1 Yesu kawalongela, "Nowalongela kweli ghendo, imunu yang'akwingila mna ichikwama cha wang'olo kwa kubitila inzila ya lilango, ila kakwingila kwa kudinila hanu hangi, ayo mbapfi na mboka. 2 Lekeni iyakwingila kubitila inzila ya lilango ayo yuyo imdimi wa wang'olo. 3 Ayo, imbetetsi wa lilango kompfughulila, na wang'olo wohulikitsa litsi lyake; naye kowakema wang'olo wake kwa ghamataghwa ghawo, na kowalapfa kunze. 4 Yang'awalapfa kunze wang'olo wake wose kowalongolela, na wang'olo wake womuwinza kwaapfila wolimanya litsi lyake. 5 Lekeni imunu mhenza ng'awatsomuwinza baye, ila watsomkimbila, kwaapfila ng'awomanya baye litsi lya imunu mhenza." 6 Yesu kawalongela ing'ungo ayo, lekeni wawo ng'awamanyile baye chinu chachi chayang'ali yowalongela.

7 Kuya Yesu kalonga keli, "Nowalongela kweli ghendo, nene nalilango lya wang'olo. 8 Iwanu wose iwanilongolele tsawabapfi na waboka, lekeni wang'olo ng'awawahulikitse baye. 9 Nene nalilango. Munu wowose yang'engila kubitila nene katsokombolighwa. Katsakwingila na kulawa, naye katsopata ghumghina. 10 Imbapfi kakutsa yebe, yakome, na yahinye; nene nitsa ili wawe na ugima, na wawe nawo tele ghendo.

11 "Nene namdimi iyaninoghile. Mdimi yanoghile kolapfa ugima wake kwa ajili ya wang'olo. 12 Imunu iyodima kwa kulihighwa, ing'ayali imtwatsa wa wang'olo baye, hayomwona yumbwa wa kumhulo kakutsa, kowaleka wang'olo kotsuma; na yumbwa wa kumhulo kowaghogha na koughima wanguwapwililisa. 13 Imunu ayo kotsuma kwaapfila yeye kamunu wa kulihighwa, na ng'ohindaghitsa ukulolesa wang'olo baye. 14 "Nene namdimi iyaninoghile, nowamanya wang'olo wangu, na wang'olo wangu wonimanya, 15 kama apfila Baba pfayonimanya nene, na nene pfanimmanya Baba. Na nene noulapfa ugima wangu kwa ajili ya wang'olo. 16 Na ng'olo wangi ninawo, iwali si wa ichikwama achino baye, awo pipfila nobamighwa niwaghale kwanyili. Nawo litsi lyangu watsolihulika, na kutsakuwa na kingili limwe na mdimi yumwe.

17 "Kwa ajili ayo Aba wangu konikunda, kwaapfila noulapfa ugima wangu ili niubokele keli. 18 Kuduhu munu iyoulapfa ugima wangu, ila nene noulapfa nimwenyegho. Uwetso ninawo wa ukuulapfa, na wa kuusola keli. Nibokela laghitso alino kulawa kwa Aba wangu." 19 Tsimbuli atsino tsa Yesu tsiwatenda Wayahudi weghole keli. 20 Iwanu wamwenga walonga, "Kana chinyamkela na kana lukwale. Heule mumtegheletsa?" 21 Lekeni wangi walonga, "Imunu yana chinyamkela ng'odaha baye kulonga apfino. Angu chinyamkela kodaha kumuhonetsa imunu chifita?"

22 Ako Yerusalemu kukala na Chihungo cha Kulika wakifu lihekalu, na tsaghukala msimu ghwa chipfeghetsi. 23 Naye Yesu yang'ali yakwanga mna lihekalu, hana ilukumbi lwa Selemani. 24 Wapfilongotsi wa Wayahudi wamtsunguluka na wamghutsa, "Utsotutsupfatsupfa tsimbutsi tsetu mbaka tsuwachi? Tulongele mwatsimwatsi kama ghweghwe yuyo Kiristu." 25 Yesu kawedika, "Tsaniwalongela, lekeni ng'amtoghola baye. Ipfinu pfanitenda kwa litaghwa lya Aba wangu pfipfo ipfinilangusa, 26 lekeni mwemwe ng'amtoghola baye kwaapfila mwemwe ng'amli wang'olo wangu baye. 27 Wang'olo wangu wohulika litsi lyangu, na nene nowamanya, nawo woniwinza. 28 Noweng'a ugima wa ghamatsuwa ghose ing'aghohupa, nawo ng'awatsohupa baye. Kuduhu munu iyodaha kuwaboka mna ghamoko ghangu. 29 Baba wangu, iyangaile awo, kamkulu kubita wose, kuduhu munu iyodaha kuwaboka kulawa mna ghamoko gha Aba wangu. 30 Nene na Aba twachinu chimwe."

31 Wapfilongotsi wa Wayahudi wadondola keli ghamabwe wamtowe. 32 Yesu kawalongela, "Niwalangusa sang'ano nyingi itsilawile kwa Aba. Apfi sang'ano ihi iwatenda mnitowe na ghamabwe?"

33 Nawo wapfilongotsi wa Wayahudi wamwidika, "Ng'atukwasila ghamabwe kwaapfila kutenda sang'ano tsinoghile baye, ila kwa ajili ya ukukufulu! Ghweghwe yauli mwanadamu, lekeni kwetenda ghumwenyegho kwa mlungu."

34 Yesu kawedika, "Apfi ng'ayandikihwe baye mna Ghamalaghitso ghenu kuwa Imlungu tsakalonga, ‘Mwemwe mwa milungu?’ 35 Kama Imlungu kawakema milungu awala iweng'ighwe lilonga lyake, na Ghamaandiko ng'aghodaha kutengulighwa baye, 36 lelo ayula Baba iyamtawatse na kumtuma muisi, mwemwe mwolonga kokufulu, kwaapfila nilonga ‘Nene na lmwana wa Imlungu?’ 37 Ana sitenda baye tsisang'ano tsa Aba wangu, mleke kunitoghola, 38 lekeni ana nitsitenda tsisang'ano tsake, hata kama mwolema ukunitoghola, togholeni tsisang'ano atso, ili mmanye na mtange kuwa Baba kamghati mwangu, na nene namghati mwa Baba."

39 Kuya wabama keli wamghoghe, lekeni Yesu kaswekuka kawaleka.

40 Kuya Yesu kaghenda keli kumwambu kwa ghumto ghwa Yoridani, hanu ahala Yohane hayang'ali yobatitsa iwanu, kakala kuko. 41 Wanu wengi wamghendela Yesu, na wang'ali wolonga, "Yohane kweli ng'atendile miujitsza baye, lekeni chila mbuli ya imunu ayuno iyalongile Yohane ilongesa." 42 Na wanu wengi ako wamtoghola Yesu.