1 Mdeng'eleleni Imulungu kwa kumtowela lukenze, isi yose!

2 Mwimbileni litaghwa lyake pfalili kulu,

na mmwing'e utunitso wa tsisifa tsake.

3 Mlongeleni Imulungu, "Ghamatendo ghako ghokangawatsa ng'ani!

Tsingupfu tsako ng'ulu sideke,

apfo maaduwi tsako wokutsila aku woghudema.

4 Isi yose yokwinamila ghweghwe na yokutunya kwa ukukwimbila,

wolimbila litaghwa lyako pfalili kulu."

5 Mtse mlole ghayatendile Imulungu,

ghoghuma wogha aghala ghayawatendele iwanu.

6 Kaitenda ibahali iwe hanu hanyalile,

iwanu waloka ghumto kwa ghamaghulu,

kuko twetwe tumdeng'elelela,

7 Yeye kotawala matsuwa ghose kwa tsingupfu tsake ng'ulu,

tsinenge tsake tsolola mna tsiisi tsose tsa iwanu,

ili awala iwomlema waleke kumwinukila.

8 Mtunyeni Imulungu wetu, mwemwe muwanu,

na litsi lya ukutunya kwake kuhulikike,

9 Yeye iyatwikile tuwe wagima,

wala ng'ailekile baye imighulu yetu iteletse.

10 Kwaapfila ghweghwe kutughetsa, ghwe Imulungu,

kutughetsa ghendo ka pfaighetsighwa ifetsa mmoto.

11 Kutuleka twonzighwe mlwapfu,

na imighongo yetu kuitwika mitsigho mitito.

12 Kuwaleka iwanu watukalile mwitwi mwetu,

tubita mna ghumoto, na mna ghamatsi,

lekeni sambi kutughala kuna isi imemile ighanoghile.

13 Nitsakutsa kuna ing'anda yako na nambiko tsa kulakatsighwa,

nitsoliha tsinatsili tsangu tsanyikile,

14 atsila tsanongile kwa lulimi lwangu ka nitsolapfa,

atsila ghendo tsanilongile kwa ghumlomo ghwangu,

ahala hanikalile namna ghamaghayo.

15 Nitsokulapfila nambiko tsa ukulakatsighwa tsa wanyama iwanonile,

hamwe na nambiko tsa ng'unzu,

pfipfila nitsokulapfila na wang'ombe na wamene.

16 Mtse mhulikitse, mwemwe mwose yamumpfuka Imulungu,

na nene nitsowapetelani aghala ghayanitendele.

17 Nimlilila yeye kwa ghumlomo ghwangu.

na ilulimi lwangu lung'ali lumtunya yeye hanimlilile.

18 Ka ning'aghapfisile ighehile mmoyo mwangu,

IMNDEWA yang'alekile kunihulikitsa.

19 Lekeni Imulungu kanihulika ghendo,

kahulika litsi lya ukulomba kwangu.

20 Yatunyighwe Imulungu,

kwaapfila ng'alemile baye ukulomba kwangu,

wala ng'alekile baye kunitendela uluso.