1 Yabalikighwe IMNDEWA, bambalawe lyangu,

iyolangulitsa ghamoko ghangu ukwitowa ng'ondo,

na iyolangulitsa ipfidole pfangu ukwitowa.

2 Yeye ka Imulungu wangu yanimkunda,

yeye konikinga na konikombola,

yeye ka ngawo yangu,

nomtsumila yeye nikale tseghamba,

iyowahuma iwanu wa tsiisi tsingi na koweka mna ghamoko ghangu.

3 Ghwe IMNDEWA,

imunu yali nani mbaka umtongelele?

Na imwana wa imunu yali choni mbaka umfikitse?

4 Imunu pfayali ka muhe,

matsuwa ghake pfaghali ka ichimbeho ichipfosa.

5 Ghwe IMNDEWA,

ulinamitse lilanga lyako uhulumke hasi,

udonze ipfidunda napfo pfilapfe lihosi.

6 Lughale lumwesa uwapwililise maaduwi,

wase tsiminde tsako, uwawinge.

7 Ugholose ghumoko ghwako kulawa kuchanya,

unikombole na unilapfe mna ghamatsi mengi,

na unilapfe mna ghamoko gha iwagheni,

8 iwolonga ughutsu,

na ghamoko ghawo gha kujilo ghosang'ana ughutsu.

9 Ghwe Imulungu,

nitsokwimbila wila wa sambi,

kwa iching'weng'we cha nyutsi kumi nene nitsokwimbila,

10 ghweghwe yuwatenda wafalume wahume,

na yumkombola Daudi mtumighwa wako.

11 Unikombole, na unilapfe kulawa mna ghamoko gha iwagheni,

iwolonga ughutsu,

na iwogholosa ghamoko ghao gha kujilo watende mbuli tsa ughutsu.

12 Iwasongolo wetu,

wakule ka imimeya ilolesighwe ghoya, mna usongolo wawo,

na neghe tsetu wawe ka tsingutso tsikighwe unzolingo mna ing'anda ya mfalume.

13 Tsikano tsetu tsimeme chila chinu chatubama,

na wang'olo wetu weleke wana maelufu.

14 Wang'ombe wetu wadute mitsigho,

wala tuleke kutowighwa na kughoghighwa,

wanyama wetu iwana ghamatombo waleke kuhosa,

wala kuleke kuwa chililo mna tsinzila tsetu.

15 Wabalikighwa iwanu awala iweng'ighwe agho,

wabalikighwa iwanu awala IMNDEWA yali Imulungu wawo.