1 IMNDEWA kotawala, ghwe isi deng'elela,

namwe ipfisiwa pfingi mdeng'elele.

2 Ghamabingu na ichisi totolo pfomtsunguluka,

ichighoda chake cha ufalume chikighwa mna ghumsingi ghwa haki na ukulamla ghoya.

3 Ghumoto ghomlongolela hayoghenda,

nagho ghowalakatsa maaduwi tsake ubali wose.

4 Ilumwesa lwake lwoimwemwesela isi,

nayo isi yakona na yoghudema.

5 Ipfidunda pfolubuka kulonga nta hambele ha IMNDEWA,

hambele ha IMNDEWA wa isi yose.

6 Kulanga kotangatsa ihaki yake,

na iwanu wose wakona utunitso wake.

7 Walekeni waghelighwe chinyala awala wose iwotambikila ipfinyagho,

awala iweghodela ipfinyagho ipfili si chinu ghendo baye.

Mwemwe imilungu yose, mwinamileni yeye IMNDEWA!

8 Ghwe MNDEWA, iwanu wa Sayuni wahulika nawo wosekelela,

nawo wanu wa Yuda wodeng'elela,

kwaapfila kwa ghamalamtsi ghako kolamla ghoya.

9 Kwaapfila ghweghwe MNDEWA, kwa wa kuchanya ng'ani kubita isi yose,

kwinulighwa kubita imilungu yose.

10 Mwemwe yamumkunda IMNDEWA, mghahile ighehile,

yeye koulinda ugima wa iwanu wake iwelile,

kowakombola kulawa mna ghamoko gha iwanu iwehile.

11 Ghumwanga ghomlangatsila imunu yana ihaki,

na imunu yana ghumoyo ighunoghile katsodendeng'elela.

12 Mdeng'eleni IMNDEWA, mwe muwanu yamna ihaki,

na mlonge mighede kwaapfila yeye kela.