1 Ghwe Imulungu, iwanu wa tsiisi, waiboka isi yako

waitenda ing'anda ya Imulungu ihe,

na waghutenda ghumji ghwa Yerusalemu ghuwe mahame.

2 Waweng'a wapfideghe wa kulanga tsing'uli tsa iwatumighwa wako iwe chijo chawo,

inyama ya iwanu wako iwatogholighwa waweng'a wanyama wa kubagho waje.

3 Waimwagha idamu yawo ka womwagha ghamatsi,

mna Yerusalemu yose, wala kuduhu munu wa kuwatsika.

4 Hambele ha iwali habehi natwe tupfatsighwa ichinyala,

na awala iwotutsunguluka wotunanga na kutuseka.

5 Mbaka tsuwachi, Ghwe IMNDEWA, kutsoghendelela kutughudubukila,

matsuwa ghose ing'aghomala? Pfihi imaya yako itsakwaka kama moto?

6 Uwamwaghile imaya yako ghamataifa ing'aghokumanya ghweghwe,

na tsifalume ing'atsilikema litaghwa lyako,

7 kwaapfila wamkoma Yakobu, na watsihinya ghendo tsikaye tsake.

8 Uleke kughakumbuka ighehile gha iwahenga wetu

usumke utse utwonele libatsi lyako, kwaapfila tudununzighiwa ng'ani

9 Utwapfile ghwe Imulungu wa ukombotsi wetu,

kwa ajili ya utunitso wa litaghwa lyako,

Utukombole, na utuleghusile tsinzambi tsetu,

kwa ajili ya litaghwa lyako.

10 Hebali ghamataifa ghatse ghalonge,

"Yali kwani Imulungu wawo?"

Leka tsinenge tsetu tsone pfauwaliha ichisasi ghamataifa

kwa idamu ya iwatumighwa wako iwamwaghile.

11 Icililo cha iwanu iwohighwe chipfike hambele hako,

ghumoko ghwako ghuna tsingupfu ghuwakombole awala iwahighighwe ukufa.

12 Na wali behi na twetwe uwalihe mmambagha mwawo mala saba,

kwa ghamaligho ghawakulighile ghweghwe, Ghwe MNDEWA.

13 Na twetwe iwanu wako, yatuli wang'olo wa ghumghina ghwako,

Tutsokulongela mighede matsuwa ghose ing'aghomala,

kulawa lweleko mbaka lweleko tutsolonga tsisifa tsako.