1 Litsuwa lya kadatu hambele, tsakukala na chihungo cha ukukwela ako Kana, mna isi ya Galilaya. Na mamo wake Yesu tsakabaho. 2 Yesu na iwanafunzi wake nawo pfipfila tsawakemighwa mna ichihungo acho. 3 Idipfai haimalile, mamo wake kamlongela Yesu, "Wahela idipfai."

4 Yesu kamwidika, "Mamo, tuna choni cha ukutenda nene na ghweghwe? Isaa yangu ng'ana ipfike baye!"

5 Kuya mamo wake kawalongela iwatumighwa, "Chochose chiyowalongelani tendeni."

6 Bahala tsahana mabigha gha mabwe sita gha ghamatsi, ighekighwe kwa ajili ya ichihendo cha Wayahudi cha ukwihopfugha, chila bigha lyodaha kumema galoni ishilini mbaka salasini. 7 Yesu kawalaghitsa iwatumighwa, "Memetseni ghamatsi mna ghamabigha agho." Nawo waghamemetsa topu ghendo!

8 Kuya kawalaghitsa, "Lelo mdeghe, mkamwing'e imkulu wa ichihungo."

Nawo wadegha, wamghalila. 9 Naye imkulu wa ichihungo kalanza ghamatsi ighaghaluke kuwa dipfai, wala ng'amanyile baye kwailawile, lekeni iwatumighwa iwadeghile ghamatsi tsawamanya. Kuya imkulu ayo kamkema immale iyokwela hambalimbali, 10 kamlongela, "Chila munu kandusagha ukulapfa idipfai inoghile, kuya iwanu hawakuwa wapatika, kolapfa lilusu. Lekeni ghweghwe kuyika idipfai inoghile mbaka sambi!"

11 Ichinu achino cha mwanduso cha ukukangawatsa Yesu kachitenda ako Kana, mna isi ya Galilaya; kalangusa utunitso wake, na iwanafunzi wake wamtoghola.

12 Hambele Yesu na mai wake, hamwe na ndughu tsake na iwanafunzi wake wahulumka waghenda Kaperinaumu. Wakala ako matsuwa chidogho.

13 Ipasaka ya Wayahudi haikalile habehi, Yesu kagheluka kaghenda Yerusalemu. 14 Mna Lihekalu, Yesu kawapfika iwanu woutsa ng'ombe, wang'olo na njiwa, na wanu wangi wakala hana tsimetsa wobadili tsisendi.Imunu iyobadili tsisendi 15 Yesu kabota chiboko chikulu cha mitsabi, kawawinga iwanu wose mna Lihekalu, hamwe na wang'olo na wang'ombe. Pfipfila katsibidula tsimetsa tsa iwobadili tsisendi na kutsipwililisa tsisendi tsawo. 16 Kuya kawalongela iwanu iwang'ali woutsa wanjiwa, "Pfilapfeni pfilawe ahano ipfinu apfino! Mleke kulitenda lihekalu lya Aba wangu kuwa ghulilo."

17 Iwanafunzi wake wakumbuka ichandikighwe, "Wipfu wa ing'anda yako utsonihinya."

18 Kuya iwakulu wa Wayahudi wamghutsa Yesu, "Apfi udaha kutenda chinu chachi cha kukangawatsa kutulangusa ka kuna uwetso wa ukutenda agha ghose?"

19 Yesu kawedika, "Muimwaghe Ing'anda aino ya Imulungu, nene nitsoitsenga keli kwa matsuwa madatu!"

20 Iwakulu wa Wayahudi wamwidika, "Ing'anda aino ya Imulungu itsengighwa kwa miyaka alubaini na sita, naghwe utsoitsengatse kwa matsuwa madatu?"

21 Lekeni Ing'anda ya Imulungu iyang'ali yoilonga Yesu tsaikala ilukuli lwake. 22 Apfo, hayatsihiluke, iwanang'ina wake wakumbuka achila chayalongile. Kuya waghatoghola Ghamaandiko na waitoghola imbuli aila iyalongile Yesu.

23 Yesu hayang'ali Yerusalemu mna Ichihungo cha pasaka, wanu wengi wona ipfinu pfa kukangawatsa pfayang'ali yotenda, wamtoghola. 24 Lekeni Yesu tsang'awehuwile baye, kwaapfila tsakawamanya iwanu wose. 25 Ng'abamile baye munu wowose yamlongele mbuli tsa iwanu, kwaapfila Yesu tsakamanya ighali mghati mwa ghumoyo ghwa imunu.