1 Matsuwa ghose nene nitseghodela IMNDEWA,

imilomo yangu itsoghendelela ukumtunya yeye.

2 Ghumoyo ghwangu ghotsomdeng'elela IMNDEWA,

iwaonelighwe wahulike na wasekelele.

3 Mtunyeni IMNDEWA hamwe na nene,

Na tulitunye litaghwa lyake hamwe.

4 Nene nimbama IMNDEWA, naye kanyidika,

kanihonetsa kulawa mna iwogha wangu wose.

5 Iwanu iwomlola yeye wakuwa ka ghumwanga,

ipfihanga pfawo ng'apfitsakona chinyala baye.

6 Imunu ayuno imhingwa kamkema,

naye IMNDEWA kamhulika,

na kamkombola kulawa mna ghamaghayo ghake ghose.

7 Imalaika wa IMNDEWA kowatsunguluka yawakinge awala iwompfuka yeye,

naye kowakombola mna ighehile ghose.

8 Lanzeni mlole apfila pfayanoghile IMNDEWA,

kabweda ghendo imunu ayula iyomsumila yeye.

9 Mpfukeni IMNDEWA, mwemwe muwanu wake mwelile,

kwaapfila wose iwompfuka yeye ng'awohungukighwa na chinu chochose baye.

10 Hata iwana wa isimba wohungukighwa, na wakona nzala,

lekeni iwombama IMNDEWA ng'awatsohungukighwa baye na chochose ichinoghile.

11 Mtse mwemwe muwana, mnihulikitse,

na nene nitsowafunda ukumpfuka IMNDEWA.

12 Imunu yuhi iyonoghelwa na ugima,

iyobama ukwona matsuwa mengi ighanoghile?

13 Ulughome ilulimi lwako luleke ukulonga ighehile,

na imilomo yako ileke ukulonga ughutsu.

14 Uleke kutenda ghehile, tenda ighanoghile,

na ukale ghoya na wayagho.

15 Tsinenge tsa IMNDEWA tsowalolesa iwanu wana ihaki,

na ghamaghutwi ghake kaghategha ghahulikitse ichililo chawo.

16 Uhanga wa IMNDEWA wokala kutali na iwanu iwotenda ighehile,

naye katsowalapfa waleke kukumbukighwa keli muisi.

17 Iwanu wana ihaki womlilila IMNDEWA, naye kowahulika,

kowakombola kulawa mna ghamaghayo ghawo ghose.

18 IMNDEWA kahabehi na iwanu awala iwatenyuke imimoyo,

na awala iwalihela chinu cha ukwihuwila.

19 Ghamaghayo gha imunu yana ihaki mengi,

lekeni IMNDEWA komkombola na agho ghose.

20 Koyika migima imipate yake yose,

ng'ahana hata ghumwe ighubeneke.

21 Ukwiha kwawo iwanu iwehile kutsowakoma,

na awala iwowehila iwana ihaki watsohighighwa.

22 IMNDEWA koukombola ugima wa iwatumighwa wake,

na awala wose iwomtsumila yeye ng'awatsakoneka wana totso baye.