1 Utegheletse ghamalonga ghangu, Ghwe MNDEWA,

uhulike nene pfanighuta.

2 Uhulike litsi lya ichililo changu,

ghwe Mfalume wangu na Imulungu wangu,

kwa apfila ghweghwe yuyo yanikulomba.

3 Hamitondo kutsohulika litsi lyangu, Ghwe IMNDEWA,

hamitondo nitsokulomba, na nene nitsobetelela.

4 Kwaapfila ghweghwe ng'uli Imulungu iyonoghelwa na matotso bae,

wala ighehile ng'aghodaha kukala na ghweghwe baye.

5 Iwanu iwetunya ng'awatsakwima hambele hako baye,

ghweghwe kowahila awala wose iwotenda ighehile.

6 Ghweghwe kowatighina ghendo awala iwolonga ughutsu,

iwokoma wayawo na iwaghutsu IMNDEWA kowahila sideke.

7 Lekeni nene, kwa uluso wako mkulu,

nitsakwingila mng'anda mwako,

kwa kughudema nitsokwinamila,

aku nihundukila kuna ing'anda yako iyelile

8 Ghwe MNDEWA, unilongotse mna ihaki yako,

kwaapfila awala iwonyihila wawengi,

uigholose inzila yako hambele hangu.

9 Kwaapfila imilomo yawo ng'ailawa mbuli yakutogholeka baye,

ichili mna imimoyo yawo ukuhinya kuliyeka.

mimelo yawo yeghala na likaburi lili mwatsi,

imilimi yawo yolonga ung'enye uliyeka.

10 Uwahighe, Ghwe Imulungu, uwaghwise kwa aghala ighehile ghawapangile.

Uwabalase kunze kwa ajili ya tsinzambi tsawo tsili nyingi,

mana wakubiduka ghweghwe.

11 Lekeni uwaleke awala wose iwokukimbilila ghweghwe wadeng'elele,

matsuwa ghose wembe kwa ukudeng'elela. Uwaghubike

awala iwolikunda litaghwa lyako, uwaleke wadeng'elele litaghwa lyako.

12 Kwa apfila ghwe MNDEWA, kombaliki imunu yana ihaki,

komtsungulusila uluso wako ka ngawo.