1 Yesu hayamanyile kuwa Mafarisayo wahulika ka Yesu yang'ali yowatenda wanu wengi wawe wanafunzi na kuwabatitsa kubita Yohana, 2 hata ka Yesu tsa ng'abatitse baye iwanu, ila iwanafunzi wake wawo iwabatitse; 3 baho koka kulawa Yudeya koya Galilaya. 4 Mna ghumwanza ghwake tsakabamighwa yabitile Samariya.

5 Kapfika kuna ghumji ghumwe ghwa Samariya ighukemighwe Sikari, habehi na ghumghunda aghula Yakobu ghuyamwing'ile Yosefu, imwanaghe. 6 Aho hakala na ichisima cha Yakobu. Kwaapfila Yesu tsakepfa kwa ghumwanza ghwake, kebwagha hasi habehi na ichisima acho. Nayo tsaikala ka saa sita nemisi.

7 Pinga yumwe Msamariya katsa yadeghe matsi, Yesu kamlongela, "Ungaye ghamatsi nuwe." 8 Iwanafunzi wake tsawaghenda kuna ghumji kughula ichijo.

9 Ipinga ayo Msamariya kamwidika, "Ghweghwe kwa Myahudi, heule unilomba ghamatsi, na nene na pinga Msamariya?" Tsakalonga apfo kwa apfila Wayahudi na Wasamariya ng'awajagha hamwe baye.

10 Yesu kamwidika, "Ung'amanyile inzawadi iyolapfa Imulungu, naye nani iyokulongela, 'Ngaya ghamatsi nuwe', ung'amlombile yeye, naye yang'akwing'ile ghamatsi gha ugima."

11 Ipinga ayo kalonga, "ghwe mndewa, kwahela chinu cha kudeghela ghamatsi, na ichisima chighendesa hasi, lelo agho ghamatsi gha ugima ughapatile kwani? 12 Pfihi ghweghwe kwa mkulu kubita aba wetu Yakobu, iyatwing'ile ichisima achino; yeye imwenyegho kang'wa ghamatsi ghake, na iwanaghe, na wanyama wake?" 13 Yesu kamwidika, "Chila munu iyakunwa ghamatsi aghano, katsakona ng'ilu keli, 14 lekeni munu wowose iyakunwa ghamatsi ghanimwing'a nene, matsuwa ghose ng'atsakona ng'ilu keli baye, ila ghamatsi aghala ghanimwing'a ghatsakuwa mbwibwi mghati mwake, ibwilula ghamatsi ighatsomwing'a ugima wa ghamatsuwa ghose."

15 Ipinga ayo kamlongela, "Ghwe mndewa, ungaye ghamatsi agho, nileke kwona ng'ilu keli, wala ndeke kutsa ahano keli kudegha ghamatsi."

16 Yesu kamlongela, "Ghenda ukamkeme immale wako, utse naye."

17 Ipinga kamwidika, "Nahela mmale."

Yesu kamlongela, "Kulonga ghoya, haulonga kwahela mmale, 18 kwaapfila tsakuna wamale watano, na ayula yauli naye sambi si mmale wako baye. Chaulongile kulongesa ghendo."

19 Ipinga ayo kamlongela, "Ghwe mndewa, nakwona ghweghwe kwa nabii! 20 Iwahenga wetu tsawamuabudu Imulungu hana ichidunda achino, lekeni mwemwe Wayahudi mwolonga ako Yerusalemu kuko kwatubamighwa tukamuabudu Imulungu."

21 Yesu kamlongela, "Mai utoghole chanilonga, ghamatsuwa ghakutsa iwanu ng'awatsomuabudu baye Baba hana ichidunda achino, wala ako Yerusalemu. 22 Mwemwe Wasamariya mwoabudu ichinu ng'amchimanyile, lekeni twetwe Wayahudi twoabudu ichinu ituchimanyile, kwaapfila ukombotsi wolawa kwa Wayahudi. 23 Lekeni matsuwa ghakutsa, na sambi ghabaha, iwanu wa kweli iwoabudu watsomuabudu Baba kwa kulongotsighwa na Iloho na ukweli, kwaapfila iwanu ka awo wawo Baba wayobama wamuabudu. 24 Ambe Imulungu Loho, apfo iwanu wake iwomuabudu wobamighwa wamuabudu mna Iloho na ukweli."

25 Ipinga ayo kamlongela, "Nomanya ka Masiya kakutsa, iyokemighwa Kiristu, naye hayatsakutsa katsotulongela ghoya chila chinu."

