1 Ghwe IMNDEWA mkumbuke Daudi,

na ukumbuke maghayo ghose ghayapatile.

2 Ukumbuke ukwilighita kwayelighite, Ghwe IMNDEWA,

lilaghano lyayekile kuna ghweghwe IMNDEWA,

yeye iyana ingupfu ya Yakobo.

3 Sitsakwingila baye mghati mwa ing'anda yangu,

wala sitsoghenda baye kuna ilulili lwangu,

4 sitsoleka baye nenge tsangu tsidongile

wala tsikope tsangu tsisinzile,

5 mbaka nimwing'e hanu ha ukukala IMNDEWA,

hanu hake Imulungu wa Yakobo yana ingupfu.

6 Ako Efurata tsatuhulika imbuli ya lisanduku lya lilaghano,

na tulipata mna imighunda ya Yearimu.

7 Lelo tukeni kuna ing'anda ya Imulungu,

na tukename hana ichighoda chake cha ukwikila ghamaghulu.

8 Winuke Ghwe IMNDEWA, hanu hako ha ukubwihila,

winuke hamwe na lisanduku lya tsingupfu tsako.

9 Iwatambika wako watende ighali ghahaki matsuwa ghose,

na iwanu wako iwotogholeka wembe kwa ukudeng'elela.

10 Ghweghwe yuyo yumsaghule Daudi mtumighwa wako,

apfo uleke kumlema.

11 IMNDEWA tsakelaha hayekile laghano lya kulongesa na Daudi apfino,

"Nitsomwika mwanagho yumwe kulawa mna iwanagho ghumwenyegho,

yawe mfalume, hanu hako.

12 Ka iwanagho watsokinda lilaghano lyangu,

na kukinda imiko yangu yanitsowafunda,

na iwana wawo wamale pfipfila watsokala mna ichighoda chako matsuwa ghose ing'aghohupa."

13 Kwapfila IMNDEWA kasaghula Sayuni,

kabama hawe hanu hake ha ukukala.

14 Ghweghwe tsakulonga, "Ahano hanu hangu hakubwihila matsuwa ghose,

nene nitsokala hanu ahano,

kwaapfila nene nibama nikale ahano.

15 Nitsoweng'a iwanu wa ghumji ghwa Sayuni ghose ghawobama,

nitsoweng'a ichijo chingi iwanu wahingwa waje weghute.

16 Na iwatambika wake watsotangika ka wakombolighwa,

na iwanu wako iwotogholeka wembe kwa ukudeng'elela.

17 Baho nitsotenda imembe ya Daudi ikule,

nayo itsakuwa tala kwa ayula yanimsaghula.

18 Aduwi tsake nitsowatenda wone chinyala,

lekeni yeye nitsompfalitsa litaji ilimeletseka."