1 Hebali, Ghwe Imulungu, kutwasa matsuwa ghose ghendo?

Hebali imaya yako itwakila twetwe ituli ka wang'olo wa ghumghina ghwako?

2 Uwakumbuke iwanu wa ghumtingano ghwako,

wauwasaghule wawe wako tangiya ghumwande,

likabila lyaulikombole liwe lyako,

uchikumbuke chidunda cha Sayuni, ahala ghweghwe haukalile.

3 Uhenulile ghamatsayo ghako hanu ihahinyike ng'ani ha ghamahame,

wone chila chinu chihile aduwi chayatendile hanu helile.

4 Aduwi tsako waduma haghatighati ha hanu hako hausaghule,

wemitsa tsibendela tsawo kwa ukutuhuma.

5 Woneka ka wanu iwakwinula tsihoya wagane imibiki ya kumuhulo.

6 Kuya wabenabena imilango ya ing'anda ya Imulungu ikighwe unzolingo

kwa tsihoya na tsinyundo.

7 Wahalakatsa kwa moto hanu hako helile,

hanu halikala litaghwa lyako wahatenda hehe.

8 Mmimoyo mwawo walonga, "Leka tuwahinye ghendo."

Na chila hanu muisi hawetinganagha iwanu wamtambikile Imulungu wahalakatsa.

9 Ipfitango pfetu ng'atupfona keli baye,

wala sambi ng'ahana nabii baye hamwe na twetwe,

wala haduhu hata munu yumwe mna twetwe,

iyomanya aghano ghatsoghendelela mbaka tsuwachi.

10 Ghwe Mlungu, iwotuhinya watsokubetsa mbaka tsuwachi?

Angu aduwi katsoliligha litaghwa lyako matsuwa ghose ing'aghomala?

11 Hebali ukuyitsa kuchughu ghumoko ghwako,

ghumoko ghwako ghwa kujilo?

Ugholose ghumuko ghwako uwahinye ghendo.

12 Naghwe, ghwe Mlungu, kwa mfalume wangu tangia ghumwande,

koghala ukombotsi muisi.

13 Ghweghwe kwa tsingupfu tsako kuighola ibahari,

kughahonda ghamatwi gha wanyangumi iwali mna ghamatsi.

14 Ghweghwe kughahonda ghamatwi gha Lewiatani,

kuweng'a inyama yawo iwanu iwokala kuna inyika waje.

15 Ghweghwe yuyo wikile tsimbwibwi na ipfikolongo,

na ghweghwe kuinyalitsa imito imemile ghamatsi.

16 Imisi yakwako na ichilo nacho chakwako,

ghweghwe kwika ghumwetsi hanu hake na litsuwa hanu hake.

17 Kwika tsimbaka tsose tsa isi,

ichiyangatsi na ichipfeghetsi ghweghwe yuyo yupfitengenetse.

18 Ghwe MNDEWA, ukumbuke apfila maaduwi tsako pfawakubetsile,

na iwanu wabotsi pfawalilighile litaghwa lyako.

19 Uleke kumwing'a mnyama mkali ugima wa injiwa wako,

Ugima wa iwanu wako uleke kuusemwa matsuwa ghose.

20 Ukumbuke lilaghano lyako,

mana chila hanu hana ichisi muisi hamema ghehile.

21 Uleke kuwaleka iwonelighwe waghelighwe chinyala,

waleke iwahingwa na iwali hela pfinu walityunye litaghwa lyako.

22 Winuke, Ghwe Mlungu, wiyamile ghumwenyegho,

Ukumbuke imunu mbotsi pfayokuligha misi yose.

23 Uleke kwisemwa ukukemelela kwa maaduwi tsako,

na litsogho lya awala iwokubela, pfawoghendelela ukudalamka.