1 Ghwe MNDEWA, uhulike, ukulomba kwangu ikuli kwa ihaki,

uhulikitse ichililo changu,

uwambe lighutwi lyako utegheletse chanilomba,

ichilawa mna ghumlomo ighuli hela ung'enye.

2 Unitendele malamtsi gha haki,

kwaapfila tsinenge tsako tsakona aghala ighagholoke.

3 Kughulolesa ghumoyo ghwangu,

na kunyangila kuchilo unighetse.

na ng'wonile chinu chochose chihile baye,

kwaapfila nene niwania ghendo nileke kutotsa kwa imilomo yangu.

4 Kwa aghala ghawotenda iwanu,

nene nibita kutali na tsinzila tsa iwanu iwehile,

kwaapfila tsanitegheletsa chaunilaghitse.

5 Matsayo ghangu ghakoleletsa tsinzila tsako,

ghamaghulu ghangu ng'aghatotsile inzila baye.

6 Nokulanga ghwe Imulungu, kwaapfila kutsonyidika,

uniteghele lighutwi lyako uhulike ghanilomba.

7 Wonese ghamatendo ghako makulu gha ukukangawatsa ng'ani,

ghweghwe yuwakombola kwa ngupfu,

awala iwokutsumila ghweghwe kulawa kwa aduwi tsawo.

8 Unikinge ka pfachikingighwa ichiluli cha inenge,

unipfise hachimbeho ha ghamabawa ghako,

9 kulawa kwa iwanu iwehile iwonidununza,

maaduwi tsangu iwonitsunguluka wanikome.

10 Imimoyo yawo ihindighwa yahela libatsi,

kwa imilomo yawo wolonga kwa chidandali.

11 Wanikoleletsa na sambi wanitsunguluka,

na tsinenge tsawo watsikodola wanighwise hasi,

12 kulonga simba iyadowile iyobama kumdeghadegha imnyama,

kama imwana wa simba iyopfitsila imnyama wa ukumghogha.

13 Winuke, ghwe MNDEWA, witowe nawo, uwaghwise hasi,

kwa lipanga lyako uukombole ugima wangu kulawa kwa iwanu wehile.

14 Kwa ghumoko ghwako, ghwe MNDEWA,

unikombole kulawa kwa iwanu awo,

iwanu iwosulukila ipfinu pfa muisi,

na wodeng'elela tsimali tsawo, na aghala ighanoghile ghauwongetse wawo,

na iwana wawo, mbaka nawo wawalekele iwana wawo.

15 Lekeni nene nahela totso, apfo nitsowona uhanga wako,

hanilamka nitsodeng'elela kwa ukuwona uhanga wako pfauli.