Luka 19

Yesu na Zakayo

1 Yesu tsakengila mne ghumji ghwa Yeriko na yang’ali yobita mghati mwa ghumji agho. 2 Na ako kukala ne imunu yumwe taghwa lyake Zakayo, imkulu we iwasola kodi, naye tsakakala tajiri. 3 Tsakabama amwone Yesu yalitse, lekeni ng’adahile bae kwaapfila tsahana iwanu wengi, naye tsakakala mghuyi. 4 Apfo katsuma, kawalongolela iwanu, kadina mchanya mwe mkuyu ili amwone Yesu, kwaapfila katsobitila inzila iila. 5 Yesu hapfikile hanu hala, kalola mchanya, kamlongela Zakayo, "Zakayo, hima uhulumke, kwaapfila leloli nobamighwa nisinde mng’anda mwako."

6 Apfo Zakayo kuhulumka himahima kambokela kwa kudeng’elela. 7 Iwanu wose hawonile apfo, wandusa kunung’unika na ukulonga, "Kaghenda kukala kwa ‘imunu yane nzambi.’ "

8 Lekeni Zakayo kema, kamlongela Yesu, "Lola IMNDEWA, nene nitsoweng’a wahingwa inusu ye ipfinu pfangu, na ka nimboka imunu wowose ichinu, nitsomuyitsila mala nne."

9 Yesu kamlongela, "Leloli ukombotsi upfika mne ing’anda ino, kwaapfila ayu naye kamtsukulu wa Abrahamu. 10 Mana Imwana wa Imunu katsa kubama na kukombola iwanu iwaghile."