1 Nikutsumila ghweghwe, Ghwe MNDEWA,

nileke kughelighwa chinyala hata chidogho.

ghweghwe yutenda ighali gha haki unikombole.

2 Uwambe lighutwi lyako unitegheletse nene,

na unikombole nene sambi baha,

kuna nene uwe bambalawe lya ukutsumila,

uwe ngome inikombola nene,

3 kwaapfila ghweghwe kwa bambalawe lyangu, na kwa ngome yangu,

kwa ajili ya litaghwa lyako unikinge, na unilongotse.

4 Unyonzole kulawa mna ghumtegho ghwawaniteghele hanu hapfisike,

mana ghweghwe yuyo yanikutsumila.

5 Mna ghamoko ghako noyika iloho yangu, ghweghwe kunikombola,

Ghwe IMNDEWA, Imulungu wa yutogholeka.

6 Nowehila awala iwopfitambikila ipfinyagho,

lekeni nene nehuwila IMNDEWA.

7 Nitsosekelela na kuudeng'ela uluso wako,

kwaapfila ghweghwe kwona ukudununzika kwangu,

na kumanya apfila pfaighanzike iloho yangu.

8 Wala ng'unighelile baye mna ghamoko gha aduwi tsangu baye,

lekeni ghamaghulu ghangu kughemisa hanu hana ugima.

9 Umbonele libatsi, Ghwe MNDEWA, namna ghamaghayo;

inenge yangu iyauka yau ghendo kwa apfila pfanighanzika,

ilukuli lwangu na iloho yangu pfose pfikeng'eneka kwa usungu.

10 Nikeng'eneka ghendo kwa ukulila,

na imiyaka yangu ihunguka kwa ukughutilila.

tsingupfu tsangu tsimala ghendo kwa tsinzambi tsangu,

na imipate yangu inyala.

11 Maaduwi tsangu wose wonibetsa,

nakoneka nachihulo kwa wayangu wanikala nawo habehi,

na awala iwanimanyile wombona nene ka chinu cha ukupfukighwa,

na hanitingana nawo mnzila wawo wonitsuma.

12 Nene nisemwighwa ghendo ka munu yafile,

nene niwa kama chinongo ichituliketulike.

13 Nohulika iwanu wengi pfawenong'onetsa ung'enye,

wogha mkulu wonitsila kulawa chila ubali,

wonikila mitsengwe, wobama wanikome.

14 Lekeni nene nehuwila ghwegwe, Ghwe MNDEWA,

nolonga, "Ghweghwe yuyo Imulungu wangu."

15 Ghamatsuwa gha ugima wangu gha mmoko mwako,

nikombole kulawa mna ghamoko gha aduwi tsangu,

na awala iwonikoleletsa.

16 Ichihanga chako chinilangatse nene mtumighwa wako,

unikombole kwa uluso wako ing'autsigha baye.

17 Ghwe MNDEWA, uleke kundeka niumbuke,

kwaapfila nene nikulilila ghweghwe,

Lekeni waleke iwehile waumbuke,

waghende na watsighile kutsimu na wenyamale tulu.

18 Uidiwe imilomo ya awala iwolonga ughutsu inyamale tulu,

imilomo iwalonga pfihile wanu wana ihaki,

imilomo ya awala iwana ichidandali na iweghoda.

19 Lola apfila pfauli mkulu uluso wako,

uluso wauwekile awala iwokupfuka ghweghwe,

yuweng'a awala iwokutsumila ghweghwe,

aku iwanu wose wolola.

20 Ghweghwe kowapfisa hanu hana ugima hauli ghweghwe,

wokala kutali na imitsengwe ya iwanu.

kowaghubika na ichimbeho chako wakale kutali na imilimi ya ughobo.

21 Yabalikighwe, IMNDEWA,

kwaapfila kanilangusa uluso wake iukangawatsa,

ahala maaduwi tsangu hawanitsingile.

22 Nene tsanonga himahima apfino, "Kunyasa kutali na tsinenge tsako."

Lekeni ghweghwe kuhulika chililo changu,

ahala hanikulilile unyapfile.

23 Mkundeni IMNDEWA, mwemwe wose imtogholeka,

IMNDEWA koweka wagima awala wose iwolongesa,

lakini kowoyitsila ighehile awala wose iwali na chidandali.

24 Mgangamale na mdudumile,

mwemwe mwose yamumbeta IMNDEWA.