse, uluso mchanya mwa uluso. 17 Mana Imulungu tsakalapfa Itorati kubitila Musa, lekeni uluso na ukweli pfitsa kubitila Yesu Kiristu. 18 Tsa kuduhu munu wowose ma iyamwonile Imulungu, ila Imlungu Mwana yaliyeka, iyali habehi ghendo na Baba, yuyo iyomtenda Imulungu yamanyike.
Usenga wa Yohana Imbatitsa
(Mat 3:1-12; Malk 1:1-8; Luk 3:1-18)