1 Hebali, ghwe MNDEWA, ukwima kutali?

Hebali wipfisa mna ghamatsuwa gha ukughanzika?

2 Kwa ichidandali chake imunu yehile komuwinda imunu mhingwa,

naye imhingwa kakonzeka mna imitegho ayo.

3 Kwaapfila imunu yehile kotambila aghala ghayosulukila mmoyo mwake,

imunu yana imisi kombetsa na komlighita IMNDEWA.

4 Kwa ichidandali chake imunu yehile ng'ombama baye Imulungu

mna tsimbutsi tsake tsose komwona Imulungu si chinu baye.

5 Chila chinu chayotenda yeye kobweda.

ghamalamtsi ghako gha kuchanya, ghakutali na tsinenge tsake,

aduwi tsake wose kowabetsa.

6 Mna ghumoyo ghwake kolonga, "Haduhu chinu cha kunihighisa nene,

ipfeleko pfangu pfose ipfikutsa ng'apfitsoghanzika baye."

7 Ghumlomo ghwake ghumema ghamalighito,

ukughutsuka na ukulagha,

ilulimi lwake lolonga mbuli itsighala maghayo na ighehile.

8 Kopfisila iwanu habehi na ipfijiji,

kepfisa yamkome imunu yalihela totso,

tsinenge tsake tsomwinda imunu iyali nyonde nyonde.

9 Kopfisila kulonga simba iyobama kughogha,

kopfisila yamghoghe imunu iyali nyonde nyonde,

komghogha imunu nyonde nyonde,

na komkwegheta aku kamna ghumtegho ghwake.

10 Iwanu iwali nyonde nyonde wohondighwa na wakughwa,

wonzeka na imunu yehile yana tsingupfu.

11 Naye mmoyo kelongela apfino, "Imulungu kesemwa,

uhanga wake kaupfisa, ng'akona ghendo baye."

12 Winuke! Ghwe IMNDEWA, winule ghumoko ghwako uwatowe,

Uleke kuwasemwa awala iwodununzika.

13 Hebali imunu yehile yombetsa Imulungu?

Mna ghumoyo ghwake kelongela apfino, "Ng'atsonihigha baye."

14 Lekeni ghweghwe kwakwona ghamadununzo na ghamaghayo,

naghwe kutsowatowa kwa ghumoko ghwako.

Imunu nyonde nyonde keghwisa mmoko mwako umwapfile,

Mana ghweghwe yuyo yuwapfila ing'awana baba.

15 Ughubene ghumoko ghwake imunu yehile na yang'ana libatsi,

umtende yaghaleke ghamatendo ghake ghose ighehile.

16 IMNDEWA kamfalume matsuwa ghose,

Iwanu wa tsiisi wohupa kulawa mna isi yake.

17 Ghweghwe, ghwe MNDEWA, kuhulika achila chawobama iwodununzika,

ghumoyo ghwawo kughutenda ghusindamale,

Mana lighutwi lyako lyowahulikitsa.

18 kowawamile ing'awana baba na iwodununzika,

iwanu iwali dongo hela, waleke kuwaghela chidedemo keli.