1 Yesu hayamalitse ukulonga agho, kenula tsinenge kalola kulanga, kalonga,

"Baba, ichipindi chipfika. Watende iwanu wawone utunitso wa Imwanagho, ili na Imwanagho yawatende iwanu wawone utunitso wako. 2 Kwaapfila kumwing'a Imwanagho ukulu kwa iwanu wose, ili yaweng'e ugima wa ghamatsuwa ghose ing'aghohupa awala wose waumwing'ile. 3 Auno wuwo ugima wa ghamatsuwa ghose ing'aghohupa, iwanu wakumanye ghweghwe Imlungu uliyeka wa kweli, na wammanye Yesu Kiristu yaumtumile. 4 Nene nikutunitsa ghweghwe muisi kwa kuimalitsa ing'onde yaungaile niisang'ane. 5 Lelo, Baba, unitunitse nene hamwe naghwe, kwa utunitso aula wanikalile nawo hamwe naghwe ahala ng'ana isi iumbighwe.

6 "Nikutenda umanyike kwa iwanu awala waungayile muisi. Tsawakala wako, naghwe kungaya nene, nawo waghakinda ghamalangulitso ghako. 7 Sambi wamanya ipfinu pfose pfaungayile pfolawa kuna ghweghwe. 8 Kwaapfila usenga waungayile niweng'a, nawo waubokela, na wamanya ghendo kuwa nene ndawa kuna ghweghwe, na watoghola kama ghweghwe kunituma.

9 "Nene nowalombela wawo. Siwalombela iwanu wa isi baye, ila nowalombela iwanu awala waungayile, kwaapfila awo wako. 10 Na wose iwali wangu pfipfila wako, na iwali wako pfipfila wangu; na nene nitunitsighwa mghati mwawo. 11 Wala nene sing'ali muisi keli baye, lekeni wawo wang'ali muisi, na nene nakutsa kuna ghweghwe. Ghwe Baba yuwelile! Wakinge kwa tsingupfu tsa litaghwa lyako lyaungayile, ili wawe wamwe kama ghweghwe na nene pfatuli wamwe. 12 Haning'ali nikala nawo, niwalolesa kwa tsingupfu tsa litaghwa lyako lyaungayile. Niwakinga, wala haduhu munu iyaghile, ila ayula iyandikighwe ukwagha, ili Ghamaandiko ghatimile. 13 "Lelo sambi nakutsa kuna ghweghwe, na aghano noghalonga haning'ali muisi, ili wameme indeng'elo yangu mna imimoyo yawo. 14 Niweng'a ghamalangulitso ghako na iwanu wa isi wawehila, kwaapfila wawo si wa isi aino baye, kama nene pfanili si wa isi aino baye. 15 Nene sikulomba uwalapfe muisi baye, ila nokulomba uwakinge na ayula Yehile. 16 Wawo si wa isi aino baye, kama apfila nene pfanili si wa isi aino. 17 Uwatende wele kwa aula ukweli; ghamalangulitso ghako ghagho ukweli. 18 Kama apfila ghweghwe pfaunitumile muisi, na nene pfipfo niwatuma muisi. 19 Lelo kwaajili yawo nelapfa nimwenyegho kuna ghweghwe, ili wawo nawo welapfe ghendo kuna ukweli.

20 "Si wawo waliyeka baye waniwalombela, ila pfipfila nowalombela na awala iwatsonitoghola nene kwa usenga wawo. 21 Wose wawe wamwe; kama ghweghwe Baba, pfauli mghati mwangu, na nene mghati mwako; na wawo wawe mghati mwetu,, ili iwanu wa isi watoghole kuwa ghweghwe kunituma. 22 Iheshima aila yaungaile nene, na nene niweng'a wawo, ili wawe wamwe kama twetwe pfatuli wamwe. 23 Nene mghati mwawo, naghwe mghati mwangu, ili wawe wamwe ghendo ghendo. Aho iwanu wa isi watsomanya kuwa ghweghwe kunituma, na kuwa kuwakunda wawo kama pfaunikundile nene.

24 "Baba, awala waungayile nobama wawe hamwe na nene hanu hanili, ili wayone iheshima yangu yaungayile; kwaapfila tsakunikunda ng'ana imisingi ya isi ikighwe. 25 Baba yuna ihaki, iwanu wa isi ng'awakumanyile baye, lekeni nene nikumanya; na awano womanya kuwa kunituma. 26 Nikutenda wakumanye, na nitsoghendelela kukutenda wakumanye, ili ukukunda akula kwaunikundie nene kuwe mghati mwawo, na nene niwe mghati mwawo."