1 Leka nene nimtunye IMNDEWA,

na apfila pfose ipfili mghati mwangu pfilitunye litaghwa lyake ilyelile.

2 Nene nimtunye IMNDEWA

wala nileke kuusemwa uluso wake wose,

3 yeye iyonileghusila ghamatotso ghangu ghose,

na iyonihonetsa ghamatamu ghose.

4 Yeye yuyo iyoukombola ugima wangu kulawa kuna likabuli,

na iyonipfatsa litaji lya uluso wake na libatsi,

5 iyonyongetsela ighanoghile mna ugima wangu wose,

iyonitenda niwe msongolo keli na niwe na ngupfu ka magengele.

6 IMNDEWA yuyo iyotenda gha haki,

na koweng'a ihaki awala wose iwodununzighwa.

7 Katenda tsinzila tsake tsimanyike kwa Musa,

na ghamatendo ghake kwa iwanu wa Isiraeli.

8 IMNDEWA kana libatsi na uluso,

ng'osumka kona maya baye,

na kamema uluso wa lilaghano lyake.

9 Ng'atsoghendelela baye kukembela matsuwa ghose,

wala ng'oghudubuka baye matsuwa.

10 Ng'atutendele baye kwa ukulola tsinzambi tsetu pfatsili baye,

wala ng'atulihile baye kwa ukulola ukwiha kwetu,

11 Ka apfila kulanga pfakuli kutali ng'ani na isi,

pfipfo pfauli mkulu uluso wake kwa awala iwompfuka.

12 Ka mashariki pfaili kutali kulawa magharibi,

pfipfo pfayatsasile kutali na twetwe tsinzambi tsetu.

13 Ka apfila aba pfayowonela libatsi iwanaghe,

pfipfo IMNDEWA pfayowonela libatsi iwanu wake,

14 kwa apfila yeye katumanya pfatuli,

na kokumbuka ka twetwe twatimbwisi hela.

15 Ghamatsuwa gha imunu gheghala na imitsani,

kokula ka luwa lya kumghunda,

16 kuya libeho lyolighulusa litsani alyo, nalyo lyohupa,

na hanu halikalile ng'ahatsomanyika keli baye.

17 Lekeni uluso mkulu wa IMNDEWA wokala matsuwa ghose,

kwa awala wose iwompfuka,

na ihaki yake kwa iwana wa iwana awo,

18 awala iwolikinda lilaghano lyake, na awala iwokumbuka ghamalaghitso ghake na ukughatenda.

19 IMNDEWA kachimisa ghoya ichighoda chake cha ufalume kulanga,

na ufalume wake wotawala ipfinu pfose.

20 Mtunyeni IMNDEWA, mwemwe wamalaika wake,

mwemwe yamna tsingupfu, yamlikinda lilonga lyake

na ukutegheletsa litsi ya lilonga lyake.

21 Mtunyeni IMNDEWA lijeshi lya malaika wake wose,

mwemwe iwatumighwa wake wamtenda achila chayobama.

22 Mtunyeni IMNDEWA, tsisang'ano tsake tsose,

mumtunye chila hanu hayotawala.

leka nene nimtunye IMNDEWA!