26 Yesu kamwidika, "Nene yanilonga naghwe, ye yuyo."

27 Baho iwanafunzi wake Yesu woya, nawo wakangawala hawamwonile Yesu kolonga na ipinga. Lekeni kuduhu munu yamghutsile, "Apfi ubama choni?" Au "Heule ulonga naye?"

28 Kuya ipinga ayo kachileka ichia chake cha ghamatsi, koya kuna ghumji, kawalongela iwanu, 29 "Mtse mmwone imunu iyanilongele ipfinu pfose pfanitendile. Apfi ayu ng'odaha baye kuwa yuyo Kiristu?" 30 Apfo iwanu walawa kuna ghumji wamghendela Yesu.

31 Ichipindi chicho iwanafunzi wake wang'ali womdedetsa wolonga, "Gwe Mndewa, tanu uje!"

32 Lekeni kawedika, "Nene nina chijo ing'amchimanyile baye."

33 Kuya iwanafunzi wake wandusa kwighutsa, "Pfihi hana munu kamghalila chijo?"

34 Yesu kawalongela, "Ichijo changu chicho achino, kusang'ana aghala ghayobama iyanitumile, na kuimalitsa isang'ano yake. 35 Mwemwe ng'amlonga baye, ‘Ing'ali miyetsi mine, kuya ghamatsuwa gha mapfuno ghopfika?’ Lelo nowalongela, mwinule tsinenge mlole imighunda! Ghamatsawo ghakomala, ghobamighwa ghapfunighwe! 36 Naye iyopfuna kobokela mshahala na kolunda hamwe ghamatsawo kwaajili ya ugima wa matsuwa ghose, ili imunu iyohanda na imunu iyopfuna wadeng'elele hamwe. 37 Baho halikuwa kweli alila lyawolonga iwanu, ‘Yumwe kohanda, yungi kopfuna.’ 38 Nimtumani kupfuna mna imighunda yang'amlimile mwemwe, wanu wangi wasang'ana, namwe mwobweda kwa isang'ano yawo."

39 Wasamariya wengi wa ghumji aghula wamtoghola Yesu kwa achila chiyalongile ipinga ayula ka, "Kanongela ipfinu pfose pfanitendile." 40 Apfo Wasamariya hawamghendele, wamdedetsa yakale nawo, naye kakala ako matsuwa meli.

41 Wanu wangi wengi watoghola kwa ghamalonga ghake, 42 na wamlongela ipinga ayula, "Sambi totoghola, si kwa achila chulongile ghweghwe chili yeka baye, ila kwaapfila tuhulika twetwe tuwenyegho; na twomanya ka imunu ayuno yuyo ghendo imkombotsi wa isi yose."

43 Matsuwa meli haghamalile, Yesu kalawa ako kaghenda Galilaya. 44 Kwaapfila Yesu imwenyegho tsakalonga, "Nabii ng'otogholighwa baye mna isi yake imwenyegho." 45 Hayapfikile Galilaya, wagalilaya wambokela, mana tsawaghona ghose ghayatendile Yesu ako Yerusalemu mna ichihungo cha pasaka; kwaapfila nawo tsawaghenda kuna ichihungo acho.

46 Kuya Yesu kaghenda keli kuna ghumji ghwa Kana ako Galilaya, hanu ahala hayaghaluse ghamatsi kuwa dipfai. Lelo kukala na chilongotsi yumwe yana imwana iyoghula ako Kaperinaumu. 47 Ichilongotsi ayo hayahulike ka Yesu kapfika ako Galilaya kulawa Yudeya, kamghendela kamlomba yaghende yakamhonye imwanaghe, iyakalile laghalagha mauti.

48 Yesu kamlongela, "Mwemwe ng'amtoghola ghendo baye bila ukwona ipfitango na ipfihulo."

49 Ichilongotsi ayo kamwidika, "Ghwe Mndewa, hulumka hima ng'ana imwanangu yafe." 50 Yesu kamwidika, "Haya uka, imwanagho kahona."

Imunu ayula katoghola alila liyamlongele Yesu, kalawa koka. 51 Hayang'ali kamnzila kohulumka, ketingana na iwatumwa wake, wamlongela ka imwanaghe kahona.

52 Kawaghutsa imwana yahonile saa ngapi, nawo wamlongela, "Jana saa saba nemisi ihoma imleka." 53 Baho baba ayula katanga ka yiyo isaa aila Yesu hayamlongele, "Imwanagho kahona." Apfo kamtoghola Yesu, yeye hamwe na iwanu wose wa ikaye yake.

54 Lelo achino chikala chitango cha keli chayatendile Yesu hayalawile Yudeya kughenda Galilaya.