1 Yeye iyokala hanu ha ugima ha ayula Yali Kuchanya Ng'ani,

iyobwihila hana ichimbeho cha Imulungu Iyana Ngupfu.

2 Nitsomlongela IMNDEWA, "Ghweghwe kwa kimbililo lyangu na ingome yangu,

Imlungu wangu yanikuhuwila."

3 Kwaapfila Yeye katsokukombola na ghumtegho ghwa mlumbi,

na mna utamu ukoma.

4 Katsokughubika na imighala yake,

na ghweghwe kutsotsumila hasi ha ghamabawa ghake.

Ukutogholeka kwake kutsakuwa ingao na ingome yako.

5 Ng'utsopfuka ghendo baye wogha wa kuchilo,

wala ghumshale ighukwasighwa nemisi,

6 wala utamu ukwenela mchisi,

wala ukuhinyika ikulawila hamisi.

7 Wanu elufu imwe wodaha ukufa habehi naghwe,

na wanu wangi elufu kumi ghumoko ghwako ghwa kujilo,

hata apfo utamu awo ng'autsokusoghelela baye ukulaghe,

8 ila kwa tsinenge tsako ghendo kutsolola,

na kutsakona iwehile pfawatsolihighwa ighehile.

9 Kwaapfila Ghwe MNDEWA, kwa kimbililo lyangu,

Kumtenda Yali Kuchanya Ng'ani yawe hanu hako ha ukukala.

10 Kuduhu chinu chihile ichitsokupata ghweghwe,

wala utamu ukwenela ng'autsodaha baye kulisoghelela lihema lyako.

11 Mana Yeye katsowalaghitsa wamalaika wake wakukinge mna tsinzila tsako tsose.

12 Mna ghamoko ghawo watsokusola,

uleke ukwikwala ghumghulu ghwako mna libwe.

13 Kutsowabajugha isimba na inzoka,

na kutsowahonda ghendo na ghamaghulu imwana wa isimba na litsoka.

14 "Kwaapfila konikunda nene nitsomkombola,

nitsomwika hanu henulighwe kwa apfila kalimanya litaghwa lyangu.

15 Yeye katsonikema, na nene nitsomwidika,

nitsakuwa hamwe naye mna ghamaghayo,

nitsomkombola na nitsomtunya.

16 Nitsomtenda yakale mgima kwa matsuwa mengi, kuya nitsomkombola."

na nitsomlangusa ukombotsi wangu.