1 Ghwe Imulungu, uleke kwinyamala,

wala uleke kukala tulu, bila ukutenda chinu ghendo.

2 Kwaapfila maaduwi tsako wotenda tsogho,

na awala iwokuhila wenula ghamatwi ghawo.

3 Wopanga ukuwatendela ighehile iwanu wako,

na welongela pfawobama kuwatendela iwanu wako wauwakunda.

4 Walonga, "Mtse, na tuwamalitse ghendo iwanu wa isi ya Isiraeli,

mbaka litaghwa lya Isiraeli lileke ukukumbukighwa keli."

5 Kwaapfila welaghana kwa ghumoyo ghumwe ghendo,

iwanu awano wokwikila laghano lihile ghweghwe.

6 Iwanu wa ghamahema gha Edomu,

na Waishimaeli, na Moabu, na Wahagari,

7 Gebali, na Amoni, na Amaleki, Filisti,

na iwokala mna ghumji ghwa Tiro.

8 Pfipfila iwanu wa Ashuru nawo wawa chinu chimwe nawo,

wowapfila lweleko lwa Lutu.

9 Uwatende ka apfila pfauwatendile Wamidiani,

ka apfila pfautendile Sisera na Yabini, hana ichikolongo cha Kishoni.

10 Awala iwahupile akula Endori,

iwawile samadi mchanya mwa lidongo.

11 Uwatende iwakulu wawo wawe ka Orebu,

na ka Zeebu, na iwatawala wawo wawe ka Zeba na Zalumuna,

12 iwalongile, "Leka tuiboke iwe yetu,

isi ya Imulungu ina ghumghina ghwa ukudimila."

13 Ghwe Imulungu wangu, uwatende ka timbwisi mna ichipfulapfumbi,

ka ng'umvi ighulusighwa na libeho.

14 Ka apfila ghumoto pfaghusoma ghumhulo,

na ka lilambi lya ghumoto pfalikatsa ipfidunda,

15 uwawinge pfipfo kwa inyahemu yako,

na uwatende wadedeme kwa libeho lyako iliduma.

16 Pfitende ipfihanga pfawo pfiwe na chinyala ng'ani,

ili iwanu walibame litaghwa lyako, Ghwe MNDEWA.

17 Wone chinyala, na wahumbuke matsuwa ghose ing'aghohupa,

wahumbuke na wahupe ghendo.

18 Waleke wamanye kuwa ghweghwe,

yukemighwa IMNDEWA, kwayeka ghendo,

Yuli Kuchanya Ng'ani, mchanya mwa isi yose.