1 Umbonele libatsi Ghwe Imulungu,

kwaapfila iwanu woniwinzilitsa wangoghe,

misi ngima maaduwi tsangu wonidununza.

2 Misi yose maaduwi tsangu wonikoleletsa wanimetse,

kwaapfila iwetowa na nene kwa ichidandali chawo wawengi.

3 Ahala hanikwingilighwa na wogha,

nene nitsokulolela ghweghwe.

4 Imulungu katsonyapfila nilitunye lilonga lyake,

nene nehuwila Imulungu, apfo sitsopfuka baye.

Angu munu yana ilukuli ilukufa yatsonitenda choni?

5 Misi ngima wopfulaghitsa aghala ghanilonga nene,

matsuwa ghose wawo wopanga kundagha nene.

6 Wetingana hamwe wepfisa,

wokololetsa ghamatsayo ghangu,

aku wobama ugima wangu wanikome.

7 Angu watsohepa kwa ighehile aghano ghawatendile?

Ghwe Imulungu, uwaghwise iwanu awano ahala haughudubuka.

8 Ghweghwe kukumanya ukulila kwangu,

ugheke ghamasotsi ghangu mna isupa yako,

pfihi ghose ng'ughandike baye mna ichitabu chako?

9 Apfo aduwi tsangu watsobwela kuchughu mna litsuwa alila hanitsokukema unyapfile,

kwa alino nene nitsomanya ghendo ka Imulungu kahamwe na nene.

10 IMNDEWA katsonyapfila nilitunye lilonga lyake,

nene nehuwila Imulungu apfo notunya achila chayalongile.

11 Nihuwila Imulungu, sipfuka chinu baye,

Angu imunu yatsonitenda choni?

12 Tsinatsili tsanikwikile tsose nitsotsitenda, Ghwe Imulungu,

nitsokulapfila nambiko tsa mighede,

13 kwaapfila kunikombola ndeke ukufa,

na kughatenda ghamaghulu ghangu ghaleke ukwikwala,

nyange hambele hako, ghwe Imulungu,

mna ghumwanga ghwa ugima.