1 Nitsomtunya IMNDEWA kwa ghumoyo ghwangu ghose,

nitsoghapeta matendo ghako ghose gha ukukangawatsa.

2 Nitsosekelela na kukudeng'elela Ghweghwe,

nitsakwimba nilitunye litaghwa lyako,

ghweghwe yuli Kuchanya ng'ani.

3 Aduwi tsangu hawakuya kuchughu,

wekwala na wohupa hambele hako.

4 Mana Ghweghwe kunilamlila kwa haki,

kukala mna ichighoda chako cha ufalume,

kulamla kwa ihaki.

5 Kuwakembela iwanu wa isi tsingi,

na iwehile kuwatighina tighina,

litaghwa lyao kulibaghusa ghendo matsuwa ghose.

6 Maaduwi wamalitsika matsuwa ghose,

imiji yawo kuibomola iwa mahame,

nawo ng'awokumbukighwa keli baye.

7 Lekeni IMNDEWA kotawala matsua ghose,

keka ichighoda chake cha ufalume yaighe.

8 Naye katsolamla isi kwa haki,

naye katsowahigha iwanu wali mna tsiisi kwa ukugholosa ghendo.

9 Iwanu iwodununzighwa watsomtsumila IMNDEWA,

naye ka ingome mna ghamatsuwa gha ukughanzika.

10 Iwolimanya litaghwa lyako, wehuwila ghweghwe,

ghweghwe, MNDEWA ng'uwaleka baye awala iwokubama.

11 Mwimbileni IMNDEWA iyokala Sayuni,

muwalongele iwanu aghala ghayatendile,

12 Kwaapfila yeye kokumbuka na kowaliha ghehile awala iwokoma wayaho,

ng'achisemwile baye ichililo chawo iwodununzika.

13 Umbonele libatsi, ghwe MNDEWA,

ulole pfanidununzika kulawa kwa awala iwonyihila,

Ghwe MNDEWA, unyinule kulawa kuna ghamalango gha lifwa,

14 ili nikakwimbile,

mna ghamalango gha Yerusalemu,

ako nitsodeng'elela apfila pfaunikombole.

15 Iwanu wa isi nyingi waghwa mna lipondo lyawahimbile iwenyegho,

ghamaghulu ghawo ghonzeka mna tsinyapfu tsawateghile iwenyegho.

16 IMNDEWA kelangusa apfila pfayali kwa ukuhigha ghoya,

iwanu wehile wonzeka kwa aghala ghawatendile iwenyegho.

17 Iwehile watsoghenda kutsimu,

ona, iwanu wose iwomsemwa Imulungu.

18 Lekeni imunu mhingwa ng'atsosemwighwa baye matsua ghose,

wala ukuhuwila kwa munu iyodununzika ng'akutsohupa baye matsua ghose.

19 Winuke, ghwe MNDEWA! Uleke kumleka imunu yahume,

waleke iwanu wa tsiisi wahighighwe hambele hako.

20 Ghwe MNDEWA, watende waghudeme kwa wogha,

waleke iwanu wa tsiisi wetambule kama wawo wanu hela.